Dili pod gyod ko kamahay nila kay unsaon man sab nga ang ubang patay makalilisang man sab ang dagway. Pero dili sab angay mahayon nato ang patay kay wala na baya silay mahimo aron mahimong presentable ang iyang haya. Naa na gyod na sa mga kamot sa mga buhi ang iyang kapalaran aron ganahan sab intawon motutok kaniya ang mga nagbilar sa iyang haya.
Ambot ba, naa man sab mga patay nga galuspad lang. Oo, tinood nga wala na sila'y dugo kay gikuha sa embalmer pero dapat baya pod nga tarongon sa embalmer pag-retouch ang nawong para sab dili luspad kaayo ba. Naa sab uban nga patay nga akong nakita, nagkampat lang ang make-up; ang ngabil pula ra kaayo pero ang aping galuspad lang. Nakahunahuna hinoon ko nga maayo gyod ning daghang kwarta kay makapili man ug maayong funeral parlor para sab matarong ug tratar ang patay'ng lawas sa ilang minahal sa kinabuhi. Ang pagbalsamar man gud sa patay dili lang aron mapreserbar ang lawas - aron dili mobaho - apil na gyod ana ang paghatag ug "aesthetic value" sa patay'ng lawas, ilabi na gyod sa nawong.
Nakahinumdom lang ko sa haya sa usa ka suod nga higala kaniadto. Daghan gyod wala mitan-aw kay mahadlok, unya lain sab daw kaayo tan-awon ang samad. Namatay - gipatay diay - man gud to siya human gitulis ug gikuha iyang bag-o pa intawon nga motor. Daghan kaayo'g samad sa nawong ug gigulgol ang liog. Naunsa man sab ang mga embalmer oi, nga gitahi ang mga samad, klaro man gyod kaayo ang tahi. Itom pa gyod ang tanod. Mura sila ug nakatahi ug baboy nga litsonon. Wala ba diay wound filler nga para dili mahalata ang mga samad? Naa baya gyod na.
Sa mga patay nga akong nakita, maihap ra gyod sa akong tudlo ang nindot ang pagkabalsamar, ang nakapasa sa akong gipangita nga "aesthetic value".
"Amaw" matod pa sa usa nako ka kaila. "Patay na gud na, unya kinahanglan nga pagwapahan pa diay?"
Mitubag ko, "kay ngano nawala ba diay ang katungod nga magpagwapa ug magpagwapo kung patay na?" Aw, sakto ba? Dili intawon ko eksperto niana. Basta para nako dili angay ibaliwala ang "aesthetic value" sa patay. Hinoon ang importante nga mahatagan ug dignidad ug may dakong pagrespeto nga mga patay ngadto sa katapusang kapahulayan. Mao na ang mas importante.
Mag-embalmer kaha ko no? Matod pa ni (dili lang nako isulti) kasagaran daw sa mga embalmer nga iyang nakita niwang daw, nagsiga lang ang mata (mura'g zombie?). Pero dili man tingali kay naa baya koy nabasahan nga professional embalmer siya, gwapa, ug doktora ug postura. Ubos ang pagtan-aw sa uban sa maong propesyon. Pero ambisyon na para nako.
Hala, niwang ra ba ko, unya gasiga lang ning akong mata. Mag-embalmer kaha ko sa? Kung mahitabo na, ang gusto nako dili lang basta embalmer, gusto kong mahimong "the greatest embalmer of all times".
Patay kang bata ka!
Ambot lang!
Visit also: Third Wave
Contact me: Send Mail
Subscribe in a reader 
*Napatik sa Panguil Bay Monitor (Ozamiz City), October 15-21, 2007 issue.
7 comments:
heheheh dili ko ka imagine sa patay nga gi tahi ug itom nga hilo murag gisamotan gyud ug panamastamas gi murder pa siya gi samotan pa gyud sa embalmer. pag embalmer nalang kuya aron free ra mi (ay ako ra d-i) sa imong serbisyo labi na kon pananglit gyud mag una ko ug panaw nimo. wow grabe may unta dili lang free sa pagembalsamar free sab ta ko sa lungon kai kinamahalan ra ba daw basta naa mamatay.heheheh
pa-embalsa pod dayon ko nimo...
taronga ha? kalgon taka pag di ko gwapa tan-awon. ssshhhhh.. shhhh... hoy! madunggan gani ta sa yawa ani. ayaw sa tawon!
Salamat weng sa imong encouragement nga mag embalmer ko..heehhe.. pwede!
@gf>: bitaw.. hehehehe... moabot man ta ana pero dili lang unta karon.
hhahaha kahadlok ba nimog gipangandoy nga propesyon batang buutan.Sa tinuod lang ako pod sauna sa bata pako hadlok gyud ko mutan aw ug patay nga gihaya pero sa nagdako nako syempre mas nakasabot nako unsay mga panghitabo ug explainations unsay tinuod ug dili.Pero bitaw sakto ka batang buutan naa sad sila katungod mga patay na gipang haya nga ma gwapa or gwapo sad sila bisan nalang sa katapusang lili sa ilang mga minahal sa kinabuhi.Uyon ko sa imong gisulti.
kung ikaw ang mu balsamar nako, intawn pangisiha ko. ug igka haya ayaw taw ipa higda ang lungon. Ipa barog lang kay kung bsin naa pay chix nga mubisita ako pa tawn makidhatan :D
@morbid: lisod na nga tahas bai da pero sa iningles pa, "challenging"!
Ambot lang!
hmmm. ,
ikaw qng mag balsamar ka
hehehe .
kalagon jud ka ana
Post a Comment