Tinagsip sa hunahunang layaw

Usahay ganahan ko motipas aron abi-abihon ang mga hunahuna ko'ng layaw.

Kaganinang buntag samtang gipugos ko ang akong kaugalingon nga mobangon, mitugpa sa akong hunahuna ang pangutana, unsa kaha kung dili ang kasamtangan kung trabaho karon ang akong gisayuhan ug mata? Aw, kung si ku-an ang akong naasawa, mangadlawon gyod ko'g mata pirme.

Miligid dayon ang akong utok ug usa usa nga gipakli ang mga layaw nga posibilidad. Maayo ni da kay aron dili matay-an akong utok samtang wala pa ko sa atubangan sa PC. Mao ni ang mga tunob sa akong ki-at nga hunahuna kaganinang buntag:

Kung wala ko nagpamingaw-mingaw, tingali vet na ko karon. Kay mao baya gyod tong akong pangandoy sauna. Pastilan no, kung nadayon nga na-doctor ko sa mga hayop, dili kaha ko mo-descriminate ug hayop? Kay naa baya gyoy hayop ning kalibutana nga dili ko moduol, labaw na'g mohikap. Tingali nag-serbisyo na ko karon sa gobyerno sama sa mga classmate nako. O, basin naa ko sa research lab. Kalaay pod oi. Maayo rang wala ko mipadayon.

Nakahunahuna baya gyod ko kaniadto nga dili na lang moeskwela kay ako na lang mag-edukar sa akong kaugalingon. Pwede ba na? Ngano gong dili. Ganahan ra man sab ko nga magpabilin sa amoa - mahimong mag-uuma, sama sa akong amahan. Hala, kung na-farmer ko, motanom gyod ko'g daghang talong. In demand gyod ang talong. Dili lang ko anang pitsay. Kalabasa pwede kay akong i-award sa mga politiko. Magbuhi sab ko'g daghang hayop - baboy, manok, iro, kanding, baka. Pero taym pa, unya'g uwagan sab kaayo ang mga binuhi nakong hayop? Basin magsige na lang ug paduding ang anayan sa butakal. Unya magtimi-timi ug sabsab sa sagbot ang bayeng kanding kay naa sa iyang kilid ang laki? Basin magsige na lang sila'g saba para mapansin. Kasamok ana oi. Dili ko ganahan. Mayra sab wa na lang ko nag-uma.

Mag-nautical baya pod unta ko kay ganahan baya pod ko magsakay-sakay ug barko. Matod pa sa akong amigo nga si Kenny, tinood gyod daw nga "in every port, report". Sa iyang paglibot sa kalibutan daghan gyod kung siyang kalibutanong pagkaon nga natilawan. Ka-alegre no? Malingaw tingali ko. Taym pa, dili baya pod puro kalipay na lang sa barko. Mingaw baya pod na. Usa pa, unsaon na lang kung malunod ang barko. Unya imbis maluwas na unta ko, kaliton lang ko'g lamoy sa iho. Aw, ok ra man kung diritsohon ug lamoy, unya'g kuniskunison ko sa mahait niyang mga ngipon, usapon pag-ayo akong unod, ug supsupon ang tam-is ko'ng dugo (Note: Basta buotan tam-is ug dugo, kung badlongon parat, kung maluibon aslom, kung uwagan halang). Kangilngid anang kan-on ta sa iho oi. Waaahhh... tabang bai Ramses!!! Usa pa dili ko kabalo molangoy. Patay gyod ko ani. Mayra sab wala ko mag marino oi. Dili ko ganahan.

Kini, layo sa kamatuoran pero haduol sa posibilidad. Kung dili ko TW karon, posible nga singer ko. Ha? Damgo ra man ni oi. Pero ako lang gyod ning abi-abihon nga damgo. Bitaw, ma-singer gyod ko. Unsa kaha akong tingog no? Sama kaha sa tingog ni Elton John? o John Lennon? (kay nagsugod ug "J" akong ngalan. hehehe). Mas ganahan man ko'g naay banda. Unsa kaha nakong kalipay kung makanta nako ang, No Woman, No Cry; ang Three Little Birds; ug ang uban pa. Momata na ko oi. Damgo ra ni. Hehehe.

Sa high school pa ko, nagtoo baya gyod si ma'am Alma nga mosulod ko sa seminaryo. Iya gyod kong gipatawag ngano wala ko miapil sa seach in. Dili man sab gud ko sigurado. Pero kung na-pari ko, tua na sab kaha ko karon sa Italy, sama nilang Fr. Rafol ug Fr. Capadngan? Sama kaha ko nila kalig-on? O, dili ba kaha mabulingan nako ang akong pagka-pari tungod sa kahuyang nako sa kalibutanong tentasyon? Daghan mang paagi sa pag-alagad sa Kahitas-an. Dili pagka-pari ang tawag para nako.

Kung wala ko sa Sugbo karon, sigurado nga tua ko sa Molave "o tua sa ilawom sa yuta kung nadayon ang dautang laraw". Sayo sab momata kay moadto sa eskwelahan. Nag-atubang unta ko karon sa mga maanyag nga estudyante. Hahay.. Mao lagi, ako ra sab ang mag-antos kay dali ra ko maibog, unya dili makamao mo-diskarte. Aw, bawal sab diay. Dili gyod bawal, unethical para sa maestro nga makig-relasyon sa iyang estudyante. Dili na lang ko ana oi. Usa pa, kung gusto gyod unta nako ang pagtudlo, Physics baya ang gusto nako nga major. Pero naunsa man nga lahi man akong natugpahan. Mao nga dili gyod to para nako. Ganahan man ko magtudlo pero dunay lain nga gigahin ang kahitas-an para nako.

Nia na ko sa nag-atubang sa, usa gani ngalan ani? Kompyuter! Mao ron. Naa ang pressure pero kanunay naay challenge. Just for today, I don't ask for more.

Paapas pa diay, exciting pod akong trabaho kay paminaw nako, dali ra mag-Biyernes. Naa baya sa Biyernes ang misteryo sa kalipay. Walay kasakit sa Sabado ug Dominggo.

Ambot lang!