Thursday, January 10, 2008

Kaminyoon

Ang kaminyoon dili sama sa pagkaon nga pwedeng iluwa kung mapaso, tambag sa mga katigulangan. Kinsa bay nag-ingon nga dili na mauli ang asawa? Kulataha di ba mouli na - dili na kinahanglang i-uli. Mas daghan man asawa ang miuli kaysa giuli.

Matod pa sa nanggungis na ang pasiaw bahin sa kaminyoon, ang asawa sama na lang sa sardinas, ablihan lang kung wa nay lain. Ang asawa mura'g ligid, bombahan lang kung mahiyos. Ang bana mura'g iro, mo-uwang lang kung manguwag. Apan ang kaminyoon dili lang pakighilawas. Mao nga magkadugay, ang asawa ug bana mura na la'g igsoon.

Kining kaminyoon man gud usa ka dakong kabu-ang - tam-is sa sinugdanan, magkaaslom kung mapasagdan. Gidugang sa usa ka wa nagpaila nga bana, ang asawa mao ang nilalang nga ikauban mo sa tibuok kinabuhi nga magdala ug magmugna ug kasamok nga dili unta nimo masinati kung nagpabiling kang ulitawo. Gusto pa ka magminyo?

Pila bay magasto sa kaminyoon? Dili maihap pila kay mogasto man ka hangtod sa hangtod.

Daghan ang nagminyo tungod sa gugma, apan daghan sab ang nagminyo tungod sa kwarta. Usa bay mas importante, ang gugma o ang kuwarta. Mas nindot gyod kung naa ang duha.

Kuwarta ang nag-unang hinungdan sa panag-away sa magti-ayon. Dili tinood nga bahala'g saging basta loving! Mahal na kaayo ang saging.

Swerte kuno kung magminyo sa 2008. Apan ang tinood dimalas ka kung magminyo ka sa bisan unsang tuiga.

Kaniadto magpakasal ang lalake ug babaye kung dako ang buwan. Karon, magpakasal kung modako ang tiyan.

Walay perpekto nga kasal. Kung engrande ang kasal daghang makita nga "apan". Kung simple nga kasal, daghan ang makasaway. Kung walay kasal, daghan ang magbagutbot. Nagpasabot nga ang kamiyoon dili paraiso - ang kaminyoon usa ka sakripisyo.

Huna-hunaa sa makadaghan sa dili ka pa magminyo. Timan-i baya nga ang kaminyoon sama sa pagkaon. Matuk-an gyod ka kung dili nimo usapon.

Ambot lang!

Visit also: Third Wave
Contact me: Send Mail
Subscribe in a reader
AddThis Social Bookmark Button

*Napatik sa Panguil Bay Monitor (Ozamiz City), January 14 - 20, 2008 issue.

12 comments:

Anonymous said...

Kahibalo ba kamo nga, sa Estados Unidos, ang numero unong hinungdan sa "divorce," mao ang kaminyoon?

JGG said...

Yehey! Maayong pagkasulti, cebuyas! Korek kaayo.

Utah Mommy said...

Bitaw tinuod gyud ni pero swerti na gyud kung maminyo ka nga alaga kaayo ka sa imong kapikas sa kinabuhi bisan pa man sa mga problema nga masugatan sa kaminyuon nga kinabuhi di gyud angay magdali kay mapaso unya di na maluwa

weng said...

sakto ka, kon akoy magpakasal ipa-atol nakog kadlawn aron painit nga kape ug pan ra ang gasto unya dili lang espesyal ordinaryo lang aron di dako ug pangayo ang simbahan seryoso ko ani gamay.(bitaw magpray sab tawn ko nga dili mamahimong bulilyaso ang akong kaminyo-on, pero ug mahitabo nga disaster ang akong married life (simbako lang jud) aw ill die loving only one person and thats the person i married. its indeed a risk to get married.

Anonymous said...

Just a regular visit, hope all is well. Take care and have a great weekend.

Tito said...

sulayi ninyo ang kaminyoon. Lamiiiiiiiii kaayo.

Michelle said...

oi batang buotan, ang mapaso noh kadto rang mokaon nga dili magbantay kung init ba diay ang gikaon kay tingali gigutom o nagdali ba kaha aron mahuman dayon. hehe dapat dili jud dretso ug kaon, klarohon usa ug tarong kung nagbukal ba sa kainit o ok na. mas maayo nga pabugnawn usa gamay aron di mapaso. haha

Anonymous said...

part it's been quit long since i last visited your blog murag na pre-occupied kos drama sa kinabuhi... nagbagotbot bya jud kas kaminyoon...

hehehe.. be safe parts!!!

Nancy Janiola said...

hahaha..aprub jud kaau ko sa imong entry bro!

Gypsy said...

Haha! Lingaw lagi imohang blog. :) Tinuod gyud ka, murag pagkaun ang pag minyo--matuk-an kung dili usapon. Hehe. Agi-agi lang...:)

Edcel said...

hahaha. sige kog katawa sa pagbasa. pero tinuod man sad. hahaha. unya na sa nako nang minyo-minyo. enjoy life sa ko. hehe

soloflighted.com

Rica said...

i think ur just being pessimist on that "marriage" issue thing. not all marriage are like that as long as both of you knows how to handle and mature enough to enter. dabah????hehe