Aw, namasin man lang sab ko ba nga maapil ang akong ngalan.
Pero ang tinuod bisan pa'g mopagawas ang Forbes Asia magazine sa listahan sa napulo ka milyon nga pina-kaadunahan nga Filipino, dili gyod ko maapil ang akong ngalan. Tingali kung naa nay listahan sa 90 milyones nga pinakadato sa Pilipinas, aw, maingon gyod nako nga maapil na gyod ko.
Matod pa sa Forbes Asia magazine, si Henry Sy ang nag-una sa listahan kinsa ang salapi ug kabtangan (net worth) mukabat sa $3.1 billion. Gisundan kini ni Lucio Tan, $1.5 billion.
Anaa sab sa listahan sila Jaime Zobel de Ayala, Andrew Tan, Tony Tancaktiong, John Gokongwei Jr., Eduardo Cojuangco Jr., Enrique Razon Jr., George Ty, ug si Senate President Manuel Villar.
Sa mga wala pa makasulay nga mahimong pinaka-adunahan, dili gyod makasulti kung unsa kaharuhay ug kung unsa kalisod ang manginabuhi nga dagha'g salapi.
Duna baya koy amigo kaniadto nga nakadaug ug 80 milyones ka pesos sa lotto.
Matod pa niya dili lalim ang iyang gibating kalipay ug kaguol. Kinsa bay dili malipay kung makagunit nianang kantidara.
Pila na kaha ka sakong bugas (kanang NFA ba) mapalit ana sa? Pila na kaha ka kahon nga buwad ang makonpra ana sa Tabo-an?
Pero kung si Dodong tigasin ang mangutana, pila na kaha kahon nga serbisa ang mapalit anang kwartaha.
Aw, mao man gyod na ba, kung malipay, motagay man gyod ning Pinoy. Kung maguol, tagay sab. Kung laayon tagay gihapon. Kung walay kuwarta, mangita gyod og tagay.
Ang gikagul-an sa akong amigo'ng mikalit pagka-milyonaryo mao kung unsaon niya pag-gasto ang minilyon nga salapi. Ang sugyot sa taga Lapu-Lapu ug Mandaue, mupalit siya'g decorative lamp, katong mahal kaayo ba ug iyang ipa-ugbok sa iyang mansiyon sa Pasil. Pero dili man ganahan akong amigo'ng milyonaryo.
Mubiyahe kaha siya sa Moscow dala ang dakong salapi? Unya'g madakpan siya sa airport. Maayo unta'g PNP general siya.
Dili gud. Iya na lang ba kahang ibayad sa insurance, bulahan mamatay siya, makadawat siya'g milyones? Unya'g mosira ang kompaniya sa insurance.
Nakahunahuna kuno siya nga ibakos ang iyang kwarta apan naguol sab siya kay basin ma-hold-up siya sa Sanciangco'g Colon.
Apan ang labaw niyang gikagul-an mao nga kung unsaon niya pagbahi-bahin nga matagaan ug balato ang tanang kaparyentihan.
Matod pa niya nga kung kaniadto kan-on ug buwad ang iyang kalipay ug kung unsay ipasunod ang iyang ikaguol, sa dihang milyonaryo na akong amigo, wa na siya'y gana magsud-ong sa mahalong pagkaon ug maguol na siya basin pagka-ugma, usa na ka truck ang mumhong mabilin.
Problema sab diay kung mokalit ta'g kadato.
Maayo na lang kay nakatulog ang akong amigo ug sa pagmata niya iya na lang nahibaw-an nga damgo lang ang tanan.
Ang pinaka-kabus sa katilingban malipay na lang kung naay makaon katulo sa usa ka adlaw. Apan ang mga adunahan, wa ta masayod kung unsa sab ang ilang kalipay.
Magdamgo na lang sab kaha ko sa?
Ambot lang!
Visit also: Third Wave
Subscribe in a reader 
7 comments:
pag ka aninduta pag ka han ay sa istorya dah nakatawa lang ko kay damgo lang diay ang tanan hehehe pero tinuod bitaw pon na bai.. lisod mokalit ta og kadatu kay daghan na ang mag interes sa imong kinabuhi... mao lang to bai hehe
maayo sab nga paghuna2. dako imong punto nga magkalisod gayud ang pobre kung mahikalit siya'g pagkadato. apan migo ang kalipay dili mapalit sa salapi. ang tinood nga kalipay mao ang pagka kontento kung unsay anaa kanimo. ahahaha mao ba? ambot lng. tsk2.
Bitaw. Ang pagkupot og dakong kantidad sa salapi mag-agad sa kaantigohang pinansyal. Ang pobre nga mokalit la'g kadato maglisod sa pagdumala sa iyang kuwarta. Delikado sab nga tontohon lang sa iyang financial advisers. Hurot!
i swear ikaw talaga idol ko pagdating sa pagsulat ng bisaya. very fluent. nangungumusta...
lageh,, lisud bya jud na kalit lng ta og kadatu. la ta kblo kung unsaon nato pag.gasto ang kwarta.. hehehei. nice blog huh,
lageh,, lisud bya jud na kalit lng ta og kadatu. la ta kblo kung unsaon nato pag.gasto ang kwarta.. hehehei. nice blog huh,
para sa ako gratulation aning mga gesuwerte...piro daghan man klasse na nadato ang tawo,,ang pagka kugihan imubanan sa maayong paggamit sa kwarta....ug kadtong kalit lang nadato kay corrapot...
Post a Comment