Friday, 5 October 2007

Salamat manok

Samtang nagkaon ko sa akong paniudto, gibati ko'g kaluoy ug kahingawa samtang nagkitkit ko sa manok nga akong gikaon. Maayo na lang kay dili hiniktan ni nga manok. Mura'g dumaga gyod ning akong gikaon kay tam-is tam-is man ug unod. Mao ni ang lami sa manok; kung himungaan, gahi na ug maypakaparat nga aslom ang lami; kung manok nga hiniktan, pait ug lami. Kaluoy pod sa manok nga akong gikaon no? Iya intawong gisakripisyo iyang kaugalingon aron lang intawon makakaon ko. Salamat manok!

Gimingaw man ko'g hiniktan. Dili man gyod kaayo "obsessed" sa manok pero mohapyod baya pod ko labi na ug sunoy nga maayo'g barog unya maayo kaayo moaway ba. Dili sab nako maingon nga sugarol ko pero malingaw baya pod ko moadto "usahay" sa mga tigbakay. Malingaw man pod gud ko sa sabong. Makawala sa stress ba.

Ang akong ig-agaw kung mouli na gani gikan sa Bacolod, magdala gyod ug manok. Mga nindot ra ba gyod kaayo'g barog. Dili gyod masayang ba. Bisa'g mahal ma-engganyo gyod ka nga mopalit.

Daghan mang gyod hilig ug manok. Ang uban nalab-anan na ang hilig. Maayo ra baya na kung mahapuhap ta'g manok pero kung malimtan na pod ug hapuhap ang asawa, dili na pod na maayo. Tanang sobra makadaot.

Mao nga dili na gyod ikatingala nga daghan ang mga nahasulat bahin sa manok. Ang labing makapakatawa nako mao ang, "My brother’s peculiar chicken" nga gisulat ni Alejandro Roces. Bahin to sa duha ka managsuon nga nagkakaplag ug manok ug naglibog sila kung unsa ang "gender" sa manok. Kay kung tan-awon man gud ang manok, murag sunoy, pero mura pod ug himungaan. Kung ilang tatay pasultion ang manok kuno "bayot" (translation to binabae) pero matod pa sa inahan, "tomboy" kuno (translation to binalake). Daghan gyod ang naglibog. Bisan ang pina-eksperto sa manok dili gyod makatubag kung unsa gyod ang "gender" sa manok. Sa dihang miadaog ang maong manok sa sabong, kombinsido na gyod sila nga sunoy gyod to pero sa dihang mikalit lang ug lugsot ang itlog sa manok, wa na gyod sila katingog. Nag-story telling na man hinoon ko. Pasensiya na. Hehehe

Naa sab katong sa stage play nga "Sa Pula, sa Puti", sugilanon sa asawa nga gusto na gyod unta niya nga mahunong ang sobrang pagkahilig sa iyang bana sa tigbakay. Pero dili sab palupig si Teban, sa iyang drama nga manok nga ugis. Naa man gani kanta pod ana si Max Surban. Nagpasabot nga dako kaayo ang papel sa manok ning kalibutana.

Taym pa, ibawal na kuno ang tari-tari sa Mandaue? Maayo na lang gani kuno gi-veto ni Mayor Cortes ang balaodnon. Aw, padayon gud. Naa man gud nag-ingon nga naay koneksiyon ang kawat sa sugal (tigbakay). Sa amoa pod biataw, bawal man ang tigbakay pero dili man bawal ang derby. Unsa man gud ang kalainan ana. Pero sa tinood lang daghan ang pamilya nga nabungkag tungod sa manok. Apan matod pa sa kanta nga akong nadungog, masarap magmahal ang sabungero!

Nabusog gyod ko sa akong paniudto ganina mao nga sa dili pa ko manamilit tuguti ko nga moingon, salamat manok!

Ambot lang!

4 comments:

Darlene said...

Hala sa amoang silingan noh nahurot intawn ilang ari-arian tungod lang anang tari-tari ba grabe naman sad woi ang balay na prenda sa bangko unya na remata tungod sa bisyo grabe na gyud ka sugarol karon gamata nalang iyang pamikya ug buntag maayo baya kaayo to silag kahimtang sauna unta nawagtang gyud tanan.Tingali bwisit pod ning masobrahan gyud ang bisyo woi.

Anyway batang buutan palihug unya kog tubag sa akong pangutana sa akong blog nga my life my world related sad to sa hayop.Ako ra unyang atangan ang imong tubag diri.Salamat daan!

batang buotan said...

@darlene: tanang sobra dili maayo..sige akong nyang tubagon.. hehe.. thanks..

weng said...

lagi kuya naka read ko nga ibawal ang sabong sa Mandaue pero ang sabong ra man atol sa piyesta dili man ang kada Dominggo nga sabong (kai legal na man daw basta naa dira lugar nga sabonganan)
ganahan ta ko mo observe kai akong gyud tan-awn unsa kalingaw ang sabong pero di nalang kai gi ingnan man gud ko nga kasagaran sa mo adto magdala ug kargada kai dinagku ang pusta unya kuyaw if naa gubot or kuyaw if hold-upon sila. mo pusta nalang ko heheheh (joke ra bitaw)

batang buotan said...

@weng: sulayi lang gud.. sa akong pagbanabana, mura 1% ra man ang probability sa imong gikahadlukan.