Karon nga nagkadaghan na ang radyo, nagkadaghan na sab ang number 1. Wa pa ko kadungog usa ka estasyon sa radyo nga miingon nga sila ang number 2. Mao man sab sa telebisyon. Sumala pa sa ABS-CBN, sila ang number 1, kung sa GMA sab ta motan-aw, number 1 sab kuno sila. Ngilgiga gud!
Aw, didto hinoon sa amoa, ABS-CBN gyod ang number 1 kay wa may lain - bisan pa'g patas-an pag-ayo ang antennae hanap man ang GMA unya black and white ang RPN. Mao na nga dili ka mahibulong nga naay wala intawon nakahibalo nga naa diay salida nga "Mga Mata ni Angelita" ug nga karon naa na ang "La Vendetta", kay mas pamilyar man ang "Super Inggo" ug ang "Maging Sino Ka Man". Ambot lang!
Unsa man gyod si batang buotan, kapamilya ba o kapuso? Ako na lang gyod ning tubagon:
Mao ra ni ang akong masulti. Dili ko matawag nga kapuso, dili sab ko matawag nga kapamilya. Basta ako, panig sa katotohanan, panig sa bayan; walang kinikilingan, serbisyong totoo lamang! Kailangan pa bang i-memorize yan? Ay, pwede! Ambot lang oi, kay bisan unsaon katong didto pa ko sa Mindanao hangtod nga diri na ko sa Sugbo, basta disco, Wild FM man gyod ko!
Kagabii, nahimuot ko sa gibalita sa ABS-CBN bahin sa ilang alegasyon nga gimani-ubra kuno ang resulta sa gihimong survey sa Bacolod ug ang kaatbang nga GMA maoy gitumbok nga nagpaluyo niini. Oi, bug-at na nga pasangil (pasingit?) da! Natapos na man ang "TV Patrol World" mao nga akong gibalhin sa "24 Oras". Gibalita sab sa GMA ang bahin sa maong alegasyon, tubag ba sa balita sa pikas.
Hala naunsa na man ni oi! Na hala, kamong naa sa media - ABS-CBN ug GMA, sulbara na ninyo. Ayaw na mi'g apila ana. Pagsabot lang gud mo. Kay sa tinood lang walay baya'y usa ninyo nga number 1, kay ang tinuod nga number sa kapupud-an gikan kaniadto hangtod karon mao pa gihapon ang "Radyo Baktas"!
Basin mahibulong mo ha, ang radyo baktas, dili baya na kauban sa Radyo Agong, sa Bombo Radyo, sa Super Radio, Radio Fuerza ug Radyo Kampana. Labaw na nga way nay labot sa Kapamilya, Kapuso, Ka-Q, ug Kabarkada.
Ang radyo baktas mao ang mga inday ug dodong nga way hunong sa pagkalap sa tsismis, nabantayan, ug nadunggan sa bisan asang lugar, sa bisan unsang orasa. Ang mga radyo baktas dili gyod mahutdan ug balita - kanunay "lab-as" ug "nagbaga" nga opinyon. Naa gyod silay ikasulti bahin sa pagmahal sa palaliton, hangtod ang pagtab-ang sa relasyon sa mga nagkahigugmaay'ng artista. Ug siyempre pa, dili mawala ang public service! Dili ba ang radyo baktas man ang kugi kaayong mohatod ug tsismis kung naay way bana nga nabuntis?
Apan ang labaw gyod sa tanan kay mapainubsanon ang radyo baktas, dili gyod moingon nga sila ang number one!
Istorbot ra ning ako ha. Istoryang botbot!
Ambot lang!
Contact me: Send Mail
Subscribe in a reader 
*Napatik sa Panguil Bay Monitor (Ozamiz City), January 7 - 13, 2008 issue.
3 comments:
ang gma ug abs cbn nagpasibantog nga tigdugtong sila sa mga grupo nga nagkaaway sama sa administrasyon ug oposisyon, sundalo ug rebelde. silay kunoy tigpasiugda og dayalogo alang sa kalinaw. apan naunsa bang pagkaunsaa nga dili man sila magkaistoryahanay sa usagusag. ang abs-cbn mo-interview unta sa gma o vice versa mahitungod sa mga butang nga ilang gikaawayan. mag-interbyohay unta sila. awaton unta nila kadtong Mindanao-Visayas link broadcast nga giapilan sa mga estasyon sa radyo sa nagkalain-laing kompanya. walay laing tumong- ang pag-alagad sa katawhan nga buot magpawara-wara sa iyang mensahe alang sa ilang mga paryente.
kining nahitabo karon maoy salamin sa kahimtang kon ang mga radyo ug telebisyon ginapanag-iya ug ginadumala sa mga dagkong negosyanti sa pilipinas.
maayo bitaw kaayo tong link broadcast kay dako kaayo ang ikatabang niadto sa pagpaabot sa impormasyon. ang provincial press tan-aw nako, suod man pero kining abs ug gma, mura'g iring ug iro, palawanay lang sa ilang botbot..sabot sabot lang gud unta..
kining isyu sa ownership mao sab ang usa ka dako nga talan-awon. lisod kaayo kung ang usa ka media company gi-control sa higanteng kumpaniya nga adunay nagkalain laing interes.
duna koy nabasa nga artikulo nga nangutana, is manila , a lopez country? unsaon man gud nga naa may interest ang mga lopez sa tubig, koryente, sa media, ug uban pa.. aw, d man na dautan, maayo gani na kay naay negosyo.. pero mao lagi, dili nato mawala ang pagduda nga siyempre molaban gyod ang empleyado sa iyang amo.. ambot lang!
kun sa ilonggo bai, radyo puwak. :)
Post a Comment