Monday, 4 February 2008

What's your style?

Adunay nagkalain-laing "style" sa pagkaon. Adunay pormal, aduna say kaon nga kinawboy. Ang uban magdali-dali og kaon, halos dili usapon ang sud-a'g kan-on.

Aduna say uban gusto ang dugay apan kanunay nga inusapay. Daghan ang ganahan ug init-init pa, apan duna say pipila nga mas ganahan kung bahaw na.

Ang tambag ni Lola kung mokaon ug saging, "gamaya la'g paak aron dili matuk-an". Ang tambag ni lolo kung mokaon og ensaymada, simhuta una basin pan-os na

sa dili pa pang-iton. Ang tambag ni Han sa tanang mangtas sa Magallanes boarding house, "ayaw kinamuta kay mapan-os!" Naglibog na ko uy!

Taym pa, layo pa man diay ang nutrition month. Pero pila na ka adlaw, Valentine's Day na man, mao nga dili lang una nako batbaton ang bahin sa pagkaon - ako

na lang kawhaton ang nagkalain-laing "style" sa pagpanguyab ug pakigrelasyon.

Looy Style

Sa overpass sa Fuente naay bata diha nga luoy kaayo'g nawong, mangayo ug piso kay ipalit ug pan. (Di ba gud tag-dos na ang pan?) Malooy pud tawon ang seksing dalaga nga nag-opisina sa Metrobank Tower, modugo gyod. Makatunol gyod ug piso. Ingon ana sab modiskarte si Dodong, palooy-looy ba aron higugmaon. Uy Inday, angay ba diay ilimos ang gugmang tinuoray? Mao bitaw ang mga dalagang maestra sa bukid tungod sa kalooy sa drayber sa habalhabal, minyoon na lang niya. Mao nga dili ta kaingon nga ang kargador sa Carbon dili maka-dama sa gugma sa humot nga dalaga sa CBP ug IT Park. Kalooy no? Ang asawa seksi-tari sa DSWD.

Romantiko Style

Mao ni ang "classic style" - ang estilo sa mga mat-an na sa pang-gobyerno este sa pakigrelasyon. Sigurado man gyod nga molusot basta suwabe nga estilo. Hinay-hinay ba pero dulot gyod. Kini bitaw'ng bato disan unsa kagahi, mohomok ra man gyod na sa bugnaw'ng lumot. Matod pa sa tropang mangtas, mao ni ang style nga inantigo! Kining ubang opisyal sa Customs ug LTO mga mat-an man sab. Romantiko sab ni sila sa?

Dog Style

Mao ni ang style sa mga mangtas sa unod ug bukog. Lisod pod ni nga istilo kay mapusgay man gyod si Inday. Sama gud sa iro gud, kung moduol ang unod, aw, mapaghutan gyod. Pero kining iniro pinangita sab sa uban. Ambot nga duna man say ganahan.

Lumay Style

Ang mga karaang tawo duna may linatin nga yamyam ug habak para lumay. Epiktibo baya gyod kuno. Ambot kung naa pa ba na karon. Ang yamyam man god karon dili na linatin, naay Binisaya, naa say Iningles. Ang lumay dili na man bato nga gilanahan sa Biyernes Santo - kay ang lumay nato karon salapi na man ug posisyon sa katilingban. Mura'g tinuod ni da kay akong nabantayan sa "Wanted Pangga Program" sa DYAB mangita man ang mga babaye ug mga lalake nga naay trabaho. Gil-asan lang ta maminaw. Ambot giganahan sab ang ABS-CBN niini nga programaha. Sa ato pa, looy ang way trabaho? Aw, pagpuyo mo uy!

Kining upat, style ra na. Kamo nay mangita sa strategies unsaon pagkab-ot sa objectives. Unsay objectives ba? Pareho gud sa basketball, dribble usa sa dili pa i-shot! Pero ang style ni Bai Danny, shot una dribol. Ma-pawl nuon. Karon da best na ang style sa akong amigo.

Si bai Ramses kaha, unsa kaha iyang style? Si bai Peter kaha no ug si Bai Clarence? Hala, dili na lang ko mangutana kay total, mga higala man nako ni sila. Ila lang unyang i-email nako ang ilang style ug strategies; pilay palad, ang batang buotan, maka-dama diay karong Pebrero. Aw, unsay dugayan, minyo dayon sa Hunyo.

What's my style?

Ambot lang!

Visit also: Third Wave
Contact me: Send Mail
Subscribe in a reader
AddThis Social Bookmark Button

*Napatik sa Panguil Bay Monitor (Ozamiz City), February 4 - 10, 2008 issue.

7 comments:

tikya said...

wa man diri ang style na akong gusto! waaaah

batang buotan said...

maam tikya, unsa man diay style imong gusto? kay praktisan gud..hehehe..

ambot lang!

titov said...

naapil ba ang hangyo-lubo style?

rAzAzO'o said...

ambot lang ha? naa ba pu'y INATO STYLE? kana bang ug unsay naa unya lami maoy atong ihikay para sa atong pamilya ug kahigalaan...

TAGBAO STYLE? kana bang murag wa kakaon ug tulo ka bulan unya haskang kinauna'y nga murag mahudtan...

BINAHAW STYLE? kanang adik sa bahaw, hilabihan ang tinughong!

PASTILAN STYLE? kanang bisag unsa na lang ba, unya pagtilaw nimo makasiyagik ka"g 'pastilan! unsa ma ning jawa-a, way lami!'

ambotlang ha?

batang buotan said...

@titov: wala naapil ang "hangyo-lubo style" da. hehe

@rAzAzO'o: kasulay na ko anang
TAGBAO STYLE. natagbaw gyod intawon ko.. hehehehe

kadaghan man diya sa style no? ambot lang!

weng said...

kuya ang wanted pannga sa FM station man sa ABS-CBN ang MOR LUPIG SILA pero di sab ko sure if naa bay wanted pangga sa DYAB.

kanang style nga imong gi present sa mga style ra na sa lalaki? kai kahibalo naka naa say style ang mga babaye. kai permi man gud kong maka dunggog ug estorya sa mga katigulangan nga lahi na gyud kuno ang mga babaye karon mao nay manguyab, mao nay motipon sa mga lalaki, mao nay mag una-una.

hay nako makahuna-huna man sab ko anang paluoy luoy style kai ako ra ba ang klase sa tawo nga dili kahibalo maluoy

straight from the heart genuine style nalang kai mao na ang pinakaromantic.

Cebuyas said...

Unsay tawag sa style nga ipatong ang usa ka tiil sa lingkuranan?

Morag mao na akong style.