Friday, August 24, 2007

Inspirasyon sa kinabuhing gubot

Sa akong blog nga "just for today" akong gisulat ang mga ginagmay ko nga pangindahay sa kinabuhi may kalabutan sa pagbati (gugma na pod?). Ang maong blog mao ang gihimo ko nga pahungawan sa akong gibati sama sa akong journal.

Dunay usa nga nga mipaambit bahin sa Gestalt Prayer (basaha lang unya, naa sa ubos..yawyaw sa ko ha?) ug sa dihang gibasa ko kini, nahaum kaayo kini sa kasamtangan kong sitwasyon.

Mapasalamaton ko kang weng (blogger na siya) sa pagpaambit niadto. Sa pagbinayloay namo ug mensahe (IM), iya pang giablihan pag-ayo ang akong salabutan. Nasayod tingali siya sa akong gibati nga kaguol mao nga iyang gipahimundom kanako nga ako malipayon kaniadto nga wala ko pa nakaila ang akong hinigugma, ug karon nga wala na siya, dili na lang ba diay ako magmalipayon?

Nia, gusto pod nako kining ipaambit kanimo.

Ug kay lagi Bisaya man kining akong blog, akong gihubad ang maong "prayer" sa pinulungan nga haum dinhi.

Ania ang Gestalt Prayer (Fritz Perls, M.D.):

Buhaton ko ang akong gimbuhaton
ug imong buhaton unsay angayan
Ania ako ning kalibutan
dili aron magpakabuhi sa gusto mong mahitabo
Ug wala ka nagpakabuhi ning kalibutana
aron matuman ang akong gusto

Ikaw mao ikaw, ako mao ako.
Ug kung itugot sa kahigayunan
nga magkatagbo kita, pagkaanindot,
Kung dili, wa kitay mahimo

Samtang namalandong ako, nahinumdoman ko ang 'Serenity Prayer' nga nakat-onan ko usa pa lang ka tuig ang milabay.

Ang 'Serenity Prayer' maoy naglig-on kanako samtang nasinati ko ang dakong kasipok sa akong kinabuhi nga malampuson kong nasulbad. Nia ang 'Serenity Prayer' nga akong gihubad sa pinulongang bisaya. Sa mga hubad nga akong nadungog kanhi, ang 'God' gihubad ngadto sa pulong 'Ginoo'. Dinhi ang akong hubad, 'Labaw'ng makagagahum'.

Serenity Prayer (Reinhold Neibuhr, 1934):

Labaw'ng makagagahum, hatagi ako ug lawom nga kalinaw sa pagdawat sa mga butang nga dili nako mausab, ug ang katakos sa pag-usab sa mahimo kong mausab, ug ang kaalam sa pag-ila sa kalainan.

Sa katapusan, ania usab ang akong hubad sa The Key to Mental Health:

The Key to Mental Health (Anonymous):

Sulbara ang kasipok sa mga ginagmay'ng butang tungod ug alang sa mga dagkong butang; mao nga pagtagbaw aron dili ka matagbaw sa daghang mga butang.

Hala kadaghan na ani sa? Hmmm... syaro kung tunlon lang gyod tanan nga mensahe niining tulo, wa na gyoy malisu-an sa maayong pangisip. Ang nakaparat kung human ni mabasa, maglibog na hinoon, dili na makatulog, magsige na lang ug pamalandong, magyawyaw, dili na mokaon, mahadlok na sa hangin ug tubig, ug makadungog na ug gamhanang tingog. Waah..patay kang bata ka.. mabuang gyod ka!

Ambot lang!

5 comments:

Cebu Blogger said...

weeeeee.. grabe ang bisaya na terms ..dili ko kasakay usahay (unsay pagtoo sakyanan? aheheh) bitaw, belev gyud ko aning akong amigo! aehheheh

girlfromdipolog said...

hay kid... tugoti ko nga ipagawas ako unsolicited advice.

naa pod koy naatikan unsaon pag-desentisize (aside from reading tinuod nga botbot). ambot lang! sulayi daw adto sa peyups.com unya i-click tong heart nga icon, didto ka makabasa og mga sagul sagul nga istorya kabahin sa gugma. naay maut naa poy nindot, mapul-an lang lagi kag binasa. ako nakita nako didto dili ispisyal akong heartache kay common ra diay kaayo siya mao nga wala na kaayo na-elevate ag ako mga emosyon, panagsa na lang (hehehe, yeah right!).

JGG said...

@bugITs: salamat bai..

@girlfromdipolog: daghang salamat!

Anonymous said...

"Ikaw mao ikaw, ako mao ako.
Ug kung itugot sa kahigayunan
nga magkatagbo kita, pagkaanindot,
Kung dili, wa kitay mahimo"

..ug kun kita magkita sa makausab, dili ba kaha langit na maoy nagtakda niini? =)

nice blog.
-innah-

JGG said...

@innah: thanks..