Kalag-kalag

Hangtod karon dili pa gyod mahulma sa akong huna-huna kung unsa gyod ning gitawag nga kalag.



Aduna to'y ipanghadlok nako ang akong Lola (pwera kalag) kaniadto. Kung dili ko manihapon, mopasidaan siya: manungkab gani imong kalag unya matakloban sa kaldero, dili na gyod unya makagawas imong kalag.

Sa ato pa, ang kalag, gutomon sab? Ug mubo ra'g pasensiya ang kalag kay manungkab man gyod. Pero ngano man gud kung matakluban sa kaldero ukban bitaw gyod nang kaldero inigka-buntag. Sa akong linghod nga hunahuna kaniadto nakaingon ko nga ang kalag gamay diay kaayo. Kay makasulod man sa kaldero.

Samtang nagtapok-tapok mi human malubong ang akong lolo, kalit lang dunay alibangbang nga mitugdon sa dahon sa kakaw nga duol kaayo namo. Miingon dayon akong iyaan, ang inyong lolo o!

Misiga among mga mata. Sa hilom nakaingon ko nga mibangon diay si lolo gikan sa lubong unya nahimong alibangbang? Kurata ah! Kalag kuno tong alibangbang sa among lolo.

Sa ato pa, ang kalag, makalupad ug ang porma hayop. Maayo unta akong kalag mahimong buyog kay kung mahimong lamok aw maingon gyod nato nga mamaak ko'g hamis nga paa (sa manok).

Niadtong gawas sulod pa ko sa hospital, nagkita mi sa akong amiga. Pagkakita gyod niya nako misiga iyang budlat nga mata ug miingon: Hoy Dong, kaniwang na ba nimo, mura na man kag kalag!

Gitubag nako: Grabe sab nang imong mata simag pa man sa kalag sa embalmer!

Nangatawa na lang mi para dili intawon hangopon sa kalag.

Mas nadugangan akong kahibalo bahin sa kalag. Ang kalag diay, niwang! Wa pa man gud ko nakadungod nga naay miingon. Katambok na man nimo Day, mura na man ka'g kalag!

Nakaingon sab ko nga ang kalag maot. Paminawa ra gud ni ninyo:

Gakampat ra man nang imong make-up Ising uy, mura gyod kag kalag!

Nakadungog na ka'g naay miingon nga, ka-gwapa sa dalaga, mura ma'g kalag! Wala gyod.

Usa ka adlaw niana, nalingaw gyod ko kay malipayon kaayo among silingan, nagkanta-kanta, misayaw, basta saya gyod. Nakalitan na lang mi sa dihang migawas iyang mama dayong ingon:

Naunsa ka Bebot, nagsalimu-ang man ka. Mura man ka'g gikalag!

Misamot na gyod ko kalibog unsa gyod ning kalag. Kung masuko gani to si Tekla, moingon dayon to'g, kung mamatay gani ko, kalgon gyod tika (grrrr!!)!

Matag unang duha ka adlaw sa Nobyembre, pamilyar kaayo aang linya nga: mangalag nya mi sa inyo!

Ang buot ipasabot nga muadto sa balay dili aron manghadlok kundili aron mokaon ug bingka'g budbud.

Misamot ang akong kalibog. Apan bisan pa man, nakighi-usa ko sa mga tumutoo panahon sa kalag-kalag.

Ambot lang!

Visit also: Third Wave
Subscribe in a reader

Watatits!

Kini ang sugilanon ni Kardo ug Sabel nga giasoy ni Noy Tibo nga taga barangay Tinago (Ozamiz).

Sa wala lang damha, matod pa sa tiguwang nga tabi-an, nalunod ang barkong gisakyan sa magtiayong Kardo ug Sabel. Maayo na lang naambak sila. Mabdos ra ba intawon si Sabel. Mao nga nag-utaw utaw na lang intawon sila. Nakita sila sa gutom ug mangtas nga iho. Diha-diha, gitukob sa iho si Kardo. Mihilak si Sabel sa kaguol (nahadlok pod). Ug sa dihang nakita niya nga adunay nagsingabot nga laing iho iya kining gitawag.

Sabel: Iho maluoy ka. Tukba na lang ko. Puslan man nga patay na si Kardo. Tukba na ko iho!

Nakalitan intawon ang iho kay lalim ba nga siya nay gihagad. Namalandong ug gitubag si Sabel.

Iho: (nangyam-id) Watatis, butete ka!

Mahadlok sab diay mahilo ang iho? Sa huna-huna sa iho, di gyod ko pa-uwat!

Kita tingaling tawo dali rang mauwat. Kay daghan mang musulay pag-uwat.

Tan-awa ra gud ning balita gikan sa Moscow.

Kung si Retired PNP General Eliseo De la Paz ug si Secretary Ronaldo Puno ang toohan, kadtong 105,000 Euros o 6.9 ka milyon ka pesos nga iyang gibitbit reserba lang kadto sa ilang biyahe sa Russia. Ang ang magpailad motoo gyod.

Kay nangyam-id man ang iho, aw, ang mga tawo diay, giusab ang ilang alibi. Katong salapi diay kuno, cash advance, aw dili, intelligence fund, taym pa ha, ipalit diay kuno to'g ambo unsa. Makalibog na gyod.

Kining mga bakakon, luoy kaayo kay sila mismo mituo na sila sa ilang kaugalingong bakaw. Ka wa sab nilay uwaw no, nga mitukob man sa salapi sa katawhan.

Nakaingon bitaw ko nga kung sila ang ipakaon sa iho, balibaran gyod. Magtoo man ang iho nga butete sila.

Sa gobyerno, sa ginagmay'ng tapok sa ordinaryong tawo, sa gagmay ug dagkong mga negosyo, ubay-ubay gyod ang mangingilad ng nagtakuban nga maoy nailad.

Watatits, nangurakot mo!

Ambot lang!

Visit also: Third Wave
Subscribe in a reader

Ang pinaka-adunahan ug ang pinaka-kabus sa katilingban

Sa listahan sa 40 ka mga adunahang Filipino nga gipagawas sa Forbes Asia magazine, wala gyod naapil (nasalaag) ang akong ngalan. Angay bang ikatingala?

Aw, namasin man lang sab ko ba nga maapil ang akong ngalan.

Pero ang tinuod bisan pa'g mopagawas ang Forbes Asia magazine sa listahan sa napulo ka milyon nga pina-kaadunahan nga Filipino, dili gyod ko maapil ang akong ngalan. Tingali kung naa nay listahan sa 90 milyones nga pinakadato sa Pilipinas, aw, maingon gyod nako nga maapil na gyod ko.

Matod pa sa Forbes Asia magazine, si Henry Sy ang nag-una sa listahan kinsa ang salapi ug kabtangan (net worth) mukabat sa $3.1 billion. Gisundan kini ni Lucio Tan, $1.5 billion.

Anaa sab sa listahan sila Jaime Zobel de Ayala, Andrew Tan, Tony Tancaktiong, John Gokongwei Jr., Eduardo Cojuangco Jr., Enrique Razon Jr., George Ty, ug si Senate President Manuel Villar.

Sa mga wala pa makasulay nga mahimong pinaka-adunahan, dili gyod makasulti kung unsa kaharuhay ug kung unsa kalisod ang manginabuhi nga dagha'g salapi.

Duna baya koy amigo kaniadto nga nakadaug ug 80 milyones ka pesos sa lotto.

Matod pa niya dili lalim ang iyang gibating kalipay ug kaguol. Kinsa bay dili malipay kung makagunit nianang kantidara.

Pila na kaha ka sakong bugas (kanang NFA ba) mapalit ana sa? Pila na kaha ka kahon nga buwad ang makonpra ana sa Tabo-an?

Pero kung si Dodong tigasin ang mangutana, pila na kaha kahon nga serbisa ang mapalit anang kwartaha.

Aw, mao man gyod na ba, kung malipay, motagay man gyod ning Pinoy. Kung maguol, tagay sab. Kung laayon tagay gihapon. Kung walay kuwarta, mangita gyod og tagay.

Ang gikagul-an sa akong amigo'ng mikalit pagka-milyonaryo mao kung unsaon niya pag-gasto ang minilyon nga salapi. Ang sugyot sa taga Lapu-Lapu ug Mandaue, mupalit siya'g decorative lamp, katong mahal kaayo ba ug iyang ipa-ugbok sa iyang mansiyon sa Pasil. Pero dili man ganahan akong amigo'ng milyonaryo.

Mubiyahe kaha siya sa Moscow dala ang dakong salapi? Unya'g madakpan siya sa airport. Maayo unta'g PNP general siya.

Dili gud. Iya na lang ba kahang ibayad sa insurance, bulahan mamatay siya, makadawat siya'g milyones? Unya'g mosira ang kompaniya sa insurance.

Nakahunahuna kuno siya nga ibakos ang iyang kwarta apan naguol sab siya kay basin ma-hold-up siya sa Sanciangco'g Colon.

Apan ang labaw niyang gikagul-an mao nga kung unsaon niya pagbahi-bahin nga matagaan ug balato ang tanang kaparyentihan.

Matod pa niya nga kung kaniadto kan-on ug buwad ang iyang kalipay ug kung unsay ipasunod ang iyang ikaguol, sa dihang milyonaryo na akong amigo, wa na siya'y gana magsud-ong sa mahalong pagkaon ug maguol na siya basin pagka-ugma, usa na ka truck ang mumhong mabilin.

Problema sab diay kung mokalit ta'g kadato.

Maayo na lang kay nakatulog ang akong amigo ug sa pagmata niya iya na lang nahibaw-an nga damgo lang ang tanan.

Ang pinaka-kabus sa katilingban malipay na lang kung naay makaon katulo sa usa ka adlaw. Apan ang mga adunahan, wa ta masayod kung unsa sab ang ilang kalipay.

Magdamgo na lang sab kaha ko sa?

Ambot lang!

Visit also: Third Wave
Subscribe in a reader

Gitik-Gitik sa Pulitika

Kining ubang mga misikat, nagtoo na gyod nga giganahan na pag-ayo ang mga tawo nila tungod kay sige silang makita sa telebisyon ug mabasa sa pamantalaan. Nagtuo na gyod sila nga ituboy sila sa katawhan ngadto sa Senado ug Malakanyang tungod lang sa ilang kasikat.

Kataw-anan, apan tinuod nga daghan sa mga misikat nga mga personalidad ang gikatahong molansar sa nagkadaiyang posisyon sa 2010.

Si Manny Pacquiao nga misikat sa boksing, misulay na niadtong eleksiyon sa 2006 apan napildi. Wa gyod natagam, modagan pa gyod daw sa 2010. Aw kung sinumbagayon, maingon nato nga duol gyod sa kadaugan.

Si Vilma Santos ug Bong Revilla naghinam-hinam na kuno nga mamahimong bise-presidente? Maayo kaha?

Ambot kung ipadala ba sa Ginoo ang iyang anghel aron mobalita kang Bro. Mike Velarde nga angayan na siyang ma-presidente

Sa tanan nga gusto magpasikat nga sikat wala nay makalupig kang Bayani Fernado. Unsa man kunoy motibo sa pagplastar sa iyang nawong sa tarpulin, aber? Matod pa ni Bayani, bisan pakan-on pa siya'g bildo, iyang buhaton aron lang ganahan ang mga nagtan-aw sa programa sa telebisyon nga "Celebrity Duet". Kung modaog si Fernando sa Celebrity Duet", manimaho sab kaha siya sa 2010?

Si Gina de Venecia, nga hilabihan na ang pagdaut sa kanhi kauban sa mga misteryo este sa iyang mister nga si Jose de Venecia, gusto sab daw mudagan isip Senador. Hay manay Gina! Aslom baya ang balimbing, di ba?

Si Joey de Venecia nga nailhan tungod sa isyu sa NBN-ZTE, gusto sab daw mag-Senador? Bisan si Jun Lozada, gusto sab? Hala, mangatawa na ta uy!

Ang labing kataw-anan, mao nga ang usa ka ginganlan ug Mary Grace Poe Llamanzares, anak sa napildi ug namatay nga si Fernando Poe Jr. Gibalita nga lig-on daw nga kandidato sa pagka-Senador sa 2010?

Mao na gyod tingali ni ang timailhan nga nagkaduol na ang panagna sa ermitanyo sa Mahayag nga ang Senado mamahimo nang carnaval. Aw hinoon karon ang Senado nahisama na man lang sa lapad nga kasagbutan nga gidulaa'g patid-lata.

Sa atong nasod, gawasnon ang matag usa nga buangon ang iyang kaugalingon. Apan buang na ba gyod ang mga Filipino nga mo-boto sa maong klase sa mga kandidato?

Gitika ko Noy!

Ambot lang!

Visit also: Third Wave
Subscribe in a reader

Bida ang Biktima

Sa mga drama'g salida, luoy gyod ang bida kay biay-biayon ra man sa kontrabida. Kining mga laksot nga komedyante luoy sab kaayo kay bunalan, sukmagon,sagpaon, dagmalan aron mahimong kataw-anan. Angay ba gud kahimut-an ang kasakitan sa uban? Sa akong nasinati, nahimo ko nga sinaksak nga "ambongan" nga bida ug laksot nga komedyante nga gipahimuslan sa mga way puangod nga nga kontrabida. Ug gikahimut-an sa pipila.

Sa tanang mga batang buotan, ako ang pinakaswerte. Tiaw mo nga nahimo ko nga bida sa usa sa mga kulba-hinam, linuog, ug dugoong drama ug salida sa kadalanan sa Sugbo. Ang uluhan sa mga salida: Ukay-Ukay sa Unod; Tulis-Patay; Tulis-Kulata; Kinuotay; Linabnihay. Kung ang ubang bida way kukaluoy nga gipamatay, ako gibilinan pa intawon ug gininhawa human gipatilaw ang sakit nga kulata.

Matod pa sa akong mga kaila.

Swerte ka kay wala ka lubaa!

Swerte ka kay wala ka pusila.

Swerte ka kay wala ka patya.

Apan ang pinakaswerte gyod kuno nako mao nga ako "gikulata ra". Bisan pa man, ako nalakip na sa listahan sa mga daghang biktima. Apan siyempre, naapil na sab ko sa mga nahimong "bida".

Dili luwas ang kadalanan sa Sugbo. Daghang mga kriminal ang daw irong buang nga naglaroy-laroy ug nagpaabot nga makapaak. Pangutana sa pulis pila ka tawo ang mabiktima sa "krimen sa kadalanan". Klaroha ang mga pulis kung pila ang gitulis nga jeep, ang gi-hold-up, gikuotan ug gilabnihan matag adlaw. Pangutana lang, ayaw na paglaum nga makadungog ka'g insaktong tubag. Ang tinuod, daghan sa mga krimen sa kadalanan sa Sugbo, apan gibuta-butahan sa mga naa sa pangagamhanan. Sa ato pa, wala sila nakakita sa mga kulba-himan,linuog, ug dugoong drama ug salida sa kadalanan sa Sugbo.

Hinoon, mogawas man ang pulis ug pulitiko kung sikat na pag-ayo ang biktima nga nahimong bida!

Kining mga kuot, hold-up, ug pangpanlabni sa kadalanan, ginagmay ra baya ni. An dinagko mao ang tulis sa bangko, pagpayuhot sa mga illegal nga kargamento, pagpalusot sa mga mahalon nga sakyanan, mga kidnapping ug ang over-pricing sa mga suga sa Lapu-lapu ug Mandaue. Kana sila ang mga dinagko. Kung sa salida pa, dako'g budget! Siyempre, dako'g kita silang ma'am ug sir.

Apan, kining mga ginagmay nga panghitabo sa kadalanan, puwera gaba lang, pasagdan na lang na uy! Naay dagko nga panghitabo nga angay tan-awon apan dili kuno angay sulbaron.

Apan hinumdumi baya Noy, ang ginagmay, mahimo gyod nang dako.

Magamay man o madako, magpabiling bida ang biktima!

Ambot lang!

*Napatik sa Panguil Bay Monitor (Ozamiz City), August 4 - 10, 2008 issue.

Visit also: Third Wave
Subscribe in a reader

Serbisyo todo-todo

Serbisyo-publiko, endorso-produkto! Serbisyo todo-todo.




Nia koy listahan. Dili ni listahan sa utang sa Pilipinas, listahan ni sa mga pulitiko sa Pilipinas nga ambot lang.

Dinhi sa atong nasud, lisod tapukon ang mga ang mga artista nga walay pulitiko; lisod bulagon ang mga pulitiko'ng artistahon ug ang mga puliko nga nag-inartista; labaw na nga lisod pangitaon ang tapok diin adunay mga modelo'g tig-endorso'g produkto nga walay plano mag-pulitiko. Dinhi sa ato, halos tanang sikat ug mikalit pagsikat birahon paingon sa misteryosong linaw sa pulitika. Ingon diay niini ang dula sa pulitika. Dili na unya ko makurat kung sa 2010, modagan pagka-senador ang modaug nga Pinoy Idol.

Niadtong nilabay'ng pipila ka mga bulan, malipayon kaayo ang mga senador tungod sa libreng TV exposure. Dili tungod kay daghan silang napapasar nga balaod kundili tungod sa ilang gihimong imbistigasyon. Naa ba kadto'y maayong resulta? Mura'g pasikat man lang gud kadto sa akong tan-aw. Wala ma'y kamatuoran nga milutaw. Mao na ang kamatuoran - patapok sa tawo - og dili ang tuyo mao ang pagtugkad sa kamatuoran.

Bag-ohay pa lang, naglangas-langas si Senadora Miriam Santiago. Iyang nabantayan nga nagkadaghan sa mga respetadong senador nahimo na nga tig-endorso ug produkto. Ug ang nakakataw-anan kay kasagaran kuno sa maong mga tig-endorso'g produkto, wala kuno nagpabayad. Kabahin kaha kini sa serbisyong todo-todo sa mga trapo?

Nia ang pipila ka mga trapo, este, artista, aw, mga lider diay ni sila sa atong nasud nga gipili nato mismo. Apan sa dili ko pa sila iparada, sugaton una nato sila sa hilabihan kahinay nga pakpak.

Francisco Pangilinan

Swerte ni nga senador kay noodles ang gi-endorso. Kini man gud kunong noodles, makapataas sa kinabuhi. Kini sab kaha ang makapataas o makaputol sa kinabuhing-pulitika ni senador? Tingali angay nato kining lutuon pag-ayo. Basin ang sobrang tingsi sa telebisyon, asgad na kaayong pasikat nga estilo ug dili na matulon. Natuk-an hinoon ko da.

Sa mga kabos intawon ug dili gani makapalit og noodles, dunay suhestiyon si Sen. Francis Escudero.

Francis Escudero

Para kaniya, gikinahanglan nato ang food supplement mao nga kini ang iyang gi-endorso. Nakita tingali ni Escudero nga pirming kulob ang atong kaldero. Grabe ang kagutom sa katilingban bisan pan nga pranses dili ta kapalit. Kapait.

Huma'g kaon, unsay buhaton?

Manuel Villar

Siya ang banggiitang nag-endorso'g tootpaste. Wala may problema, matud pa niya kay ang maong tootpaste gama sa Filipino. Naa unta to'y "kompaniya" sa silhig sa amoa halangdong senador, pwede ba ikaw ang mag-endorso? Gama man sab to sa mga Filipino. Mao ni ang linya sa ato unyang TV ad: "Silhigon nato ang trapo sa gobyerno, palit na kamo sa silhig-lanot nga gama sa Filipino." Ayaw ka, kay kining maong silhig-lanot, world-class!

Kini na tingali ang tinuod nga soap opera. 'Way maglangas ha kay akong ipa-ila-ila si ...

Mar Roxas

Nalipay ko nga sabon panglaba ang gi-endorso ni Roxas kay kini nagpahimundom kanato nga daghan kitang angay nga labhan, daghan ang angay kuso-an pag-ayo, ug daghang mansta nga angay tangtangon. Wala kuno'y bayad ang iyang pag-endorso kay kabahin kini sa iyang pagtabang sa katilingban aron makadaginot pinaagi sa pagpalit sa barato apan epektibo nga produkto. Katuhu-an dili apan tuo na lang mo aron ta madali.

Apan sa kabaga sa buling ug mantsa sa corruption, mo-bula pa kaha ang sabon?

Human ta manglaba, kinahanglan natong banlawan ang nilabhan.

Pia Cayetano

Iyang gi-endorso ang gitawag nga fabric softener. Kung mao kuno kini ang gamiton, mas mogamay ang atong magamit nga tubig sa pagbanlaw sa atong nilabhan.

Pangutana: Angayan na ba nga banlawan nato ang balay-balaoranan? Buhaton nato kini bisan pa tingali kung ang tubig nga magamit sama kadaghan sa tubig sa Maria Cristina Falls, kung kini gikinahanglan.

Nagpahinumdom sab kini nga angayan na nga pahumokon ang mga balati-an sa mga senador. Panahon na tingali nga "mangaligo" kita.

Richard Gordon

Si Gordon, halangdon kay iyang gi-endorso ang sabon pangkaligo aron hinlo ug himsog ang katawhan. Iya tingali namatngonan nga daghan na kaayo ang "hugaw" ug gikinahanglan na nga lugdan ang mga kasaypanan nga atong nahimo sa niaging eleksiyon.

Human sa makalilisang nga imbestigasyon ...

Panfilo Lacson

Dili pusil ang gi-endorso ni Lacson kundili usa ka facial care center - kana bang adtoanan sa mga gustong magpaputi, ug magpaanyag (pagwapo pud tingali). Sa among baryo, ang banyo ra man ang among facial care center, udlot sa kapayas ug asunting ang inusnus, oks na man kaayo. Pwede kaha ipa-endorso namo kang senador ang among facial care center with special
udlot sa kapayas ug asunting treatment? Taym pa, dili kaha mag-imbestigar ang Senado sa nagkagusbat, nagkalasot, ug nagkahugaw nga nawong sa balay balaoranan? Dili tingali kay hapdos tambalan ang atong kaugalingong samad. Manghunad na lang unya ta'g udlot sa bayabas.

Sa kamahal sa gasolina, nganong mobiyahe pa kung pangpaputi masulbad na sa kapsula?

Loren Legarda

Siya natuo nga mas maanyag ang puti'g kutis. Ug siya nagtoo nga dili ang pagtago sa langub, pagnusnus sa udlot sa kapayas ug ang pagpanglugod ang makapaputi. Iyang gi-endorso ang paputi nga produkto - walay problema kay ang produkto makatabang kuno pagpugong sa kanser. Dalaygon ang imong gibuhat senadora, kay imong gipahimumdom sa mga kababayen-an nga mas puti, mas sikat; mas sikat mas may purohan nga mahimong senador, ug kung Senador na, pwede na mag-presidente. Pero hinumdumi lang nga ang tinuod nga kaanyag dili makita sa puti nga kutis. Ug himumdumi sab nga basin ang imong gibuhat mamahimong makapa-ursa sa walay kaayohang kanser sa katilingban.

Sila walay gilapas nga balaod. Sa ato pa, dili sala ang mag-endorso'g produkto apan labaw na nga dili kini matawag nga serbisyo publiko tungod kay nalangkop kini sa pagpamaligya ug sa pagpa-ginansiya. Ang tag-iya sa produkto naglaum mga modako ang ilang halin tungod sa pag-endorso sa mga banggiitan ug halangdon kuno nga mga tawo. Dili kini dautan.

Sa pagkakaron, dili nato hatagan og igong gibug-aton ang mga pulitiko nga nag-endorso'g produkto kay klaro kaayo ang ilang motibo. Kung gikinahanglan nila ang pag-endorso'g produkto aron mapansin sa katilingban, nagpasabot ba nga kulang ang ilang panirbisyo? O nagpasabot ba nga naka-menus sila sa pagsabot sa kinabag-an.

Ang labing halangdon nga lider sa nasud dili na kinahanglan mo-endorso'g produkto aron makita sa katawhan nga sila nag-serbisyo ug aron "mahumot" sa katilingban. Usa lang unta ang angay nilang buhaton, ug mao kini ang kanunay'ng ginahangyo - ang tinu-oray nga serbisyo. Kana lang. Dili kinahanglan ang magpasikat.

Tungod kay ang respeto, dili mapalit ...



Ambot lang!

*Napatik sa Panguil Bay Monitor (Ozamiz City), June 23 - 29, 2008 issue.

Visit also: Third Wave
Subscribe in a reader

Kaon ta'g plastik

Makalumos ang plastik sa atong katilingban. Daghan kaayong plastik. Halos tanang gamit plastik. Halos tanan sa palibot plastik.

Napul-an na ko sa plastik. Natuk-an na ko. Naa sila sa akong atubangan, naa sa kilid, naay gibitay, naay gitumban. Maayo na lang ang uban nalubong na; maayo na lang ug pagkadimalas kay ang uban nasunog; samtang ang uban naglutaw-lutaw pa. Ambot unsay kapalaran nga naghulat sa mga gipanghulma pa.



Dili ko ganaha'g plastik. Mas nindot ikauban ang tinuod ug nagpakatinuod. Apan asa ang tinuod; kinsa ang tinuod, unsa ang kamatuoran?



Apan lisod likayan ang plastik tungod kay ang plastik kun tan-awon mura'g tinuod. Ingon diay niini ang kamatuoran - ang plastik nagpahimulos sa atong kadali malingla nga mga mata.



Gusto nakong ilabay ang plastik, apan asa? Gusto kong ipadaplin ang plastik, apan kanus-a? Ako na lang kaha mismo ang mosilhig sa plastik nga nagpasad sa nataran ug sa kadalanan o mas maayo kaha nga magpaabot pa ko sa mobuhat sa ingon?



Halos wala na kitay mahimo. Ang kalibutan giharian na sa plastik. Ang atong nasud, giputos na'g plastik. Nabalaka ko nga sa pagligid sa mga adlaw ang hangin nga akong hanggapon ug ang pagkaon nga akong usapon - plastik.



Mokaon na lang kaha ta'g plastik? Matulon kaha?

Ambot lang!

Visit also: Third Wave
Subscribe in a reader

To finish my studies

Ang pinakasayon ug kasagarang isulat sa formal theme mao kini:

My ambition in life is to finish my studies.

Mao man gyod na ang pangandoy sa matag Filipino - ang makatapos sa pagtu-on aron makahaw-as sa kapit-os sa kinabuhi. Ang edukasyon man gud kuno mao ang bugtong bahandi nga magasa sa mga ginikanan ngadto sa ilang mga anak nga dili ug dili gayod malaksi. Ngilngiga ah! Tinuod bitaw na.

Apan sa matod pa sa Department of Education (DepEd), sa usa ka gatos ka mga tinun-an nga misulod sa grade one, 43 ra ang makahuman sa high school; 23 kanila ang motongtong sa kolehiyo; 14 lamang ang makatapos. Asa na man diay ang 86? Wala ba silay ambisyon nga makatapos sa kolihiyo? Dili baya. Nag-unang hinungdan mao gyod ang kalisod. Mahal ang pagpa-edukar. Tungod ba kay dakong negosyo ang edukasyon? Dili nako kini tubagon.

Sa kadaghan sa mga kolehiyo ug unibersidad sa Pilipinas, daghan kaayo ta'g kapilian. Adunay mahal, duna say barato; dunay gobyerno, daghan ang pribado. Dunay nagkalain-lain ang kuro duna sab Nursing ra. Silang tanan moingon nga ang ilang institusyon nanglantaw sa de-kalidad nga edukasyon.

Tungod lagi kay dunay kompetinsiya, nag-iyahay na lang intawon sila'g paningkamot aron makakuha'g estudyante. Ang mga hilig sa TV, radyo, newspaper, ug billboard makaingon gyod nga ngilngig sab ning advertisement sa mga tulunghaan.

Dunay mikotrata og artista aron mo-endorso sa ilang tunghaan, dunay manghatag kuno ug laptop. Kanindot no? Duna sab magsige hatag ug discount, lupig pa'y SM, kay sila sige'g sale. Daghan ang manghatag og nipis nga T-shirt, labakara, kalo ug uban pa upon enrollment. Dunay manghagad nga liboton ang kalibutan nga libre basta mo-enroll sa BSMT (Nautical). Ang uban mibalandra gyod, earn dollars, be a nurse. Dunay sab miingon nga help your country, enroll in nursing. Kung gimahal ninyo ang inyong nasud, pag-nars kuno mo.

Sa edukasyon, dili man ang kitaong salapi ang himoong pundasyon. Pananglitan, kung ang usa ka dalaga mokuha sa kursong edukasyon aron makalangyaw sa Amerika, lahi na kaysa magtuon ka sa Education aron mag-edukar ugma damlag.

Duna koy nadungog nga advertisement nga ang musical score mao ang nasudnong awit sa Pilipinas. Dili nako masabtan ngano. Apan ang labing ngilngig mao ang pasalig sa uban nga kung mo-enroll sa ilang kurso, sigurado nga makatrabaho dayon.

Kinsay dili ganahan mo-eskwela sa kolehiyo nga bisan Agosto na, nakabalandra gihapon ang Enrollment now going on ug sa ilang billboard nakataplak ang Enroll Now!

Apan unsa ba gyod ang kalidad sa atong kolehiyo ug unibersidad? Tan-awon ta ra gud ang national passing rate sa mga licensure examinations. Niadtong 1995, 41.61% ang average national passing rate sa nasud sumala pa sa Commission on Higher Education (CHED). Sa ato pa, sobra sa katunga ang dili makapasar sa licensure examination. Nitaas kini ug diyutay sa 2001, 48.30% apan mihagpa ngadto sa 41.71% niadtong 2003. Sa ato pa, dili man matawag nga ubos kaayo ang kalidad sa atong edukasyon apan dili gyod ta makaingon nga maayo na ang 40%

Dili na lang ni nato ilipod-lipod pa. Daghan sa mga kolihiyo ang kulang sa pasilidad ug katakos sa paghatag sa de-kalidad nga edukasyon. Ang uban gani nila, nagpa-gradwet lang pero maihap lang sa ilang graduate ang makapasar sa licensure exam. Ang uban sa mga makaloluoy nga estudyante, mi-graduate apan dili pa pwedeng makakuha sa licensure examination kay diay ang kurso nga ilang nahuman, dili pa recognized sa CHED. Pagkapait!

Kining kurso nga nursing maoy number one. Daghan man gusto mag-nurse mao nga midagsang pag-ayo ang mga nursing schools nga kadudahan kaayo ang katakos nga makahatag ug de kalidad nga edukasyon. Dili man malilong ba nga daghang mga kolihiyo nga mikalit lang pagtunga pagtakdol. Hinoon, katungod man nila ang magtukod ug tulunghaan. Apan kung ang gilantaw ang kalidad sa edukasyon og dili ang ginansiya, tingali dili ingon niini kadaghan ang kolihiyo sa nasud.

Ang ato lang ba, kung nabaligya na ang kabaw, naprenda na ang kalubi-an para sa edukasyon apan ang ulo habolan pa diay kaayo. Lisod tunlon ang hilaw-lata, dili ba?

Managlahi man ang atong panglantaw ug magkasumpaki man ang atong opinyon, ang importante nga hangtod sa kamatayon mapuy-an nato ug padayong i-respeto ang balaanong katungod sa pagpadayag.

Ambot lang!

*Napatik sa Panguil Bay Monitor (Ozamiz City), May 12 - 18, 2008 issue.

Visit also: Third Wave
Subscribe in a reader

Yawyaw sa Barberohan

Ang tuig 2008 kuno ang tuig sa mga igsoon nato nga mahuyang - mga miyembro ba sa gitawag nga "third sex". Nadunggan ra baya ni nako sa barberohan sa merkado sa Mandaue samtang nagpaputol ko sa akong ulo este buhok diay. Igo na lang ko sa pagpahiyon samtang naminaw sa mga tabi-an kaayo nga mga barbero.

Una man gud nilang gilantugi-an mao ang kaso ni Jan-Jan (dili tinuod nga pangalan), nga gi-operahan didto sa Vicente Sotto Memorial Medical Center (VSMMC) tungod kay dunay sudlanan sa pahumot nga mapasok sa iyang lubot. Nahimo gyod intawon tong sumsuman sa mga tabi kay unsaon man sab gibidyuhan man ang operasyon. Dili baya gyod to maayo ang gihimo sa mga "medical staff" nga pagbidyu ug pagyaga-yaga kay pagyatak baya to sa tawhanong katungod ni Jan-Jan (dili lagi na tinuod niya nga ngalan).

Bisan unsa na lang ang ilang panahom sa isyu sa sudlanan sa pahumot nga nahuot sa lubot. Dunay miingon nga angay tangtangan sa lisensiya ang mga doktor ug nars para motagam, duna say miingon nga angay ra sab nga mirisi kang Jan-Jan. Ambot kataw-anan tingali kay nagsige man sila'g tisngi. Baya, sa katabi-an sa mga barbero kahadlok baya kung hastang dunggan namo maapil og putol.

Dunay misagbat nga midagsang na kuno karon ang mga mahuyang. Bisan asa kuno dunay parlor. Karon pa siya kabantay? Matod pa nga niadtong miaging Sinulog daghan kanila ang mi-rampa.

Taym pa, mura'g ulahi na kaayo ang maong obserbasyon da. Angay hinumduman nga kung wala baya sila, dili magmalampuson ang Sinulog (ambot lang!). Niadtong Sinulog, daghan kanila nagsul-ob sa sapot sa mga babaye ug gisasayaw-sayaw ang imahe sa Sto. Niño.

Ingon ana man gyod na ba basta pista, labi na kung rayna-rayna, indigay sa kaanyag, street dancing ug uban pa. Pero dili gyod ingon nga midagsang ang mga mahuyang. Naa gyod sila sa katilingban. Pareho ra gud na nga dili baya ta maka-ingon nga midagsang ang mga uwagan nga maga lalaki, o ang mga maldita nga babaye. Bisan pa lalison na, naa na gyod na silang daan.

Kay bulan man karon sa Mayo, uso na sab ang Santacrusan. Mao man gani nga nasagmuyo intawon si Manila Cardinal Gaudencio Rosales sa uban nga nagpa-sagala kay inay mga babaye ang hinoong Reyna Elena, mga mahuyang na man hinoon ang giparampa, este gipa-prosisyon.

Pero ang nakatingkag sa akong dunggan mao ang gipaboto (nga estorya ba) sa usa ka barbero. Matod pa niya kota kuno sa mga mahuyang ang Mandaue. Mikunot akong agtang. Ngano gud tawon, pangutana pa nako sa hilom. Wala na nako madungog pa ang estoryang pangbarbero kay miuli na ko. Moadto pa man gud ko sa ukay-ukayan, mang-hearing ug numero sa "lastre" basin swertehon ba. Bitaw, binutbot ra baya ning akoa basin motuo mo ba nga ang hearing 143. Patdi nya sir!

Ambot unsa ka-tinuod nga ang tanang parlor sa Mandaue nagkahiusa kuno sa pag-suporta sa usa ka kandidato pagka-mayor niadtong niaging eleksiyon. Dili sab nato naingon nga sila nakapadaug kay wa man ta makahibalo kung midaug ba ang maong kandidato. Pero kung sabton nato pag-ayo, kung adunay gitawag "women's block" sa pulitika, aduna na sab diay "third sex block". Mao tingali nakaingon si manoy barbero nga kota "nila" ang Mandaue.

Tinuod baya tingali kay ning pista sa Mandaue, naa man gyod ang gitawag nga "Miss Gay contest". Pero sa gikaingon ko na, dili na maoy basehan. Aw, kung tinuod, wa may problima ana ba. Basta sa akong nahibaw-an bingka ang sikat sa Mandaue. Lami ra ba gyod kuno ang bingka sa Mandaue matod pa ni bai Ramses.

Kini hinoon atoa, hisgut-hisgot ra man ni. Dili man tingali ni dautan ba. Dili sab ni isyu. Labaw na nga wala ta namulitika.

Ambot lang!

*Napatik sa Panguil Bay Monitor (Ozamiz City), May 5 - 11, 2008 issue.

Visit also: Third Wave
Subscribe in a reader

Gisakitan, Giyaga-yagaan, Gipakakaulawan, Gi-imbistigahan

Kung kataw-anan, angay natong kataw-an; kung hinabangon, angay nga tabangan. Apan unsaon kung gitakataw-an, giyaga-yagaan, ug gipakaulawan ang tawong nangayo ug tabang? Ato ra god ning imbistigahan.

Nasakitan ug gibati'g kaulaw si Janjan (dili tinuod nga pangalan), usa ka pasyente sa Vicente Sotto Memorial Medical Center (VSMMC) - Cebu City, human niya mahibaw-an nga mikatap na ang bidyu sa pag-opera kaniya. Gani nakita na man kini sa tibuok kalibutan pinaagi sa YouTube.

Ang uban ganahan nga makita sa Youtube kay sikat kuno apan, sa kaso ni Janjan, naulawan man hinoon siya.

Ingon man gud niini ang sugilanon. Si Janjan nga miangkon nga nakighilawas sa usa ka lalaki. Human niadto, midangop siya sa VSMMC tungod kay dili na makuha ang napasok nga sudlanan (spray canister) sa pahumot nga gisulod o nasulod ngadto sa iyang lubot. Dako ra ba intawon mao nga kinahanglan gyod ang tabang sa mga doktor. Kung naunsa o giunsa, wa na tay labot. Ang ato lang nga maluwas intawon si Janjan.

Ambot naunsa pod ang mga doktor ug nars nga gibidyuhan (mitugot nga bidyuhan) man ang maong operasyon bisan wala kini tuguti ni Janjan. Sa bidyu, makita ang dili moubos sa napulo ka tawo ang nagpunsisok sulod sa gitawag nga "Operating Room". Saba kaayo sila, nagsige pangatawa, lupig pay naa sa tigbakay. Kataw-anan diay ning mag-opera no? Kahimut-an diay ang kasakit sa uban? Ang nakaparat kay gipakatag ang bidyu, kung kinsa, angay gyod natong masayran.

Kinsa kaha ang nagbidyu no? Nars ba kaha? Estudyante? O doctor? Kinsa man tong mga nagpunsisok sa "Operating Room" nga saba kaayo? Doktor sab to sila? Maayong pangutan-on ba, "Doktor, doktor, nars ka?"

Way mga batasan! Asa gud intawon nila gibutang ang ilang buot nga gihimo man nila kadto? Kataw-anan diay kung naay napasok nga sudlanan sa pahumot (spray canister) sa lubot sa tawo? Kataw-anan ba kung nangayo ug tabang ang pasyente?

Nakalimot kaha ang mga doktor ug nars nga naghimo sa maong operasyon sa ilang kaakuhan ngadto sa pasyente?

Aduna nay gihimo nga pakisusi ang kadagku-an sa VSMMC. Nakisusi na sab ang Office of the Ombudsman Visayas sa among hitabo. Matod pa ni Janjan, iyang ipasaka ang maong hitabo ngadto sa Department of Health (DOH), ug sa Professional Regulations Commission.

Ang kadagku-an sa VSMMC, nangayo na ug dispensa sa pasyente nga nahimong biktima sulod mismo sa hospital.

Balaanon man ang pagpasaylo apan niining puntoha, ako moingon, angayan lang lang nga naay patagmon.

Ambot lang!

*Napatik sa Panguil Bay Monitor (Ozamiz City), July 28 - august 3, 2008 issue.

Visit also: Third Wave
Contact me: Send Mail
Subscribe in a reader

Tumban Makapi-ang

Matud pa, ang damgo baliktad. Kung nagdamgo ka nga naambongan na ka, bali na - milaksot hinoon ka. Kung magdamgo ka nga nakaihi sa banig, bali na - wala ka nakaihi. Kung magdamgo hinoon ka'g baha, siguradong maka-ihi ka.

Apan naay nindot nga damgo. Kana kunong magdamgo ka nga nalibang, maayo daw na nga tilimad-on kay ang ta[*] nagsimbolo kuno na sa bulawa'g salapi. Sa damgo, kung mas daghan ang migawas, ang kwarta pod kuno nimo mangawas. Kung nagdamgo ka nga nakatunob og "inundok", swerte daw na sa suwertres. Ambot lang ha, pero katohuan-dili baya ning akong gisulti. Ayaw lang mo'g tuo kay wa man sab ta nagdali.

Nakahinumdum lang ko sa usa ka tigmo kaniadto. Bukid sa Malindang, tumban makapi-ang. Ang tubag: ta[*] o hugaw sa tawo.

Nagduda baya gyod ko nga nahimo ang maong tigmo kay kani-adto man gud kasagaran walay kasilyas ang mga tawo. Mao nga kung dili na mapugngan, modagan lang sa kasaginan, pwede sab sa kasagbutan. Apan, matod pa nila, mas hayahay sa kamaisan.

Mao tingali nga daghan ang naglagot sa usa ka advertisement nga nagkanayon, sa bukid walay papel, uy! Unsaon, sumpayan man sab og, ikiskis ang hagunoy, noy!

Mao na nga kung matumban ang "tinapok", mokingking intawon ang tiil. Lalim ba gud nang makatunob ka. Mao na nga ang maong "inundok" nga matumban, makapi-ang.

Kaniadto pa hinoon to. Karon, daghan na baya ang nagtukod ug kasilyas. Naa pa man gani toy gipanghatag nga toilet bowl sa among baryo. Sa ato pa nakakita ang kagamhanan sa maong suliran.

Ang saktong paghipos sa atong hugaw importante baya sab kay aron malayo sab ta sa mga sakit pa. Gani ang dili paghugas sa mga kamot, magdala man ug sakit. Unsa na kaha kung magpasad na ang "inundok". Tugdunan baya na'g mangtas nga lagong nga gusto gyod motungtong sab sa atong ilong.

Bisan pa sa mga kausaban sa atong katilingban, matod pa sa Department of Health (DOH), dili mokubos sa upat ka milyon ka panimalay ang walay kasilyas. Sa Environmental Health Report sa DOH niadtong 2006, sa 16 milyones ka mga panimalay sa tibuok nasud, upat ka milyon niini ang walay kasilyas. Ang upat ka milyon nga panimalay, nagkatag sa mga kabaryuhan, sa kabaybayunan, sa mga dagkong dakbayan ilabi na sa Manila ug Sugbo.

Mao tingali na nga bisan sa kamaayo nga mobansay og mga doktor, nars ug uban pa, sa atong mga kolehiyo ug unibersidad, padayon gihapon nga pi-ang ang ang kinatibuk-ang estado sa panglawas sa mga Filipino. Hinoon daghan man sa atong maayong doktor ug uban pang health professionals nanglangyaw man. Mao nga nga maingon nato gamay pa gihapon ang na-serbisyuhan sa atong mga banggiitang health professionals.

Gani daghan pang mga nagsakit nga mga Filipino ang mamatay na lang nga wala gani mahiling sa doktor. Mao nga aron dili kaayo ta masakitan og aron madat-ugan ang walay pagpakabana sa mga nangatungdanan, ingnon na lang nato nga sila gipaktol o gidautan. Sa ingon niiana, lana sa Biyernes Santo ra ang idapat. Igo na kana aron mabati sa masakiton nga siya gi-atiman.

Dili man sab tingali maayo nga ingnon nato nga ang upat ka milyon ka panimalay nga walay kasilyas mga hugawan. Kay sa tinuod lang, walay tawong gusto sa hugaw nga katilingban. Ambot kung angay bang isulti nga wala nanumbaling ang kaganhanan sa maong dugay na nga suliran. Angayan kaha nga ingnon nato nga tungod kini sa kawad-on ug kakabos mao nga dili na makakalot ang uban aron didto ilubong ang hugaw nga angay hiposon?

Walay bisan usa nga mabasol. Kitang tanan adunay tulubagon niini. Ang managsilingan, adunay tulubagon niini. Ang kagamhanan, adunay tulubagon.

Sa katilingban diin ang bug-at nga hinisgutanan mao ang paglinabayay'g politikanhong hugaw, dili ikatingala nga adunay hugawn'g inundok nga gipanglabay sa karsada; mga pinutos nga nanglutaw sa itom nga estero; ug hugawn'g tinapok nga gipiyestahan sa mga iro ug sa mga nagpaka-iro.

Magdamgo na lang ta uy!

Ambot lang!

*Napatik sa Panguil Bay Monitor (Ozamiz City), April 7 - 13, 2008 issue.

Visit also: Third Wave
Contact me: Send Mail
Subscribe in a reader

Pwera Gaba

Sa pagbisita ni Rodolfo "Jun" Lozada sa Sugbo daghan ang nasagmuyo sa dihang misulti siya atubangan sa mga Sugbuanon nga ang "Archdiocese of Cebu" nahimo na nga "Archdiocese of Malacañang". Nga sa ato pa ang Archdiocese ug ang Cardinal mismo nahimo na nga "itoy-itoy". Nagdudan man gud intawon si Junior nga gipugngan ni Cardinal Ricardo Vidal ang mga kapari-an sa Sugbo nga magmisa atol sa iyang pagbisita sa Sugbo.

Wala baya kuno gidid-i ni Cardinal Vidal ang mga kapari-an.

Pero gibawi man sab dayon ni Junior, matod pa niya, "joke" ra daw tong iyang giingon. Usa lang ba gyod ka pasi-aw? Pag-sure oi, matod pa sa akong pag-umangkon.

"Gabaan siya [Jun Lozada] ana... Kabuotan sa atong Kardinal, siya ra ang nanamastamas." Mao kini ang reaksiyon ni Rep. Pablo Garcia.

Si Nang Felicidad mora'g gikilatan, makapanguros sa gipamulong ni Junior dungan ang pag-ingon og Susmaryosep! ug namugnaw intawon sa dihang nahibaw-n niya nga gidugangan pa ni Leah Navarro ang pagtampalas sa Cardinal.

Pwera gaba lang, kining uban dili nila bantayan ilang gipamulong kung makasakit ba sa ilang isigkatawo.

Hinoon kining gaba depende ra man ni sa pagtoo ba. Kung dili sila motuo'g gaba, aw ilaha sab na. Dili sab angay nga ato silang pugson sa pagpatoo nga tinuod ang gaba - gabaan n'ya ta.

Kini kunong ubang mga tiguwang "nagbaligya lang sab kuno sa ilang gaba". Nahisgutan man gud kay naa man gud mi tiguwang nga silingan dinhi sa Mandaue nga magsige ug tagbo-tagbo sa iyang kulukadidang nga drayber sa sikad. Didto pa gyod mag-deyt sa gamay nga plasa sa Mandaue (Centro), atbang gyod sa St. Joseph Church. Susmaryosep!, matod pa sa iyang igsoon nga tiguwang na sab. Kinsa pod uroy mopalit og gaba?

Ikaw, bai Clarence mopalit ka? Naay discount. He.He.He

Kining mga amahan ug inahan grabe kuno makagaba. Mao na nga daghan gyo'ng mga anak nga magbinuotan ug dili mosukol sa ginikanan. Mag-ayo nga gabaan. Si bai Ramses buotan man to, mahadlok tingali to siya'g gaba sa? Hinoon si bai Ramses bisan sige to'g pasi-ugda sa mga tinuod nga botbot, buotan gyod to - may gaba o wala.

Maunsa diay ta kung gabaan ta?

Ingon nila, kung mag-usik-usik ka sa pagkaon magabaan daw ka. Ug ang gaba - mahimo kang baboy. Hala kahadlok. Istorya ra man hinoon na. Tingali kung butangbutangan ka sa ang imong isigkatawo magabaan ka; ug ang gaba, butangbutangan sab ka. Way sukod sa balos ba.

Mura naglibog na man hinoon ko. Basta matod pa sa akong Lola, "ang gaba dili magsaba".

Matod pa sa akong uyu-an nga mangtas, dili gyod magbinuang sa "chicks" kay makagaba gyod na. Ang "cats" makagaba baya sab.

Ang dili nako malimtan mao ang gisulti sa akong amigo.

Nangutana siya. Nganong niwang man ka bai? Ambot lagi bai, kusog man unta ko mokaon.

Hala bai, mao tingaling niwang ka kay gigabaan ka sa pagkaon, dayong katawa. Aw, mikatawa sab ko. Misakit among tiyan ug kinatawa. (Gigabaan)

Pwera gaba tong amigoha.

Ambot lang!

Visit also: Third Wave
Contact me: Send Mail
Subscribe in a reader

What's your flavor?

Strawberry!

Kaniadto ang condom magsinaw ra man ug manimaho lang goma. Ang uban bahong batong. Pero kuwidaw, kay karon naa nay lain-lain nga "flavor" ang condom nga baligya sa merkado.

Kung mogamit ko anang butanga, strawberry ang akong pilion nga flavor. Apan kay dili man, wa na koy labot unsa nga flavor ilang gibaligya. Aw, bisan unsa gud - depende man na sa sabot. Naa bitaw na sa TV Ad diin gipakita nga ang lalaki ug babaye mipili sa flavor sa comdom nga ilang paliton. Saludo gyod ko sa copywriters, sa director ug sa tanan nga responsable sa paghimo sa maong TV Ad.

Maayo na lang wala ko nahimong copywriter kay kung ako tingali ang nagsulat, basin maghikog ang mga miyembro sa giingong "Pro-Life" groups sa kasuko. Gani karon nga dili ra kaayo bug-at ang mensahe sa mga condom ads, buot man sa mga "Pro-Life" groups ug labi na gyod sa simbahang Katoliko nga tangtangon ang maong mga "ads" ug dili na ipagawas. Ang katarongan mao nga tungod kuno sa mga "condom ads" mosamot nga ma-enganyo ang mga batan-on labi na gyod ang tinedyer nga makighilawas bisan dili pa unta angay.

Kaniadto nga wala pay condom, uso na man gyod ang pakighilawas ba. Dili na lang na lalison "pader" kay mao man na ang tinuod. (Binutbot ra ning akoa ha. Hehehe)

Kining pagbaligya ug condom dako man sab ni nga negosyo ba. Kung usa lang unta ang naghimo ug nagbaligya og condom sa Pilipinas, dili na unta kaayo gikinahanglan ang "advertisement". Apan lagi sa ngalan sa negosyo ug sa "competition" mao nga makita nato ang nagkadaiyang "advertisement" sa condom. Naa man gud tay giingon nga "when the business is good, it pays to advertise; when the business is bad, we must advertise; but remember, advertisement is not a panacea of ailing business."

Apan matod pa sa lider sa tropang mangtas nga tua karon sa kaulohan, "when your partner seems safe, it pays to protect; when your partner is questionable, you must protect; but remember, protection is not always better than cure!".

Ambot lang kay inengles man na, basta mao na ang prinsipyo sa tropang mangtas.

Lisod baya gyod ni himoon ang advertisement sa condom. Kung ang produkto shampoo batok sa kaspa, pwede man nato ipakita nga usa ka babayeng gwapa nga hilabihan ka-kaspahon, pwede man nato ipakita sa advertisement nga naligo siya, unya migamit sa shampoo. Pagkahuman, ipakita nga nahanaw ang iyang kaspa. Sayon sa?

Kung ang atong produkto, condom, hala unsaon man? Dili pod maayo nga ipakita ang tinuod. Pwede tingali nga mogamit ug mga butang nga duol sa tinuod - sama sa saging. Pwede ta mogamit ug saging, unya ipasul-ob ang condom para mapakita unsaon paggamit niini. Pwede kaayo! Pero nasulayon na baya ni sa Estados Unidos ug mi-angal ang naa sa banana industry. Bitaw sab, prutas baya na nga sustansiyado ug lami-an kaayo unya himoon lang 'dummy' sa goma. Dili tinood maayo.

Unsa kaha no kung talong atong gamiton? Aw, sigurado nga moangal ang mga negosyante'g talong. Kung ampalaya na lang kaha? Hala, kapait!

Anga mga tig-gama ug tig-baligya og comdom aduna sab baya na silay katungod nga mo-promote sa ilang baligya. Kini bitaw'ng baligya nga bingka sa Mandaue, isinggit man gyod sa tindera, "palit na Dong, lami kaayo". Mao na nga halin kaayo ang bingka. Mao ra sab na sa condom.

Mao na 'pader' nga dili na lang nato sila pugngan. Motabang na lang ta ug pasabot pinaagi sa simbahan ug sa tulunghaang (Katoliko) unsa ang linugdanangan niianang paggamit sa condom.

Kung ang pangutana, sala ba o dili ang paggamit sa condom? Wala na koy ikatubag niina. Apan alang sa tropang mangtas, mas sala ang 'manggamit"!

Saksi ko nga si Bai Danny dunay dalang condom, 24 Oras! Matod pa sa amigo nako nga hapit na magpatakod sa tropang mangtas, "hindi namin kayo tatantanan!" Kining akoa, estorya ra man ni - walay sagol nga bakak (botbot ra), way gidapigan (kuno), way gi-protektahan (sigurado?), serbisyong tinuoray lamang! Kinsa ra man gud ang magtinabangay kundili kitang magkapamilya.

Ambot lang!

PS: Sunod na lang nato tukion ang sekreto sa tropang mangtas. Aw, available diay "upon request! AMBOT LANG!

Visit also: Third Wave
Contact me: Send Mail
Subscribe in a reader


*Napatik sa Panguil Bay Monitor (Ozamiz City), January 28 - February 3, 2008 issue.

Kaminyoon

Ang kaminyoon dili sama sa pagkaon nga pwedeng iluwa kung mapaso, tambag sa mga katigulangan. Kinsa bay nag-ingon nga dili na mauli ang asawa? Kulataha di ba mouli na - dili na kinahanglang i-uli. Mas daghan man asawa ang miuli kaysa giuli.

Matod pa sa nanggungis na ang pasiaw bahin sa kaminyoon, ang asawa sama na lang sa sardinas, ablihan lang kung wa nay lain. Ang asawa mura'g ligid, bombahan lang kung mahiyos. Ang bana mura'g iro, mo-uwang lang kung manguwag. Apan ang kaminyoon dili lang pakighilawas. Mao nga magkadugay, ang asawa ug bana mura na la'g igsoon.

Kining kaminyoon man gud usa ka dakong kabu-ang - tam-is sa sinugdanan, magkaaslom kung mapasagdan. Gidugang sa usa ka wa nagpaila nga bana, ang asawa mao ang nilalang nga ikauban mo sa tibuok kinabuhi nga magdala ug magmugna ug kasamok nga dili unta nimo masinati kung nagpabiling kang ulitawo. Gusto pa ka magminyo?

Pila bay magasto sa kaminyoon? Dili maihap pila kay mogasto man ka hangtod sa hangtod.

Daghan ang nagminyo tungod sa gugma, apan daghan sab ang nagminyo tungod sa kwarta. Usa bay mas importante, ang gugma o ang kuwarta. Mas nindot gyod kung naa ang duha.

Kuwarta ang nag-unang hinungdan sa panag-away sa magti-ayon. Dili tinood nga bahala'g saging basta loving! Mahal na kaayo ang saging.

Swerte kuno kung magminyo sa 2008. Apan ang tinood dimalas ka kung magminyo ka sa bisan unsang tuiga.

Kaniadto magpakasal ang lalake ug babaye kung dako ang buwan. Karon, magpakasal kung modako ang tiyan.

Walay perpekto nga kasal. Kung engrande ang kasal daghang makita nga "apan". Kung simple nga kasal, daghan ang makasaway. Kung walay kasal, daghan ang magbagutbot. Nagpasabot nga ang kamiyoon dili paraiso - ang kaminyoon usa ka sakripisyo.

Huna-hunaa sa makadaghan sa dili ka pa magminyo. Timan-i baya nga ang kaminyoon sama sa pagkaon. Matuk-an gyod ka kung dili nimo usapon.

Ambot lang!

Visit also: Third Wave
Contact me: Send Mail
Subscribe in a reader


*Napatik sa Panguil Bay Monitor (Ozamiz City), January 14 - 20, 2008 issue.

Pasaway

Buena mano nako nga post sa 2008 mao ang listahan sa mga pasaway sa 2007. Naa man gug tay giigon nga mas dali man makita sayop mao nga mas lutaw gyod ang mga pasaway kaysa kadtong nakabuhat ug matarong.

Una sa listahan sa mga pasaway sa Pilipinas sa tuig 2007 mao ang mga Abu Sayyaf bandits and Moro Islamic Liberation Front (MILF) guerrillas kinsa mipatay sa 14 ka mga Marines didto sa Albarka (formerly Tipo-tipo), Basilan. Mga pasaway gyod kay tiaw mo bang gigulgul man nila ang liog sa 10 ka Marines. Kining mga Abu Sayyaf bandits and Moro Islamic Liberation Front (MILF) guerrillas nga nagbuhat sa ingon maayong bunatan ug ikog sa pagi ug paludhon sa asin nga sinagulan ug vetsin. Ambot lang!

Ikaduha sa listahan si Antonio Tillanes nga napili isip Senador sa nasod niadtong eleksiyon sa Mayo 2007. Naunsa man tong tawhana nga mikalit man lang ug ilog sa eksena. Mi-walk-out gikan sa korte ug mi-martsa sa kadalanan sa Makati ug miukopa sa Manila Peninsula Hotel. Luoy baya sab kay wa intawon siya suportahi sa kinabag-an sumala sa iyang gilauman pero sa iyang gihimo, nahilandig hinoon siya sa listahan sa pasaway sa 2007.

Ikatulo sa listahan mao si Malou Fernadez nga mibuhi ug hait nga mga pulong sa mga OFW. Daghan gyod kaayo ang nasuko niya. Asa na kaha si Malou no? Basin mipalit ug pahumot. Ambot lang!

Ikaupat nga pasaway mao ang presidente sa Pilipinas - si Gloria Macapagal Arroyo. Para nako dili pa man gud angay hatagan ug "pardon" si kanhi presidente Joseph Estrada kinsa napamatud-an sa korte nga nangawkaw , nanghabas ug dako nga salapi. Para kang presidente Gloria, usa ka pino nga lunit sa kilid lamang ang angay. Ayaw na ug pasaway ha? Kay layo pa ang 2010.

Ang ikalima sa listahan mao si Manny Pacquiao sa dihang midagan siya isip kongresista sa miaging eleksiyon (Mayo 2007). Hinoon katungod pod baya niya nga modagan pero kahibalo na man gyod unta siya nga gihulhugan lang siya sa mga nagpalibot niya mao nga pasaway gihapon tong iyang gibuhat.

Ang pinaka-pasaway sa 2007 dili lang nako ilista kay personal man. Ako ra man ang naapektahan - ako lang ang nasakitan. Pero kung iya ning mabasa, nakabalo na siya kung kinsa siya. Kay nasayod siya nga may kasing-kasing siyang gisamaran. Unsa na ni oi!

Ambot lang!

Visit also: Third Wave
Contact me: Send Mail
Subscribe in a reader


*Napatik sa Panguil Bay Monitor (Ozamiz City), January 21 - 27, 2008 issue.

Radyo Baktas: Nagpabiling Number 1 sa Kapupud-an

Nagtubo ko nga kanunay magpaminaw sa radyo ug nadala nako kini hangtod karon nga mas popular na kaayo ang telebisyon. Kanunay gyod ko'ng maminaw sa number 1 nga estasyon sa radyo. Matag buntag, moingon dayon tong "announcer" ("broadcaster" ang haum nga tawag kanila), "nagpaminaw kamo sa DXPR, ang nag-unang estasyon sa dakbayan" Bisan walay survey-survey, klaro man nga halos tanan naminaw sa DXPR.

Karon nga nagkadaghan na ang radyo, nagkadaghan na sab ang number 1. Wa pa ko kadungog usa ka estasyon sa radyo nga miingon nga sila ang number 2. Mao man sab sa telebisyon. Sumala pa sa ABS-CBN, sila ang number 1, kung sa GMA sab ta motan-aw, number 1 sab kuno sila. Ngilgiga gud!

Aw, didto hinoon sa amoa, ABS-CBN gyod ang number 1 kay wa may lain - bisan pa'g patas-an pag-ayo ang antennae hanap man ang GMA unya black and white ang RPN. Mao na nga dili ka mahibulong nga naay wala intawon nakahibalo nga naa diay salida nga "Mga Mata ni Angelita" ug nga karon naa na ang "La Vendetta", kay mas pamilyar man ang "Super Inggo" ug ang "Maging Sino Ka Man". Ambot lang!

Unsa man gyod si batang buotan, kapamilya ba o kapuso? Ako na lang gyod ning tubagon:

Mao ra ni ang akong masulti. Dili ko matawag nga kapuso, dili sab ko matawag nga kapamilya. Basta ako, panig sa katotohanan, panig sa bayan; walang kinikilingan, serbisyong totoo lamang! Kailangan pa bang i-memorize yan? Ay, pwede! Ambot lang oi, kay bisan unsaon katong didto pa ko sa Mindanao hangtod nga diri na ko sa Sugbo, basta disco, Wild FM man gyod ko!

Kagabii, nahimuot ko sa gibalita sa ABS-CBN bahin sa ilang alegasyon nga gimani-ubra kuno ang resulta sa gihimong survey sa Bacolod ug ang kaatbang nga GMA maoy gitumbok nga nagpaluyo niini. Oi, bug-at na nga pasangil (pasingit?) da! Natapos na man ang "TV Patrol World" mao nga akong gibalhin sa "24 Oras". Gibalita sab sa GMA ang bahin sa maong alegasyon, tubag ba sa balita sa pikas.

Hala naunsa na man ni oi! Na hala, kamong naa sa media - ABS-CBN ug GMA, sulbara na ninyo. Ayaw na mi'g apila ana. Pagsabot lang gud mo. Kay sa tinood lang walay baya'y usa ninyo nga number 1, kay ang tinuod nga number sa kapupud-an gikan kaniadto hangtod karon mao pa gihapon ang "Radyo Baktas"!

Basin mahibulong mo ha, ang radyo baktas, dili baya na kauban sa Radyo Agong, sa Bombo Radyo, sa Super Radio, Radio Fuerza ug Radyo Kampana. Labaw na nga way nay labot sa Kapamilya, Kapuso, Ka-Q, ug Kabarkada.

Ang radyo baktas mao ang mga inday ug dodong nga way hunong sa pagkalap sa tsismis, nabantayan, ug nadunggan sa bisan asang lugar, sa bisan unsang orasa. Ang mga radyo baktas dili gyod mahutdan ug balita - kanunay "lab-as" ug "nagbaga" nga opinyon. Naa gyod silay ikasulti bahin sa pagmahal sa palaliton, hangtod ang pagtab-ang sa relasyon sa mga nagkahigugmaay'ng artista. Ug siyempre pa, dili mawala ang public service! Dili ba ang radyo baktas man ang kugi kaayong mohatod ug tsismis kung naay way bana nga nabuntis?

Apan ang labaw gyod sa tanan kay mapainubsanon ang radyo baktas, dili gyod moingon nga sila ang number one!

Istorbot ra ning ako ha. Istoryang botbot!

Ambot lang!

Contact me: Send Mail
Subscribe in a reader


*Napatik sa Panguil Bay Monitor (Ozamiz City), January 7 - 13, 2008 issue.

Reklamo pa Day!

Unsa kaha kung mahanaw na ang tanang babaye? Hala, kahadlok ana. Aw, kung walay babaye, wa na gyoy sabaan. Walay magsige ug reklamo.

Daghan gyod sa mga kaliwat ni Eba ang grabe ra ka reklamador. Wa gyod tay kapaingnan. Kung walay ulan, moreklamo kay init ra kaayo. Kung magbagyo, magyawyaw kay dili mauga ang medyas ug malapok ang sandals.

Usahay makalibog (apan malingaw ra sab usahay) ikauban ang babaye. Dili masukod kung unsa gyo'y gusto. Gusto muadto sa SM pero magmug-ot kung kapoyon na ug baktas sa mall. Unsaon, mopalit lang og medyas, molakbit man ug pili ug panyo, shades, pitaka, ug blouse. Kung mopili ug bisti, panghikapon pa gyod bisan ang sidsid, ang tahi, ang butones, ug isukod hasta pila ka beses. Tulo na lang ka oras ang molabay, wa pa gyod intawo'y mapalit. Ambot ngano sab ni sila nga kung mopili ug palitonon hasta mang dugaya.

Naa baya poy reklamo ang mga babaye nga angay sab nga dunggon sa hingtungdan. Sama pananglit sa ilang reklamo sa domestic violence. Mao bitaw gihimuan na ug balaod pero reklamo gihapon kay wa kuno napatuman ang balaod. Magyawyaw sab na sila ug gender sensitivity issues. Ug labi na gyod nga magyawyaw sa DJ nga kalandrakas ang iningles, dili pa mao ang enunciation. Lahi man gyod daw ang red ug rid. Sakto baya pod siya.

Hinoon lahi-lahi ang mga babaye, pero kadaghanan ganahan ingnon nga seksi (malipay sa tago) pero pasuko-suko kay "yaga-yaga" kuno. Mao na para walay reklamo dili na lang ko mosulti nga seksi ang akong Angel, ako na lang ipaagi sa akong mga mata ang akong mensahe nga seksi siya. Usa pa lisod sab ni sungagon ang babaye kay makig-debate unya ug inengles, luoy intawon ang lalakeng buotan, "okay ug yes" ra gyod ang masulting inengles. Pait ning makiglambigit sa babayeng call center agent!

Niay reklamo sa akong Angel nga magkatawa ko. Gibati siya nga kinahanglan na "magpagawas" human mi nangaon. Aw, wa may problema kay naa may restroom (mas nindot ang restroom kay sa kasilyas?) ang SM. Reklamo na sab kay lainan daw siya sa mogamit sa public toilet (mas nindot gihapon paminawon kay sa pampublikong kasilyas?). Hala, unya madala pa ug pugong? Dili na gyod kuno.

Kining buotan ta, di ba, mosugyot gyod ta unsay maayo. Alternatives ba, dili ba Bai Ramses?

Misugyot ko nga manggawas na lang mi sa SM unya mag-taxi aron madali kay moadto mi sa labing duol ug labing hinlo nga pension house kay aron intawon mogawas na ang anagay ipagawas. Bahala mogasto aron lang gyod dili siya moreklamo. Inay pagdayeg sa ang akong maangkon sa bulawanon kung sugyot, upat ka kusnot hinoon ang nadawat, ug yawyaw na sab! Wa na lang ko moreklamo. Dautan diay 'to? Dili na gyod ko magtingog. Di man sab makatingog.

Misalop ang adlaw puno sa reklamo. Hinoon dili na kadto bag-o kay sukad pa sauna, naa na ang reklamo. Halos tanan nakong nakaila nga babaye, reklamador man. Sa amo pa lang pagkaila, mi-reklamo na siya.

Iuli ko na lang kaha kining bayhana sa naglalang kaniya?

Mingaw man sab. Hinoon nakaingon sab ko nga maayo pa ang computer kay wa pay reklamo. Malingaw baya sab ta sa computer, pero dili man makaon ang computer. Hahay, kan-on na lang nako ang reklamo oi!

Sige na lang, dili na lang ko mo-reklamo. Hinaut unta nga dili niya ni mobasa kay dakong reklamo na sab. Maayo na lang ang mga "Englisera" dili ganahan mobasa ug Binisaya (kay lisod sabton?).

Ambot lang!

Visit also: Third Wave
Contact me: Send Mail
Subscribe in a reader


*Napatik sa Panguil Bay Monitor (Ozamiz City), December 10 - 16, 2007 issue.

Unsay akong gusto?

Daghan. Gusto nakong ma-writer, ma-embalmer, ma-father, mag-travel (sa Batanes, El Nido, Bali, Phuket, Trenchtown, London, Las Vegas, Dubai, Shanghai, Tokyo). Hala, grabe! Gusto sab nako matulog, mokaon. Basta, daghan ko'g gusto.

Aw, ang pangutana diay, unsay akong gusto madawat karong pasko? Daghan sab. Gusto nako makadawat ko ug christmas card gikan kang (dili lang nako nganlan kay basin mapugos siya paghatag), gusto sab nako makadawat ug kiss gikan kang (dili lang gihapon nako nganlan). Ambisyoso gyod kaayo ko. Usahay magdamgo og mga butang nga imposible apan posible mahitabo.

I feel pressured! Unsa kuno? Iningles man to. Bitaw nabati na nako ang pressure kay pila na lang ka adlaw Christmas party na ug hangtud karon wala pa ko naka-post sa akong wish para sa pasko. Kinahanglan nga maka-post na ko sa among company forum para makita sa nakahulbot sa akong ngalan.

Sa pag-browse nako sa forum, nakita nako ang wishlist sa uban; flash drive, coffee maker, CD, bisan unsa na lang. Unsa may akong gusto? Wa gyod koy mahunahunaan.

Nakahinomdun lang ko sa "Pinaka" nga programa ni Pia Guanio sa QTV. Sumala pa, mao kuno kini ang pinakagasgas nga regalo sa pasko:

• mug/tumbler
• planner
• picture frame
• figurine
• soap
• fruitcake
• scented candle
• ballpen/pen
• towel
• calendar (desk/wall)

Kasagaran mao bitaw pod ang ipanghatag ug madawat sa pasko. Sa listahan ang akong nadawat, kalendaryo, tu-alya, ballpen, sabon, figurine, sabon, picture frame, ug mug. Wala pay mihatag nako ug fruitcake. Ang kiss ug christmas card wala gyod sa listahan sa? Nagpasabot nga dili gasgas ang kiss. (Bisan sige na lang. Ahem!)

Unsa man gyod akong gusto? Wala pa koy mahunahunaan.

Gugma lang ang akong gusto karong pasko. Kalisod!

Ambot lang!

Subscribe in a reader

Pahimusli, Bai!

Naa kay uyab? Pahimusli bai!

Ayaw lang laina pagsabot ang akong giingon ha. Tambag ra man na nako sa mga lalaki nga naay uyab. Angay man gyod pahimuslan, di ba? Ang buot ipasabot niini, dili angay usikan ang kahigayunan nga kamo nagkahigugmaay. Dili angay usikan ang relasyon sa way hinungdan nga lalis ug walay kapasikarang mga selos o pangabubho. Ahem!

Pahimusli ang imong kabatan-on.

Ang tambag ni Titov,

pahimusli gyod ang inyong kabatan-on. Mao ni ang akong tambag ninyo. Mao man sab ni ang tambag sa akong mga magulang kaniadto.

Gidugang niya nga ang hustong hubad sa maong tambag mao nga,

gamiton sa mga batan-on ang kalig-on pa sa ilang lawas ug kalagsik sa ilang hunahuna diha sa pagbuhat og mga maayo aron sa ngadtongadto mahimo kining birtud ug dili bisyo ang magpuyo sa kasingkasing.

Nahinuklog gyod ko sa maong tambag ni Titov. Naigo gyod ba kay gilain ko man pagsabot ang maong linya kaniadto, abi ko ba'g ang pagpahimulos sa kabatan-on mao ang inom, paaso ug druga, ug gimok sa unod! Makauuwaw kay pagkamabaw diay sa akong salabutan.

Pahimusli ang imong kaalam ug kaantigo.

Matag usa adunay igong kaalam ug katakos. Pahimusli kini. Gamita sa minaayong paagi ug alang sa kaayohan. Naa koy mga amigo nga mga "hackers". Abilidad baya ning "hacking". Pwede man na magamit sa maayo nga paagi. Di ba duna may gitawag nga ethical hacking? Mao nga kung ikaw, usa ka "geek" na hala, pahimusli!

Ang uban maayo mo-desinyo, naay maayo mo-suwat, naay maayo mo-awit, naay maayo mo-diskarte - unsa pa man ang anaa kanimo, pahimusli kini. Ayaw lang gamita ang imong kaantigo sa pagpalusot sa mga licensure examinations ug uban pa nga mga examinations, ayaw lang gamita ang imong katakos sa pagpanikas ug pamintaha sa uban.

Pahimulos gyod!

Ang pagpahimulos dili dautan; ang pag-abuso mao ang makadaot. Pahimusli ang gasa sa kinaiyahan apan likayi nga abusohan kini. Pahimusli ang imong pagka-ikaw apan likayi ang paghimo sa butang nga magtukmod sa kaalautan.

Gamay ra gyod ang akong napahimuslan apan daghan na ang nakapahimulos kanako. Ahem! Ayaw lang laina pagsabot aron 'di maggubot.

Ambot lang!


Subscribe in a reader

Ang Suba sa Rubicon

(Cebu, Philippines - November 29, 2007)

Veni, vidi, vici.

Ang Suba sa Rubicon mao ang karaang utlanan sa Roma ug Italya. Hugtanong nagdili ang karaang balaod sa Roma sa bisan si kinsang Heneral nga Romano uban sa iyang mga sundalo sa pagtabok sa maong suba ug pagsulod sa Italya. Ang pagbuhat sa ingon giisip nga pagtraydor sa nasod. Niadtong 49 BC, gitabok ni Julius Caesar ang Suba sa Rubicon (a point of no return!). Usa kadto ka dakong sugal.

Milampos siya. Veni, vidi, vici. (I came, I saw, I conqured.) Matod pa ni Julius Caesar.

Karong adlawa, maisogong gitadlas ni Sen. Antonio Trillanes IV (and Army Brig. Gen. Danilo Lim) ang "suba". Makatabok kaha siya nga malampuson? Dili kaha siya malumos sa sulog? Iya kahang mabungat ang Veni, vidi, vici?

Si Trillanes nga giakusahan nga maoy nag-ulo sa rebelyon niadtong Hulyo 2003 migawas (read as: walk-out) gikan sa husay sa korte (sa maong kaso) ug mitadlas sa dalan sa Makati samtang nanawagan nga mokanaog na sa iyang pwesto si Presidente Gloria Macapagal Arroyo. Miuban kang Trillianes ang iyang mga sundalo sa pagtabok sa "suba". Apan angayan ba siyang kuyugan sa panon sa katawhan?

Sama sa gihimo ni Julius Caesar, daghan ang nakurat, daghan ang nakalitan. Dunay nagduda, dunay misuporta. Dunay pipila ang nangyam-id. Ang gihimo ba ni Trillanes alang sa nasod ug sa katawhang Filipino o iya kining paagi aron malingkawas sa iyang kaso. Nasihag kaha sa katawhan ang iyang tinuod nga motibo?

Makabalik pa kaha siya (Trillanes) sa iyang pagtabok sa "point of no return"? Mabaling kaha niya ang simpatiya sa tawo o mawala ang respeto sa katawhan kaniya?

Apan dako ang kalainan sa kaso ni Trillianes ug sa kaso ni Julius Caesar. Si Julius Caesar gipaluyuhan sa iyang mga sundalo ug nakaangkon og suporta ug simpatiya. Si Trillianes aduna nay bu-ak nga kridibilidad ug maihap lang ang miuban kaniya. Maklaro na ang mantsa sa motibo ni Trillianes.

Kalooy ni Trillanes kay wala niya ang alas (ang suporta sa katawhan). Sayang si Trillanes kay iyang gipakita ang iyang kahuyang. Iyang gipakita ang pagtampalas sa korte ug sa iyang gihuptan nga posisyon isip Senador. Sa iyang agtabok sa "suba", nawala ang iyang kahalangdon. Nawala ang respeto ko kaniya.

Para ba gyod sa katawhan ang gibuhat ni Trillianes? Naa koy duda. Gusto niyang hugnoon ang gobyerno aron sa kaulahi-an siya ang mangulo ug mabalewala ang iyang sala sa estado - ang rebelyon? Sayang kay nasabtan sa katawhan ang iyang motibo ug salamat kay wala ug dili siya molampos.

Updated: November 30, 2007

Postscript:
Wala milampos si Trillanes. Wala misuporta ang katawhan kaniya. Walay mitubag sa iyang panawagan. After all, it was just another adventure of a boneless creature.

Ambot lang!

Subscribe in a reader