Ginagmay

Daghan na kaayong mga kompaniya nga mihangop sa "ginagmay" isip marketing trend. Kini aron ma-cater nila ang mga mamalitay nga dili gusto ug dinagko. Pananglit ang Coca-Cola, sauna, 8oz. ra baya nga botelya ang pinakagamay, karon naa nay Coke sakto. Pero kulang man na sa akoa ang coke sakto, coke litro, pwede na. Ang mga mantika, toyo ug suka, naa na sa sachet. Daghan na pod ang gagmay nga pakite sa sabon. Bisan gani ang paborito nako nga cheese naa nay gamay nga pakite. Naay poy gamay nga pack sa gatas, kape, etcetera.

Hinoon, dili man tanan ganahan ug gamay, ang uban dako gyod ang pilion. Mopalit gani ug saging, pilion gyod ang bus-ok ug ang dagko. "Hoy, kung mopalit, palit lang ayaw pislita kay mabun-og!" Aw, processed products man diay atong gihisgutan, sige balik ta ug hisgot sa dinagko. Sa America kuno dagko pod ang gusto sa mga tawo. (nabasahan ni nako) Ang ilang drinks gusto extra large, ang burger pod kuno, gusto nila dagko. Sa atoa, naa pod baya ganahan ug jumbo hotdog, ang uban lami-an gyod ug footlong.

Maayo baya ning dinagko kay dili kalas, makatagbaw gyod ba. Pero maayo lang na kung naay igong kuwarta. Naa baya pod nga igo-igo ra intawon ang salapi, sama nako. Mao bitaw nga kung sa litson pa ni, palit lang sa ta ug kinilo. Mahal baya ang tibuok litson.

Ma-relate baya pod ni sa tinuod nga kinabuhi. Matod pa ni Cesar B., ang kanhi editor sa Tngog (Misamis), ang mantalaan nga dali rapod kaayo nahanaw, magmantinir lang daw siya ug kinilo kay samok ang tibuok. Tinood bitaw, samok man pod ning naay asawa, kabit-kabit lang usa. Pero Cesar, laay pod baya ning sige na lang ginagmay. Hinoon puol pod ang tibuok.

Para nako, depende ra man, usahay ganahan ko mopalit ug ginagmay, usahay ganahan pod ko ug tibuok. Kining akong pagsulat-sulat ning ubos uyamot nakong blog, ginagmay ra ni. Ang akong pagsuwat-suwat ug mga unsa-unsa lang nga may kalabutan sa trabaho, pamugas gyod ni. Ang akong padula sa internetan, ginagmay ra sab, naa man pod koy dula nga dinagko. Ang akong gugma, dinagko na man unta to pero gikuniskunis man sa kasakit maong karon, ginagmay na lang usa intawon.

Ambot lang!