Tuesday, 18 September 2007

Napulo singko

Niadtong miaging semana, gipasa kanako ni doc jun ning makalingaw nga pagsugilon sa napulo ka butang nga wala magustohi. Ug tungod lagi kay wala koy igo nga panahon niadto, karon lang nako kini masulat. Gihatagan ko ug singko minutos ang akong kaugalingon sa pagsulat niining napulo ka mga butang nga wa nako ganahi.

FOOD: Dugo, atay, tina-i, tungol, basta kanang naa sulod sa tiyan. Basta lang, pamati nako gi-transplant sa akoa ang mga gitagudtagud nga lamang-loob sa baboy, baka, ug manok. Dili gyod ko ganahan motan-aw ug dugo, labi na ug lutuon unya kaunon. Di sad ko makaon ug fishball, tempura, ug siomai nga baligya sa kadalanan.

FRUITS: Mangga, pinya, kapayas, nangka, marang, apple ug uban pa. Dili ko ganahan mokaon ana nga mga prutas kung lata na kay posible sila nga naay ulod nga gagmay.

VEGGIES: Okra. Danlog man gud. Maka-imagine ko ug lain. Pero mokaon man ko bisan danlog-danlog. Ayaw lang sa nang okra. Kung okra ang ipatanom sa Senado (kay padanlog kuno), mosupak gyod ko. Kamunggay, di sad ko ganahan sauna pero pagkahibalo nako nga dako ug ikatabang ang kamunggay, aw, kaon na lang gud.

PEOPLE: Mga drug lord, drug pusher, ug drug user! Apil pod diay ang mga politiko nga laog sa pangatungdanan. Nasilag gyod ko nila kay naluoy ko. di pod ko ganahan sa Filipino nga dauton ang iyang pagka-Filipino ug ang nasod nga Pilipinas. Dili pod ko gananahan sa edukadong tawo nga wala gani makahibalo bisan gamay na lang nga tipik sa kasaysayan sa atong nasod. Ug labaw sa tanan, ang mga tigpakaaron-ingon nga limpyo pero baho lang gihapon ug utot (mga lobo nga nagtakuban pagka-karnero), mga bintahoso, mapahimustalon, traydor, mga libakera ug mga babayeng walay kasing-kasing. Pero asa man nako sila makahinagbo nga tanan ko nga mga kaila ug higala mga buotan man sama ni...aw dili na lang nako isulti kay daghan sila.

EVENT/SITUATION/INCIDENT: Kanang magpaabot ko ug dugay labi na kung "late" ang kasabot. Mapasaylo ra nako kung naay kalipay human sa akong pagpaabot. Kanang tintalon ko kay dali ra kong matintal. Kanang manamilit na ako. Ang labi ko nga gikasilagan mao ang pagpangyatak sa tawhanong katungod, pagbiay-biay, pagpanlupig ug ang pagpatay sa tawong way ikasukol.

TV SHOWS/MOVIES: The Buzz! kay walay sense para nako. Ako ning klarohon ha, para lang nako, mahimong may "sense" na para sa uban.

MUSIC: Wala man koy matubag ani.

HOUSEHOLD CHORES: Manhugas ug plato ug baso. Dili ko ganahan nga makabuak ug plato ug baso. Kapoyan pod kaayo ko. Mura mahurot ang tanan nakong enerhiya, unya dugay pod kaayo ko mahuman. Basta "dragging" kaayo ning manghugas.

THINGS AROUND THE WORLD: Ang terrorismo ug racial discrimination.

THINGS ABOUT MYSELF: ang akong pagka-badlongon. Ang akong pagkakuan. Gimahayan gyod nako ug gisaad na nako sa akong kaugalingon nga karon adlawa lang, magbinuotan na ko.

Oi, milapas man ug tulo ka minuto. Sige lang. Hangtod sa sunod higayon. Ug i-itsa nako ni kang weng ug ma'am tikya kay gusto pod ko masayod. hehehe.

Ambot lang!

8 comments:

weng said...

nationalistic jud ka kuya. u are really concern sa atong nasud gamay ra ang parehas nimo. mao na ang pinaka sad kai few lang ang dunay pagpakabana sa katilingban nga Pilipinhon, few lang ang nag handum ug naningkamot nga mo uswag ang atong nasud. Am proud of you.

batang buotan said...

weng: una sa tanan salamat sa imong mga gipamulong. sa akong pagtoo, daghan kaayo (greater than 50% of total population but less than 90% - -opinion ra ni nako) ang "naghandum ug naningkamot nga mo uswag ang atong nasud" Nagtoo ko nga usa ka mga nagmahal sa atong nasod. Hinoon tungod sa impact of free flow of information from developed countries, hinay hinay nga nausab ang panglantaw sa uban..

Neil said...

Lingaw ko ani nga site kay mura'g ma-rehash man ang akong Binisaya.

Year 2000 pa man last time nga nianha ko's Cebu ba.

batang buotan said...

@Neil: salamat sa paghapit.. bisan ako "gimingaw sa duha ka pinulungan nga akong namat-an, ang bisaya ug ang illonggo kay sa hataas nga panahon wala ko misulay pagsulat gamit ang maong mga pulong. para nako matawag na tingali ko nga hingpit nga magsusulat kung kaya na nako nga sulaton ang ilonggo sama sa level ni "kwan" ang akong paboritong ilonggo blogger.. balik balik nya engineer!

Darlene said...

Gipasahan sad ko aning Ramses ba wala pa nako mabuhat mag agup-upna gyud tos iyang balay ba lol!Maayo gyud diay kang pagkatawo batang buutan lol! Ako nahan baya kaayo kog mga danglog nga gulay sama anang okra saluyot ug alugbati ug uban pa kay lami man para nko hehehe ug kamunggay pod lamian ko bisan unsa man tingali nga gulay wala man ko pili ayaw lang nang makahilo hahaha.Ug ang imng hate nga tawo,ayaw baya kog apila ha,kay love baya nako ang pinas ang mga politiko lang ug naay dagkong posisyon sa gobyerno maoy hate nako dili ang pinas,i love my own country gyud woi!

batang buotan said...

@Darlene: salamat sa paghapit.. hehehe.. kabalo ko oi, mahal nimo ang atong nasod kay kung dili pa, dili ka maggahin ug panahon sa pagbasa sa mga posts sa Filipino bloggers, ug makalimtan na unta nimo ang pagkaing Filipino...im proud of you!

tikya said...

mao nang di ka manambok kay pilian man kaayo kag foods!kaon maski unsa ui!

batang buotan said...

@tikya: mokaon baya pero naa lagi koy bitok.. bwahahaha.. salmat ma'am tikya. well taken, mokaon na ko ug maayo.