Tuesday, 4 September 2007

Yellow Broadcasting

Ang Yellow Journalism mao ang matang sa pagsulat o pagtaho diin ang gamay himoong dako, ang ginagmay nga hitabo himoong iskandaloso. Ang Yellow Journalism namugna niadtong 1897 tungod sa "circulation battle" sa New York World ug New York Journal (from 1895 to about 1898), duha sa dagko nga mantalaan sa America niadtong panahona. Gusto sa matag usa nga mas daghan pa ang mopalit ug kopya sa mantalaan mao nga ilang gipatik ang mga ngilngig nga estorya, gipadako ang gagmayng panghitabo. Nahimo nila kadto tungod sa kompitisyon.

Dili halayo niadto ang nahitabo karon sa duha ka higanteng TV network sa Pilipinas, ang ABS-CBN ug GMA. Ang "giyera" sa ABS-CBN ug GMA dili "circulation battle" kondili, "rating game". Matag usa naglumba kinsa ang numero uno. Matag usa, nagpasiatab nga maoy tinuod nga nag-una.

Para nako, maayo ang diwa sa kompitisyon. Apan sa dagan sa giyera sa duha ka higante nga TV network, dili nako malikayan ang madismaya.

Makalingaw man ang Eat bulaga ug ang Wowowie, apan dili ko ganahan motan-aw. Mipatik kining duha ka programa sa akong utok sa dihang gibalita nga mihilak si Willie kay nahiubos kuno sa gibuhiang pulong ni Joey. Abi nako mahuman na ang kontrobersiyal, misamot hinoon kay mibuhi na sab ug laing pulong si Joey. Miingon pa nga, kung gi-imbistigahan daw sa Senado ang "Hello Garci" nganong dili man imbistigahan ang "Hello Papi"?

Nagkatawa lang ko sa akong nadungog. Mopalit kaha sa Senado sa maong kontrobersiya? Mura'g dili.

Apan sayop ko kay sumala sa akong nabasahan, imbistigahan man kuno kini sa Senado. Sa akong huna-huna, nganong Senado man gyod, dili diay pwede DTI lang? Tinood man nga public interest ni nga isyu pero para nako dili angay nga dal-on pa ni sa Senado. Nahulog hinoon nga ang gusto sa mga Senador mao ang media coverage. Tungod kay init ni nga isyu, gipalit pod nila.

Kining Senado usahay sige na lang imbistiga. Media coverage! Pagkahuman, mawala ra sad. Maayo ra man unta na kung in aid of legislation pero in aid of ambition man (para mosikat). Ang uban diha sa Senado maayo lang mosulti bahin sa mabaw nga isyu pero kung lawom na gani nga issue, manalaw na. Hala sige, imbistiga mo. Galangan ra mo. Nganong dili man ninyo susihon ang mga pribadong kolehiyo nga walay igong pasilidad nga nag-offer ug Nursing? Tan-awa gud ang resulta sa licensure exam. Nasuko gyod ko. Naghuot na gyod akong dughan. Hehehe..

Kini nga isyu (Joey ug Willie), nagamot man gyod sa kompitisyon ug sa irresponsableng pagsibya. Kini gumikan man gyod sa intinsiyon nga daghan ang motan-aw sa ilang programa aron sab makasapi sila ug daghan. Sulayi gani pagsusi ang news content sa ilang primetime newscast, sobra sa katunga "sensationalized".

Maayo unta puy-an sa duha ka higante ang ilang giingon nga sila kapamilya o kapuso. Pasiatab ra ba kana aron maka-mugna ug mga sumusunod? Para naa kunuhay loyal nila.

Matod pa sa mga batan-on: Pag sure mo oi!

Ambot lang!

Changelog:

5 comments:

ring-my-Belle said...

kanus-a paman intawon mag bag-o ning atong pulitisya noh? ka wa jud ayo bah! :) tama jud ka... maka way gana etan-aw anang ilang programa kay mag cge nalag away kinsay sikat nila..dili magpa pildi! :)

batang buotan said...

@ring-my-Belle: ang akong gusto ipagawas mao ang responsableng pagpanibya.

salamat sa pagyawyaw..hehe

girlfromdipolog said...

congrats, maayo pod diay ka dah! mao diay nay buot pasabot sa yellow broadcasting.

batang buotan said...

@gfd: actually, the term is "yellow journalism". ako lang pod giimbinto nga yellow broadcasting..

OBRAMAESTRA said...

Sa atong panahon karon...ang paagi sa pagbalita nagdepende kana sa nagbalita....dili gyud kita makaingon nga masunod ang giingon sa libro sa mga mass com ug mga journalism students nga masunod kini diha sa field...tingali sa theory puwede...

Ang usa ka hitabo nga ibalita sa usa ka tigbalita depende kana kon asa siya nagbarog. Sama panangitan...sa usa ka sugilanon sa tulo ka baki nga nahagbong sa usa ka dakong buho...

Ang usa ka baki...nagbong sa kinalad man...ang ikaduha didto ra sa tungatunga kay nasangit man siya...samtang ang laing usa tua ra sa ibabaw nga bahin kay nasangit lagi usab...

Sa dihang migabii na migawas ang dakong bulan kay daktol lagi niadtong higayuna...

Miingon ang baki nga nahagbong sa kinaladman nga "Nge...dili diay kaayo hayag ang bulan kon daktol no". Siyempre gamay nga sanag sa adlaw ra man ang milahos ngadto sa iyang nahimutangan...

Samtang ang ikaduha nga baki nga nahagbong sa tungatunga miingon nga "Pataka man lang ka, tan-awa hayag baya ang bulan galing lang kay dili lingin".Katunga ra man sa bulan ang iyang nakita gud.

Ang baki nga tua sa ibabaw mingon nga 'sayop mong duha lingin ang bulan og dako pa gyud kaayo ug hilabihan nga hayaga'. Siyempre tua man siya sa dapit nga wala masalipdi.

Ingon ana usab ang pagbalita...ang pagbalita man gud kon usa lang ang imong nakita nga imong ihatod ngadto sa katawhan.(wala pa ko mahuman ha ako lang ibutang sa akong blog ang sumpay niini)