Tuesday, September 11, 2007

Alternatibong kasinatian para kang Erap

Ugma na ipagawas ang desisyon sa Sandigang Bayan sa kasong plunder nga gipasaka sa kanhi aktor ug presidente sa Pilipinas nga si Joseph "Erap" Estrada. Guilty or not guilty? Ugma na kini matubag. Kung guilty man gani, angay ba siyang tagaan gilayon ug presidential pardon o angay siya nga ibalhog sa bilibid (Muntinlupa)?

Para dili ta maglibog, niay akong sugyot isip alternatibong kasinatian (dili ni silot) para kang Erap. Taposon ta ang pag-antos ni Erap. Ilubong na nato ang panagbangi ug panagbingkil sa pulitika.

Unang lakang sa alternatibong kasinatian para kang Erap mao ang pagpadala kaniya sa pinakasuok nga bahin sa Mt. Malindang (Misamis Occidental). Kinahanglan nga susihon una ug siguraduhon nga dunay pipila ka lugas nga tawo nga kasamtangan nagpuyo didto ug ang labing impotante, mao nga ang maong mga tawo wala nakaila kaniya ug bisan na lang makadungog sa iyang ngalan.

Gikan sa bag-o nga Ozamiz airport, sugaton si Erap ug balsahan nga guyoron lamang sa nating kabaw nga gikan pa sa Mahayag Carabao Breeding Station. Wala ang mahalong sakyanan, wala ang taas nga convoy sa iyang pag-abot. Simple lamang ang tanan. Wala usab ang bidyu sa GMA ug ABS-CBN.

Sa iyang panaw, responsibilidad niya nga pakan-on ug lab-as nga sagbot ang nating kabaw.

Tugotan lamang siya nga makadala ug duha ka pares nga bisti nga isulod sa netbag; walay cellphone, walay digital camera, walay iPod.

Sa lugar nga iya unyang puy-an, walay ni usa nga makaila kaniya. Walay ni usa nga motombaya o mohatag ug ispisyal nga pagtratar.

Pasagdan siya nga siya mismo ang magtukod sa iyang payag nga puy-an. Kinahanglan ang maong payag lima kapilo nga mas gamay sa pa sa pinakagamay nga kasilyas sa iyang mga mansiyon. Pasagdan nga siya mismo ang magtukod niini.

Ang katuyu-an niini mao aron masinati ni Erap ang simple nga kinabuhi nga iya lamang nasinati sa mga eksena sa pelikula ug dili sa tinuod nga kinabuhi.

Tagaan si Erap ug peso nga allowance matag adlaw. Apan kung may baligya ba sa maong lugar, kana dili nato masiguro. Hugtanong pasidan-an ang kanhi presidente nga dili niya mahimong isugal ang maong salapi. Tugutan lamang siya ug sugal sa bugno sa kaka (spider) uban ang mga bata (bawal makigsugal ug kaka kauban ang mga edaran na ug dagko na ang tiyan) apan dili kwarta ang sugal kundili ang gitawag nga "litkanay". Ang mapildi, litkan sa dalunggan.

Sulod sa igong panahon, sination kini ni Erap sa dili pa siya dalhon sa laing ang-ang sa programa (alternatibong kasinatian).

Dalhon si Erap sa Poor Claire Monastery sa lungsod sa Josefina, Zamboanga del Sur. Didto manimuyo siya kaubang ang mga mongha. Oo, manimuyo siya uban sa mga madre (mga babaye na sila). Pero sulod sa panahon nga atua didto si Erap, mata lamang ang makita sa mga madre.

Laing kondisyon mao ang padili kang Erap nga makighinabi ni bisan usa sa mga madre. Ginadili gani bisan ang 30 segundo nga pagtutok sa madre ug dakong sayop ang paghikap bisan na lang sa sidsid sa bisti sa madre. Obligado si Erap nga mosabat sa orasyon matag ala sais sa buntag, alas dose sa udto, alas tres sa hapon ug alas sais sa gabii. Obligado usab siya nga moapil sa tanang espirituhanong gimbuhaton sa monasteryo.

Sulod sa igong panahon, gilaoman nga nga maanad na si Erap nga manginabuhi nga simple lamang.

Sa "social responsibility component" sa programa alang kang Erap, magtudlo siya ug values education ug religion classes sa mga suok nga barangay sa Josefina. Didto iyang itudlo ang mga values sa mga Filipino sama sa pagkamapailobon, pagkakugihan, pagkamatinud-anon, pagrespeto sa mga kababayen-an, ug ang paglikay sa sugal.

Human sa programa, ganahan pa kaha muoli si Estada? Balikan kaha niya samok nga kalibutan sa pelikula ug politika? Basin dili na. Ug kinsa nasayod nga sa iyang mga buhat mahimo na siyang pinakabag-ong santos. St. Erap? Oi, nganong gong dili.

Halleluya!

Ambot lang!

5 comments:

weng said...

Daku daku sad na siya nga sestinsya da, maygani gibawi nimo ug kaayohan sa katapusan.

Sa tinuod lang kana si ERAP nagrepresent na siya sa kinabag-an natong mga Filipino. Maayo kaayo sa pagarpar wla sa buhat. Usa nako ni ana. I am disgusted with myself because like ERAP I have alot of good plans, good intentions and wonderful dreams but all remain a mess. Maayo ra man gud kos estorya wla sa buhat. Change starts with me. Kung wala man gani ko ni asenso ako mismo ang hinungdan niini. Kung naglisod man gani ko, ako mismo ang sad-an niini.

Usa sa pinakabug-at nga ibidensya mao ang akong pag delay sa akong mga gustong usbon sa akong kaugalingon (eg pagmata ug sayo). Mao nga na abtan nalang ug pila ka tuig wla gihapon nausab ang sistema sa akong kinabuhi. Sala ba ni sa uban? Ako man mismo ang gapili niini. IF I WANT CHANGE THEN I SHOULD START IT MYSELF TODAY.

(ngano man lahi man ang Pilipinas sa ubang nasud? Catholic man kaha ni nga nasod?, why crimes are so rampant compared to other ASIAN nations? because we treated each other human, tungod kai ni too man ang kinabag-an nato nga ang pag-usab nagagikan gyud sa kaugalingon nga paningkamot, ug dili kinahanglan putlon ang atong kamot, pul-ungan ug li-og ang makasala aron lang gyud ta mahadlok sa pagbuhat ug krimen, Corporal Forms of Punishment do not encourage change of attitude it only threatens the person not to do it because of fear of punishment but not merely because he/she learned what is right from wrong.

Rather than instilling fears or threatening with inhuman punishment, Filipinos expect law violators to change their attitudes for the better. Still we are giving each and everyone the freedom to choose the right path.

Ang akong kauswagan nagagikan ra sa akong kaugalingon.

Anonymous said...

Jerry: katawa man pud ta ani! pwede moligid? :P

for me, this is your best post, so far! maski pakatawa pero makapanghinuktok ko.

Weng: very nice comment. i can very much agree.

JGG said...

@weng: salamat sa pagpahinumdom usab kanako sa akong kaakohan isip responsableng lumulopyo sa nasod.

@jun.anteola: salamat doc jun!

ley7ed said...

maayong gabii diha.....kon pwede lang noh...maayo kaayong pasuwayon ang kahi presidente....mas maayo pud kon mao ni ang silot sa tanang mabilanggo.....labihan cgurong daghana sa santos sa Pilipinas

Utah Mommy said...

Ang pangutana,mo survive ba kaha sya ana nga kinabuhi?Basin maghikog nalang sya hehehehe kay may kagawasan tuod sya apan nawagtang ang iyang naandang kinabuhay sa kaharuhay.Na ako dili gyud ko mahilig sa pulitika batang buutan kay samukan ko.Sa dinha pako sa pinas permi gyud ko boycot kay samukan lagi ko ang permi naa sa akong hunahuna nga basin ang akong butuhan makadaug unya dili maayo momiubra sa atong katilingban basin ikabasol ko pa nuon akong pagboto.
That's one thing i noticed here in USA the election?oh my gosh it's very quite & peaceful unlike sa pinas sus magkaguliyang ang mga politiko labi na ang mga tawo para sa ulan-ulan nga ilang giingun kanang kwarta nga ihatag aron lang butuhan,pait baligya ang boto diay samantalang diri wa man gani tawn ko kakita sa mga dagway sa personal sa mga kandidato sa politiko.Makakita lang ko nila kung naa mga celebration kay muapil silag parade baktas gyud dili pod sakay sa ilang mga nindot nga sakyanan.See?Big difference!Then servant gyud sila sa gobyerno dili sila mao ang gamhanan ang mga tawo diri sa katilingban maoy labing gamhanan kay naa gani isa moreklamo sa ilang serbisyo matarantar na ang politiko kay basin masibak sila sa ilang posisyon.