Monday, 29 October 2007

Tigaw lang

Apil ko sa pipila sa mga nasagmuyo sa paghatag ni Pangulong Arroyo ug pardon ngadto kang kanhi presidente Estrada kinsa napamatud-an nga nagawkaw, nanghabas ug salapi atol sa iyang pangatungdanan.

Wala na tay mahimo ana kay naa man na sa atong batakang balaod nga mahimong makahatag ug pardon ang atong presidente sa mga nakasala. Daghan gyong nangugat ug niyawyaw, pero unsaon pa man, dili na man na mabawi. Maayo man ug pareho na si Estrada sa uban nga ginagmayng drug pusher nga human makapiyansiya ug makagawas sa prisohan tipi-on dayon sa mga "vigilante" kuno. Dili na gyod na angayan nga buhatan sa ingon si Estrada kay dato baya na. Ang kasagaran nga gipangpatay sa "vigilante" kuno, mga pobre man. Maayo man ug snatcher na ug cellphone si Estrada kay kulatahon, dinagko man tong iyang gikawkaw, mahadlok na ta mokulata ana oi. Usa pa, dato baya na siya. Maayo unta'g pobre kay sayon rang kulatahon. Aw, pasayloon gud!

Dili man sab maayo nga tungod kay wala natuman ang akong gusto nga dili tagaan ug pardon si Estrada, moapil na ko sa mga pipila nga nagpasamot sa tigaw sa nasod. Moyawyaw lang sa hilom samatang naglaom nga unta maluwas ta niining kasakitan nga gihatag sa nag-umidong samad sa pulitika sa atong nasud.

Naa toy nadunggan nako sa radyo nga naa na kunoy pundok nga nanawagan nga mo-resign si Gloria ug si Noli. Online petisyon kuno kini. Ambot lang kay sa diahng akong gisusi ang pitisyon wala man koy nakita nga igong unod. Giingon didto nga nahanaw na gyod ang "moral authority" ni GMA aron pamunuan ang nasod. Hala, kuyawa no? Wala pa sab tingali oi. Taym pa, ang unang mipirma senador man sa nasod. Uy, kini nga senador labar man sab nga walay "moral authority" nga molingkod isip senador kay misulay baya siya ug hugno sa gobyerno, kung sumadahon, mitraydor siya sa nasod. Ah, murag tigaw ra man ni nga petisyon oi. Dili lang ko moapil ana.

Lisod man sab baya nga walay tino nga lider ang mopuli unya kung papahawaon nato si Gloria. Mosamot gyod ka tigaw. Mopuli pa lang ang mga kumunista unsaon na lang. Kini ra bang uban maayo kaayo moyawyaw sa katungod sa kinabag-an, maayo kaayo mamulong pero may nagpahipi nga plano.

Kinahanglan gyod ta nga magbantay. Tigaw na kaayo. Iya iya na lang ug diskarte ang mga karaho. Pastilan, kung paluya-luya ang atong utok, mailad gyod ta. Mao nga aron dili mosamot ang tigaw, hinay-hinay lang!

Ambot lang!

3 comments:

girlfromdipolog said...

unsay meaning sa tigaw?

batang buotan said...

tigaw: kalandrakas, gubot, way klaro. mao na ako nahibaw-an nga meaning sa tigaw.

used in Missing Felimon's song, Suroy-Suroy: Ay'g pad'a sa tigaw, ma'aan ka nga bugaw

kung nagkagubot na, moingon ta nga, nagtigaw na sila

kung nagkayagaw na angrupo, moingon ta nga, katigaw baya

salamat sa pagpangutana.. salamat kang weng sa pagtabang ug explain.. hehehehe..

Neil said...

Gin-islan ko na gali, Bai ang address ko.

A Simple Life: http://simpliving.blogspot.com/

Lihog lang ilis kun may tiempo ka. :D

Thanks gid.