Just push

"Just Push", mao kini ang ulohan sa gipabasa kanamo ni Sister atol sa among gipahigayong "recollection" pila na ka tiug ang milabay. Dako kaayo to ug "impact" sa akong kinabuhi mao nga dili nako kini malimtan.

Mao kini ang sugilanon:

Adunay usa ka tawo nga gisultihan sa Diyos sa padtulod (push) sa usa ka dakong bato. Tuod man sa walay panguta o pagduda sa motibo sa Ginoo, iya kining gituman. Iyang gitulod ang dakong bato. Iya kining gitulod adlaw ug gabii. Ug padayon niya kining gitulod.

Usa ka adlaw may misangpit kaniya. "Hoy! Nag-unsa man ka diha?"

Siya mitubag, "Akong gitulod kining dakong bato, sumala sa gisulti sa Ginoo kanako."

Mikatawa ug makusog ang estranghero.

"Mao ba? Pastilan kalooy pod nimo oi. Pila na ba ka tuig nag-sige ug tulod nianang dakong bato? Mi-irog ba kana ug usa ka pulgada?"

Wala mitubag ang tawo, gibati niya ang kaulaw sa iyang kaugalingon. Dili na niya mahinumduman kung unsa na kataas sa panahon nga siya nagsige ug tulod sa dakong bato apan wala kini mi-irog bisan usa lamang ka pulgada.

Mipadayon ug bi-ay bi-ay ang estranghero kaniya.

"Bwahahaha...Pagka-ugok baya nimong tawhana ka. Bogo ka, way kartiyo. Gahago ka lang, too pod ka sa gisulti sa Ginoo oi. Wa jud diay ka ka-G (ka gets) nga gi-ulog ulogan lang ka sa Ginoo. Kataw-an lang ka niya"

Tungod sa nahitabo, mihunong ang tawo sa pagtulod sa dakong bato ug iyang gitawag ang Ginoo arong mopadayag sa iyang kasagmuyo (frustration).

"Ginoo, naunsa man sab ka oi, imo man kong gisugo pagpatulod ning dakong bato, nasayod baya gyod ka nga impossible kini nako nga ma-irog. Tan-awa gud, dugay na ko sige tulod wa gyod mi-irog. Kalain pod nimo oi. Pag-sure oi!!!"

Mitubag ang Ginoo.

"Oo, tinuod nga gisultihan ko ikaw nga itulod ang maong dakong bato. Apan giingon ko ba nga imong i-irog ang dakong bato?"

"Wa pod nuon"

"Ang akong giingon, itulod lang. Tungod sa imong pagkamatinumanon sa Akong kabubut-on, imo kining gihimo. Wala man kini nimo ma-irog, apan tan-awa ang maayong resulta niini sa imong kaugalingon. Dili ba mibaskog ug milig-on imong lawas. Dili ba nga tungod sa imong gibuhat, mas makabarog ka na karon sa imong kaugalingon? Ug karon mas lawom na ang imong pagkatawo."

Usahay, dili masabtan ang kabubut-on sa kahitas-an. Usahay dili moabot ang gipaabot, dili matuman ang gusto tang mahitabo.

Just push.....

Padayon sa pagpakabuhi nga tinarong.

Mao sab kini ang isulti ko sa akong kaugalingon kaniadto sa dihang halos katunga sa akong mga estudyante wa makasabot sa akong gitudlo. Wala ko mi-surrender, padayon ko sa pagtudlo, kay para nako, kung dili man nako mahimo ang tanan, at least, naa koy nahimo. Just teach and touch lives.

Usahay dili lang nako malikayan nga naa pod koy "complain". Usahay, makaingon ko, ngano nga samokon pa man ko nga nagbag-o na man ko. Nganong dautan man gihapon ang tan-aw sa pipila kanako? Apan wala ko sila mahayi hinoon padayon ko sa pagpaningkamot aron padayon ko ang panaw sa bag-ong kinabuhi.

Aw, hangtod karon, just push lang gihapon.

Ambot lang!