Monday, September 29, 2008

Gitik-Gitik sa Pulitika

Kining ubang mga misikat, nagtoo na gyod nga giganahan na pag-ayo ang mga tawo nila tungod kay sige silang makita sa telebisyon ug mabasa sa pamantalaan. Nagtuo na gyod sila nga ituboy sila sa katawhan ngadto sa Senado ug Malakanyang tungod lang sa ilang kasikat.

Kataw-anan, apan tinuod nga daghan sa mga misikat nga mga personalidad ang gikatahong molansar sa nagkadaiyang posisyon sa 2010.

Si Manny Pacquiao nga misikat sa boksing, misulay na niadtong eleksiyon sa 2006 apan napildi. Wa gyod natagam, modagan pa gyod daw sa 2010. Aw kung sinumbagayon, maingon nato nga duol gyod sa kadaugan.

Si Vilma Santos ug Bong Revilla naghinam-hinam na kuno nga mamahimong bise-presidente? Maayo kaha?

Ambot kung ipadala ba sa Ginoo ang iyang anghel aron mobalita kang Bro. Mike Velarde nga angayan na siyang ma-presidente

Sa tanan nga gusto magpasikat nga sikat wala nay makalupig kang Bayani Fernado. Unsa man kunoy motibo sa pagplastar sa iyang nawong sa tarpulin, aber? Matod pa ni Bayani, bisan pakan-on pa siya'g bildo, iyang buhaton aron lang ganahan ang mga nagtan-aw sa programa sa telebisyon nga "Celebrity Duet". Kung modaog si Fernando sa Celebrity Duet", manimaho sab kaha siya sa 2010?

Si Gina de Venecia, nga hilabihan na ang pagdaut sa kanhi kauban sa mga misteryo este sa iyang mister nga si Jose de Venecia, gusto sab daw mudagan isip Senador. Hay manay Gina! Aslom baya ang balimbing, di ba?

Si Joey de Venecia nga nailhan tungod sa isyu sa NBN-ZTE, gusto sab daw mag-Senador? Bisan si Jun Lozada, gusto sab? Hala, mangatawa na ta uy!

Ang labing kataw-anan, mao nga ang usa ka ginganlan ug Mary Grace Poe Llamanzares, anak sa napildi ug namatay nga si Fernando Poe Jr. Gibalita nga lig-on daw nga kandidato sa pagka-Senador sa 2010?

Mao na gyod tingali ni ang timailhan nga nagkaduol na ang panagna sa ermitanyo sa Mahayag nga ang Senado mamahimo nang carnaval. Aw hinoon karon ang Senado nahisama na man lang sa lapad nga kasagbutan nga gidulaa'g patid-lata.

Sa atong nasod, gawasnon ang matag usa nga buangon ang iyang kaugalingon. Apan buang na ba gyod ang mga Filipino nga mo-boto sa maong klase sa mga kandidato?

Gitika ko Noy!

Ambot lang!

Visit also: Third Wave
Subscribe in a reader
AddThis Social Bookmark Button

4 comments:

Bomzz said...

hastang nindota jud pag han ay sa imo suwat, saktu gyud di angay butaran ang way angay sa paghingkod sa ako huna huna wala jud ko mobutar pa sa pres. senador nibotar ko sa amo lungsod kadtung haduol sa akong dughan og angayan sad. mao ra ni batang buotan ako ika ambit heheh salamat

Nyl said...

hahahahha!ganahan jud kau ko sa imong sundayag batang buotan...hastang lingaw dah...nalirong kog kinatawa. tinuod man baya na nahimo najud karnabal ang politika pero unsaon man na mao naman jud guro ni ang kamatuoran.nah hala!kataw-an nalang nato kay kung seryosohon basig kita ang mabuang.hehe

nice nice entry!:)

Anonymous said...

Duna koy nakitang duha ka klase sa mga politiko sa Pilipinas. Una ang mga politicians by inheritance. Anak, asawa o bana sa politiko (patay o buhi). Ikaduha, ang mga politicians by popularity. Sikat,artista sa pelikula, maayo manontok, seksi. Duha pod ka klase ang mga botante. Paryente ug fans sa politiko. Alegre!

Unknown said...

idol kaayo tika musulat ug bisaya sir.

mao nga bisaya sab ako gamit sa akong payag www.dahonglaya.com

kulbahinam prmi ang sunod nga post :)