Bisrock sa Bisdak

Samtang nag-aginod ang jeep nga akong gisakyan nagdahunog usab ang dokdok sa drum ug nagkasakasa ang kaskas sa gitara nga inubanan sa makalagsik nga tingog sa bokalistang rakista. Ang mga nanakay nagyango-yango sa ulo, samtang ang lawas pahipi ug may pinugngan nga pagkiskisi, ang kadaghanan nagtingsi. Sa daplin nga bahin sa sakyanan, mikitiwkitiw ang akong tudlo, sama sa pagkitiw sa usa ka guitarista sa gipasigarbo ko'ng banda sa Sugbo.

Walay konsiyerto sa among gisakyan, apan sama ra nga naki-jam ang pasahero sa rakista sa Sugbo tungod sa gipatukar sa driver - ang Bisrock! Ingon niini ang hulagway sa paghangop sa kinabag-ang Sugbuhanon sa Bisrock. Hinoon, dili sab nato mabaliwala nga naay pipila nga padayon nga misaway, mibiay-biay sa Bisrock, kay lagi kuno, Bisaya, luod paminawon, ug OA ra kaayo. Usa ra akong masulti nila, ambot lang!

Unsay Bisrock ba? Ang Bisrock usa ka pulong nga gimugna ug gipasiugdahan ug gamit ni Januar E. Yap, usa ka respetadong magsusulat nga Sugbuhanon (bisitahi, Januar E. Yap on Bisrock). Una kining nadungog niadtong 2002 aron sa paghulagay ang matang sa awit nga nalakip sa album sa Missing Felimon. Sa dihang nadungog na ang Bisrock sa kahanginan, migitib sab ang mga bag-ong dugong Sugbuhanon nga misuporta sa maong matang sa musika. Mitubo sab ang mga bag-ong grupo (banda) nga misulat, miawit ug mipadungog sa ilang awit nga naghulagway sa kinabuhi, pangindahay, ug panglantaw sa mga Sugbuhanon. Kini maoy nakapalagsik pag-ayo sa Bisrock misugnod sa mainitong paghangop sa katawhan.

Dili ikalimod nga nga ang Bisrock miumol ug dakong puwersa isip impluwensiya sa mga kabatan-onan. Pinaagi sa pag-awit, napagawas sa mga batan-on ang pangindahay nga kasagaran lisod nga masabtan sa mga hamtong. Nasayod niini ang pipila ka grupo mga nanglantaw sa maayong kaugmaon sa mga batan-on. Gani niining tuiga, atol sa bugnong lugaynon (Midterm Election), gipasiugdahan sa grupo ni Fr. Diola ang dakong konsiyerto nga nag-uluhan, "Ayaw ipalusot mga kandidatong shaburakot" aron ipaabot sa mga batan-on ang kaimportante sa pagpili ug ligdong nga maoy mamuno sa lungsod ug sa nasod. Kini nagpamatuod nga pinaagi sa musika mahimong maumol ang mga batan-on sa lunsay nga mithi nga angay nilang himoong sumbanan sa pagpakabuhi taliwala sa luog nga palibot.

Kaniadto pa, duol na sa akong kasing-kasing ang musika. Kaniadto, suod na kaayo sa akong dunggan ang rock ug mga anak niini, ug ilabi na gyod ang reggae. Mao nga wala ko matingala nga dali rang gihigup sa akong pangdungog ang Bisrock, hinoon angkonon ko nga megyo lahi kini tungod kay Bisaya man ang lyrics. Dinhi ko naikag nga mosulod sa kalibutan sa Bisrock. Gipaminaw. Gisabot. Gilambigit sa akong kasinatian ug sa kinabuhi. Ug hinay-hinay nakong nasabtan ang usa ka kamatuoran nga ang Bisrock dili lamang musika.

Nahimong inspirasyon ang Bisrock kanako aron mapalambo ko ang akong pagka-bisdak - ang akong pagkatawo isip Bisaya. Gani dako ang impluwensiya sa Bisrock niining akong pagsulay ug sulat gamit ang kaugalingong pulong. Kay para nako, dili ko mamahimong tinuod nga magsusulat kung dili nako kayang isulat ang akong pangindahay gamit ang kaugalingong pulong. Tungod sa Bisrock, nahimalag nako ang mga Bisdak nga nagmahal ug nagpalambo sa kulturang Sugbuhanon kinsa nagtudlo usab kanako sa dili ikabaylo nga kahibalo.

Samtang adunay pay padayon nga naminaw ug nagsuporta sa Bisrock, padayon nga madungog ang tingog sa mga kabatan-onan.

Nakapaminaw na ka ug Bisrock?

Ambot lang!

Visit also: Third Wave
Contact me: Send Mail
Subscribe in a reader


*Napatik sa Panguil Bay Monitor (Ozamiz City), November 12-18, 2007 issue.