Wednesday, November 7, 2007

Lusa, Kuto, ug ang Kaspa

Kinsa bay mohimakak nga wala siya gikuto sa usa ka yugto sa iyang kinabuhi? Ahem. Lisod ni da. Kinsay wala gikaspa sukad masukad sa ilang kinabuhi? Kinsay wala masakiti ug ngipon sukad pagkabata hangtod karon? Kinsay kandingon?

Ayaw na lang ninyo na tubaga ang akong mga pangutana kay atong i-sentro ang atong pagahisgutan sa gibalita nga ang kuto mao ang usa sa mga nag-unang problemang-panglawas nga gitutukan karon sa DepEd. Kay matod pa, ang batang kutoon, dugay gyod makat-on sa leksiyon kay magsige man lang ug pangawot sa ulo. Tinood baya gyod na.

Taym pa, mura'g dili lang mga bata ang naay kuot da, kay usahay inigkahuman ug paniudto, mohigda man dayon si ma'am sa gisumpay nga desk unya magpakaykay sa ulo. Unsay gikuha sa mga dalagendeng gikan sa ulo ni ma'am? Hala, inaday, kurita kay aron dako'g points.

Dili diay kuno kuto, uban ang gipaibot ni ma'am. Sorry, abi man gud nako ug kuto ug lusa, uban ug patay'ng buhok ra diay. Kini sab mga dalagendeng maglumba pod ug kinsa makauna ug pagsiksik sa ulo ni ma'am. ambot ba, mura'g garbo man sa mga bata kung masuguan sa maestra.

Nakahimumdom ko nga nahisgutan sa akong inahan nga daghan lagi sa iyang mga estudyante nga grade one ang kutoon. Giapil man gani to ug hisgot atol sa PTCA meeteng. Ug dili lang kuto ug lusa ang bida, apil na ang mga nagbagtok na nga mga atuli (my apologies to my terms - jgg) sa dalunggan sa mga bata. Problema sab ang kanunay nga pagsakit sa ngipon sa mga bata. Tinood gyod ni nga hulagway sa estado sa mga bata nga nagtungha, ilabi na sa probinsiya. Naa ba pod ni nga problema sa siyudad, ma'am Lory?

Mao nga dako kaayo ang papel nga gihuptan sa mga magtutudlo kay usa man sa ilang kaakuhan mao ang pagsiguro nga dali nga makat-on ang mga nagtungha. Importante kaayo ni ilabi na sa mga bata nga naa pa lang sa elementarya.

Sabtonon na kaayo nga ang panglawas sa mga bata dako ug epekto sa ilang pagtuon. Kay tiaw mo ba'g magsige ug kaw't sa ulo ang mga bata. Unsaon man unya nila pagsabot sa mga leksiyon?

Sipok gyod kaayo ning kuto. Gani akong mabantayan nga naay "operation alis-kuto" sa hagdan. Kana bang maghagdan-hagdan ang mga kababayeb-an sa paghinguto samtang maghisgot-hisgot sa mga nabantayan sama sa mga kabit-kabit ug uban pang mga libak-libak. Alegre gyod kaayo sa?

Gagmay man ang kuto pero ngilngigan gyod ko magtan-aw, labi na ug pakit-on ko nga pakamangon pa ang kuto sa palad sa dili pa tudson.

Maayo tingali no, imbistigahan ni sa Senado aron matuki kung kinsa ang nagpakod sa kuto sa mga Pilipino. I-apil na sab ang pagtuki sa kaspa, ug makalipong nga ilok kay naa baya ginaingon nga bahalag nag-ilaid basta way kuto. Bahalag kurakot basta way kaspa?

Ambot lang!

Visit also: Third Wave
Contact me: Send Mail
Subscribe in a reader
AddThis Social Bookmark Button


*Napatik sa Panguil Bay Monitor (Ozamiz City), November 5-11, 2007 issue.

11 comments:

Utah Mommy said...

Hala bitaw doh ako sad sauna kay taas man kog buhok kutuon baya ko pero nawala na pag ka grade six nako kay kabalo naman ko muatiman sa akong buhok unya di na pod kaayo ko magpa init mao man daw na cause sa kutuon ang magpainit permi magdula sa udtong tutok way kakapuy-kapoy ba. Kahinumdom sad ko sauna sa mga maestra tinuod gyud na magpahinguto aron tagaan ug dakong grado hehehe makatawa man ko ani nga post nimo batang buutan woi

JGG said...

naa sab gani ko kuto sauna.. hehehe. pero dili molungtad akong kuto kay mubo man kog buhok. unya akong hadlokon ang kuto ug momo, mao nga mohawa na lang sila.. nakita gyod nako ang kuto nga nag evacuate gikan sa akong ulo. luoy kaayo kay nagkugos intawon sa iyang lusa.. hahay..

ambot lang!

weng said...

naka remember lang ko da sa elementary pako nga among teacher before mag start sa klase every monday mag inspect gyud sa kuko namong mga estudyante ug bunalan ang mga kamot nga hugaw ug kuko.

sa grade six pa sab ko ang among teacher magsuroy sab kada estudyante ug tan-awon kada ulo sa bata kon wla bai kuto ug kon naay mga kuto-on iyang pa lingkoron sa atubangan kon babaye ang kuto-on ang pahingut-on lalaki unya kasagaran sa naay kuto mga babaye man. pero wla sab tawn ko kasuway nga na hingut-an sa akong classmates.

pinalitan man gud mi sa una ni papa ug shampoo para sa kuto. aw concern jdu akong papa ato namo.

JGG said...

weng , diha gyod ko bilib sa mga teachers kay dili lang sila magtudlo, concern pa gyod sa health. naa pa gani nga ang teacher motrapo sa ihi sa uban. naa baya pod student nga maka-ihi.

sauna sab, kay after sa flag ceremony kay papuniton mi nagkatag nga dahon, candy wrappers ug uban pa.. the more you "punit" the more points. unya pagkahuman, maninggit dayon mi, "ma'am, wash your hand na?" hehehe

DA6 said...

btaw uy, mga kut onon btaw mga bata labi na sa probinsya, segi man gud painit.

girlfromdipolog said...

in fairness, wa pa jud ko nasakiti og ngipon!

nalimtan nimo ag mga bitok.

ahaha, yuck!

JGG said...

gfd wow! you must thank your parents and congratulate yourself! talagsa ra gyod ang wala nakasinati ug sakit sa ngipon.

Nalimtan gyod ang bitok. Major gyod pod ni nga problem.

Neil said...

Okay I admit, nagkakuto rin ako noon... Ha! :D

JGG said...

hahaha

Michelle said...

hahaha ako sad gikuto sa una kay di man maminaw badlungon nga di magpainit kay kutuon daw. nya mas nindot man ang dula bisan udtong tutok, dah gikuto lagi. pero dali ra nuon to nawala kay bisan grade two pako ang amoang mam iapil man ug inspeksyon and among kuko kung mubo ba, tiil kung nagsapatos ba, buhok kung basa ba ug ang sinina kung limpyo ba. grabe jud kay magdala man ug stick si mam, hadlok ko mabunalan.hahaha

JGG said...

michelle para nako, maayo kaayo ang gibuhat sa maong magtutudlo kay kabahin man to sa disiplina..