Friday, 30 November 2007

Pahimusli, Bai!

Naa kay uyab? Pahimusli bai!

Ayaw lang laina pagsabot ang akong giingon ha. Tambag ra man na nako sa mga lalaki nga naay uyab. Angay man gyod pahimuslan, di ba? Ang buot ipasabot niini, dili angay usikan ang kahigayunan nga kamo nagkahigugmaay. Dili angay usikan ang relasyon sa way hinungdan nga lalis ug walay kapasikarang mga selos o pangabubho. Ahem!

Pahimusli ang imong kabatan-on.

Ang tambag ni Titov,
pahimusli gyod ang inyong kabatan-on. Mao ni ang akong tambag ninyo. Mao man sab ni ang tambag sa akong mga magulang kaniadto.
Gidugang niya nga ang hustong hubad sa maong tambag mao nga,
gamiton sa mga batan-on ang kalig-on pa sa ilang lawas ug kalagsik sa ilang hunahuna diha sa pagbuhat og mga maayo aron sa ngadtongadto mahimo kining birtud ug dili bisyo ang magpuyo sa kasingkasing.

Nahinuklog gyod ko sa maong tambag ni Titov. Naigo gyod ba kay gilain ko man pagsabot ang maong linya kaniadto, abi ko ba'g ang pagpahimulos sa kabatan-on mao ang inom, paaso ug druga, ug gimok sa unod! Makauuwaw kay pagkamabaw diay sa akong salabutan.

Pahimusli ang imong kaalam ug kaantigo.

Matag usa adunay igong kaalam ug katakos. Pahimusli kini. Gamita sa minaayong paagi ug alang sa kaayohan. Naa koy mga amigo nga mga "hackers". Abilidad baya ning "hacking". Pwede man na magamit sa maayo nga paagi. Di ba duna may gitawag nga ethical hacking? Mao nga kung ikaw, usa ka "geek" na hala, pahimusli!

Ang uban maayo mo-desinyo, naay maayo mo-suwat, naay maayo mo-awit, naay maayo mo-diskarte - unsa pa man ang anaa kanimo, pahimusli kini. Ayaw lang gamita ang imong kaantigo sa pagpalusot sa mga licensure examinations ug uban pa nga mga examinations, ayaw lang gamita ang imong katakos sa pagpanikas ug pamintaha sa uban.

Pahimulos gyod!

Ang pagpahimulos dili dautan; ang pag-abuso mao ang makadaot. Pahimusli ang gasa sa kinaiyahan apan likayi nga abusohan kini. Pahimusli ang imong pagka-ikaw apan likayi ang paghimo sa butang nga magtukmod sa kaalautan.

Gamay ra gyod ang akong napahimuslan apan daghan na ang nakapahimulos kanako. Ahem! Ayaw lang laina pagsabot aron 'di maggubot.

Ambot lang!


Subscribe in a reader

AddThis Social Bookmark Button

7 comments:

MASTERMIND said...

by nice of you to have written something about peace in mindanao. for a change and for the many voices calling for eternal peace here. maybe you can write something about human rights in the future 2

TEEBOB said...

ok kaayo ang imo article bai maka mata sa mga piyung ug maka pa dungug sa mga nag paka bungol2x na mga huna huna

maayong adlaw sa imo dha

Michelle said...

toink! kakuyaw ug title pero undanon ang imong mga gipamulong. Uyyyyyy

girlfromdipolog said...

kana jud aron way mahay!
basta dili lang kalimtan ang values.
kung masayop man, lesson na lay imo ato.

batang buotan said...

mastermind, salamat bai. padayon ko sa pagsulat sa mga butang nga angay isulat..may you continue also your advocacy for sustainable peace in Mindanao..

teebob.. mura'g kanta nga sound of silence?. hehe.. salamat bai!

michelle, makaintriga ba ang title? salamat sa pagduaw..

girlfromdipolog, nasayop na ko mao nga naa nay "lesson" nga akong gihuptan karon.. hehehe

salamat,mastermind, teebob, michelle, ug girlfromdipolog!

Ed like Edcel said...

hala, maayo ni diri kay makapraktis este makapahimulos ko sa pagbasag bisaya kay ang akong pagkabisdak usahay magkadimao! hehe

batang buotan said...

ed like edcel: alternatibo ni bai sa kalibutan nga "english"! hehehe