Thursday, September 13, 2007

Dili na gyod

Ipadaplin ko una kining paghisgot ug mga butang nga may labot ang lungsod ug mga lungsuranon. Ipadaplin ko una ang paghisgot sa umaabot nga election sa baranggay.Dili sa nako hisgutan ang politika labi na ang may kalabutan kang kanhi presidente Estrada. Ug labaw sa tanan, dili una ko musulat bahin sa mga "corruption" o ang pagpangawkaw sa bahandi sa nasod.

Mopahuway una ko sa paghisgot niiana. Dili sa nako hisgutan ang kabahin sa mga "tong" nga nadawat kuno ni Erap samtang siya nangatungdanan. Never sa gyod nako nga hisgutan ang boracay mansion, ang bongga nga pinuy-anan nga gipalit gamit ang kinawkaw kuno nga salapi. Ako nang gipana sa akong hunahuna ang paggukod sa rehimeng Estrada sa Philippine Daily Inquirer. Dili na gyod nako na hisgutan nga kaniadto hapit na gituok ang mass media. Uy, kalimtan na diay nako ang mga "babaye" sa kinabuhi ni pare ko.

Aw, dili lang pod diay nako hisgutan nga sa kasamtangan administrasyon gipatay ang akong amigo nga media officer sa Kilusang Mambubukid ng Pilipinas usa na ka-tuig ang milabay. Dili sa nako isugilon nga ang akong amigo nga gipatay, isog nga nakigbatok sa reporma sa yuta sa suok nga bahin sa Mindanao ug vocal kaayo sa militarization sa maong dapit. Dili nako ibutyag kung kinsa ang gitumbok nga utok sa maong pagpatay. Dili ko maghisgot ug political killings! Ikapila gani to siya nga biktima sa political killings? Aw, dili na nako hisgutan.

Dili una nako ipadayag nga ang dakong hinungdan sa padayon nga kaguliyang sa Mindanao mao ang kapit-os. Dili nako isugyot nga edukasyon, de-kalidad nga edukasyon ang usa sa makasulbad sa suliran sa katilingban ug dili ang militarisasyon, dili ang gera. Hisgutan ba pod nako ang mga pagpayuhot sa pipila ka tawo sa DepEd, gikan sa pagpangaplay sa mga aplikante ngadto sa pag-doctor sa evaluation results? Hala, dili gyod ko maghisgot ana.

Basta dili na gyod. Dili nako i-mention dinhi ang kalabutan sa ZTE contract ug sa higanteng proyekto nga gitawag ug national broadband network.

Dili ko magpakabana sa mga vigilante nga ngilgnig kung maoy mopatay. Dili na nako hunahunaon nganong dunay mga tawo nga nagtuo nga ang hustisya naa sa ilang mga kamot ug wala sa husgado. Dili ko mangutana, kung ngano kaha?

Dili na gyod ko magpakabana. Dili na ko maghisgot ug pulitika. Dili nako hisgutan ang "red tape" sa gobyerno. Dili ra ba ko taga-Sugbo mao nga dili ko maghisgot sa minilyon nga nakawkaw atol sa pagpalit sa mga suga nga gidayandayan atol sa ASEAN Summit niadtong Enero ning tuiga. Dili ko mag-apil-apil ug hisgot sa pagkadismaya sa mga negosyante sa mayor sa Lapu-Lapu City.

Dili lang gyod ko maghisgot ana.

Dili na gyod.

Dili ug dili na sulod sa usa ka gutlo.

Ambot lang!

5 comments:

Utah Mommy said...

Before you even realize it you're actually talking about it lol!Ikaw gyud batang buutan makatawa kos imong post dah!mura ra na ug kasabihan nga 'DILI NA GYUD KO MUUSAB,KAISA NALANG!' hehehehehe


Oi thanks diay nahan ka sa akong new layout,yeah gikapoy nakog maintain sa classic blogger maong ni convert ko sa Beta blogger.

JGG said...

@Darlene: hehehe.. mao.

Anonymous said...

bai, ayaw na gyud paghisgot sa mga sakit sa katilingban.

undangi na ang paghandum nga unta, usa ka adlaw, mahigmata ta sa kaanindot sa atong nasud.

undangi na ang paghandum nga unta, usa ka buntag, mahigmata ta nga wala na sa atong taliwala ang mga tawong nakaingon nga moundang na lang ta sa paghandum.

tungod kay basin ug moundang na ka ug kitang tanan, mobalik ra sa kahapsay ang tanan. basin makatilaw ra ta kadugayan ug kaayuhan.

pero, lisud man...

lahi gyud ning adik ta!

hala, beer pa dong!

JGG said...

@iamsorceress: unsay nindot i-request sa Ginoo nga ihunong sa kadali ang oras para masinati nato ang lawom nga kanilaw. pero mao kini ang reality.. ug naa sa realidad ang lawom nga kalinaw..

Anonymous said...

la may lingaw sa kalinaw, pre. bahalag way linaw basta lingaw. lisud pod way lingaw kay linaw ra. ambot lang.

kung naa koy gahum sama kang Hiro sa Heroes, pwede nako pahunungon ang oras. pagtarong ug hunahuna unsa imong gusto mahitabo ig pahunong nako sa oras aron maski sa char-char lang atong mabuhatag paagi. :D