Thursday, 30 August 2007

Putina

Ang sukdanan kuno sa kaanyag sa babaye dili lang ang hamis nga kutis, bus-ok nga dughan ug nindot nga kurba sa lawas. Matod pa sa iyaan kong ulay, ang ilok maoy magsulti sa tinood nga kaanyag sa usa ka babaye.

Magkapahimoot gyod kung mobatbatbat na gani siya sa mga makauulaw kuno nga ilok sa mga kadalagahan. Naa kunoy ilok nga haskang pagkalagom pution man unta ang pamanit, nalagom sa buling - katamnan intawon ug sibuyas. Naa say uban tag-as kaayo ug balahibo, kulot pa gyod kaayo; apan ang makapasubo nga pamalandungon mao ang dalaga nga baho'g ilok. Hahay. "Baho'g pako" mao na ang bansag sa mga baho'g ilok. Pastilan, labi na ug magbasa na. Hahay, bahala na lang unta bisag unsang bahin sa lawas ang magbasa, dili lang ang ilok.

Ambot lang kung naay lalake nga ganahan makiglabing-labing sa babayeng baho'g ilok. Bisan pa tingali ug Angel Locsin ka-gwapa kung makalipong ang pako, pastilan dili kaha mag-ceasefire?

Maayo na lang gani aduna nay mga produkto nga pawala sa baho sa ilok, makaputi pa gyod. Hay, putina ang ilok nila. hehehe.

Kaniadto tawas ra baya ang ibagnos sa ilok aron mawala ang baho. Unya nusnusan ug udlot sa kapayas aron maputi. Karon, hayahay na kay naa na may mga baligya "for ilok purposes".

Sa pag-uso sa mga bisti nga gihinganlan ug "spaghetti" pastilan exposed na kaayo ang mga pako. Hahay, daghan man gyod motan-aw sa pako kay duol baya na sa nahimutangan sa kasingkasin. Pareho ra god na sa pusod sa babaye, duol na na baya na sa tinuod, diba?

Maayo na lang kay wala ko nahilambigit sa mga baho'g ilok. hehe.. Aw, ok ra man sad kay naa baya baligya nga "for ilok purposes".

Ambot lang!

Magtutudlo

Everyone can teach but not all are teachers.

Mao kini ang gipahinumdom kanako sa akong inahan sa dihang mihukom ko nga magtudlo. Akong nabati nga gusto niya nga ang kursong Edukasyon ang akong pagatun-an sa kolehiyo, apan lagi kay sa akong paminaw kaniadto dili nako kaya (kay maulaw man ko kaniadto motindog sa tunga atubangan sa daghang tawo) mao nga mikuha ko ug lain nga kurso. Mao nga sa dihang miingon ko nga magtudlo iya dayon kong gipahinumduman.

Ang maong mga pulong mitatak gyod sa akong alimpatakan. Gani mao kadto ang nahimo kong giya sa tulo ko ka-tuig nga pagtudlo.

Kitang tanan, pwede magtudlo. Gani maayo man kaayo motudlo ang uban, ilabi na ang mga ginagmayng kabuang. Usahay tudlu-an ang gagmayng bata nga ang iningles sa saging "lakatan", ang iningles sa kanding "meee", ang iningles sa baka, "mooo".

Dili gyod ko kalimot ana kay amo na ang gitudlo sa among silingan nako. Apan katong nagtudlo kanako sa among mga butang matawag ba nga magtutudlo? Dili kay sayop ang iyang gitudlo ug nasayod siya nga sayop kini apan iya gihapong gitudlo aron lang kataw-an ang sayop.

Daghan sa mga kaila ko nga kanhi nagtudlo ang mipadayag sa mga kabadlongon sa mga tinun-an. Adunay magsige ug reklamo nga mga gahi pasabton ang mga estudyante. Sa akong pagpamalandong, nahinumduman ko ang pangutana sa among magtutudlo sa Journalism. What is Journalism for you (as journalist)? A vocation, a career, a profession.

Sa mga magtutudlo angayan lang nga sa makausa pa pamalandungan kini. What is teaching for you? A vocation, a career, a profession.

Ang sukdanan sa pagkamagtutudlo dili lamang sa iyang dakong kahibalo sa "subject matter". Laing sukdanan mao ang iyang dakong pagsabot sa iyang dakong responsibilidad isip magtutudlo.

Makamao ko nga motudlo unsa ang "noun", kung unsaon pagsulat sa balita ug editorial. Pwede nakong tudluan ang akong manghod kung unsa ang kalainan sa "speed' ug "velocity" ug ang "Newton's Law of Motion". Apan ang dili nako sigurado sa pagkakaron kung ako usa ba gyod ka magtutudlo - tinuod nga magtutudlo. (wa na man pod ko nagtudlo karon)

Ambot lang!

Wednesday, 29 August 2007

Way title

Kainan na! Lunch break na man diay. Wa kaayo nako nabantayi ang oras. Mora'g bag-o ra man gud ko nagsugod ug tuslok-tuslok diri. Pila na diay ko ka oras nga naghilom lang, way yawyaw? Pila na gani ka mug (dili ko makontento sa cup) nga kape akong nahurot? Oi, kapila na diay nako gibalik-balik ug paminaw ang mga huni pangtrabaho? Ambot lang!

Ikaw, unsa nga musika ang imong gipaminaw?

Nakahinumdom ko sa akong nabasa sa Developer Magazine bahin sa pagtuon nga gihimo sa Microsoft. Gusto man gud masayran sa maong kompaniya kung may kalabutan ba ang musika ug ang software development. Kay matod pa ang pag-develop ug software mura man sab ug musika, adunay daghang mga pamaagi, ug adunay iyang kaugalingon nga hiyas (hiyas gyod?). Nasayran sa mga nagtuon nga kadaghanan sa mga "developers" maninaw ug "rock music" samtang magsulat sa mga "codes". Dili diay madaot ang ilang concentration sa saba nga klase sa musika. Hinoon naay uban nga mas gusto ang medyo hilom nga klase sa musika. Ang importante, nakita nga naay relasyon ang musika sa "nature" sa ilang trabaho.

Mao diay nga kasagaran sa akong kaila nga programmer, mga rakista?

Ang musika lakip na sa kinabuhi sa tawo. Matag tawo aduna lay lain-lain nga gustong paminawon. Naay gusto ug saba naa say gusto ug pangpatay nga music.

Akong gusto kay dili ra kaayo saba, dili ra sad kaayo mingaw. Pero naa koy kauban diri nga dili music ang obsession, hubaron niya sa bisaya ang mga inengles diri, ambot nakatabang ba siya o nakapasamot sa among kalibog. Niay sample sa iyang mensahe ganina (IM). Ako lang gi-edit ang computer name.

maayong butang, naa ra sa \\[computer name]\Virtual_PC_Max ang mga VPC for bintana ekspe (sp1, sp2), bintana dosmil [2000] (sp3, sp4, advanced server sp3, advanced server sp4) ug bintana dosmiltres [2003] (native, sp1, standard sp1, standard sp0)... salamats...

Dugay gyod ko kasabot. Dili kaha masuko si Bill ani? Basta mao daw na ang bisaya.

Oi, hapit nang 1pm, sugod na ko ug trabaho.. hehehe.. Dalikyat ra ko ug yawyaw..

Ambot lang!

Tuesday, 28 August 2007

Bisdak, ikaw ba kini?

Nakatatak na sa mga Sugbuanon ang pagkamaabi-abihon, pagkamapahiyumon, pagkamatinud-anon ug labaw sa tanan, ang pagkabuotan (apil ko ani? hehe).

Sa programang Noypi sa ABS-CBN TV-2, gihimo ang "social experiments" dinhi sa Sugbo. Sa maong "social experiments" masayan ang reaksiyon ug pagabuhaton sa ordinaryong Sugbuanon sa usa ka sitwasyon.

Gilakip sa maong "social experiments" ang pagpanguyo ug tabang unsaon pag-adto sa usa ka lugar ug ang pagtuyo ug bilin sa cellphone.

Sa unang gihimo sa programa, adunay mga babaye nga nangutana (naa sila sa Mactan Shrine) kung asa makapalit ug gitara. Usa ka lalaki ang mitubag. Mihangyo dayon ang mga babaye nga pakuyog sila sa palitanan ug gitara. Sa walay pagduhaduha, gikuyugan ni manoy ang mga babaye. Ulihi na lang niya masayran nga gisulayan ra diay siya. Ingon niiana motabang ang mga Bisdak, mao nga dili ikahibong nga daghan sa mga turista ang na-enganyo gyod sa Sugbo. Ang Sugbo dili lang gipanalanginan ug natural nga kaanyag, naa usab ang mga ligdong mga mga Bisdak.

Gihimo usab ang laing eksperimento, nabilin kunuhay ang cellphone sa usa ka mamalitay sa tindahan. Didto napamatud-an ang pagkamatinud-anon sa mga ordinaryong Sugbuanon. Sa Taboan, walay pagduhaduha nga giuli sa tindera/tindero ang cellphone sa mamalitay. Giuli sab sa usa ka fruit vendor, tindera sa usa ka hardware ang "nabilin" nga cellphone. Gani gipanghimangnoan pa man sa usa ka tindera ang "nakabilin" sa cellphone nga mag-amping gyod sa iyang butang. Concern!

Naa na gyod sa dugo sa mga Bisdak ang maayong mithi nga angayang sundon.

Kung aduna man gani mga pasaway, pipila lamang sila.

Ang ako kahang mga amigo, buotan o pasaway?

Friday, 24 August 2007

Inspirasyon sa kinabuhing gubot

Sa akong blog nga "just for today" akong gisulat ang mga ginagmay ko nga pangindahay sa kinabuhi may kalabutan sa pagbati (gugma na pod?). Ang maong blog mao ang gihimo ko nga pahungawan sa akong gibati sama sa akong journal.

Dunay usa nga nga mipaambit bahin sa Gestalt Prayer (basaha lang unya, naa sa ubos..yawyaw sa ko ha?) ug sa dihang gibasa ko kini, nahaum kaayo kini sa kasamtangan kong sitwasyon.

Mapasalamaton ko kang weng (blogger na siya) sa pagpaambit niadto. Sa pagbinayloay namo ug mensahe (IM), iya pang giablihan pag-ayo ang akong salabutan. Nasayod tingali siya sa akong gibati nga kaguol mao nga iyang gipahimundom kanako nga ako malipayon kaniadto nga wala ko pa nakaila ang akong hinigugma, ug karon nga wala na siya, dili na lang ba diay ako magmalipayon?

Nia, gusto pod nako kining ipaambit kanimo.

Ug kay lagi Bisaya man kining akong blog, akong gihubad ang maong "prayer" sa pinulungan nga haum dinhi.

Ania ang Gestalt Prayer (Fritz Perls, M.D.):

Buhaton ko ang akong gimbuhaton
ug imong buhaton unsay angayan
Ania ako ning kalibutan
dili aron magpakabuhi sa gusto mong mahitabo
Ug wala ka nagpakabuhi ning kalibutana
aron matuman ang akong gusto

Ikaw mao ikaw, ako mao ako.
Ug kung itugot sa kahigayunan
nga magkatagbo kita, pagkaanindot,
Kung dili, wa kitay mahimo

Samtang namalandong ako, nahinumdoman ko ang 'Serenity Prayer' nga nakat-onan ko usa pa lang ka tuig ang milabay.

Ang 'Serenity Prayer' maoy naglig-on kanako samtang nasinati ko ang dakong kasipok sa akong kinabuhi nga malampuson kong nasulbad. Nia ang 'Serenity Prayer' nga akong gihubad sa pinulongang bisaya. Sa mga hubad nga akong nadungog kanhi, ang 'God' gihubad ngadto sa pulong 'Ginoo'. Dinhi ang akong hubad, 'Labaw'ng makagagahum'.

Serenity Prayer (Reinhold Neibuhr, 1934):

Labaw'ng makagagahum, hatagi ako ug lawom nga kalinaw sa pagdawat sa mga butang nga dili nako mausab, ug ang katakos sa pag-usab sa mahimo kong mausab, ug ang kaalam sa pag-ila sa kalainan.

Sa katapusan, ania usab ang akong hubad sa The Key to Mental Health:

The Key to Mental Health (Anonymous):

Sulbara ang kasipok sa mga ginagmay'ng butang tungod ug alang sa mga dagkong butang; mao nga pagtagbaw aron dili ka matagbaw sa daghang mga butang.

Hala kadaghan na ani sa? Hmmm... syaro kung tunlon lang gyod tanan nga mensahe niining tulo, wa na gyoy malisu-an sa maayong pangisip. Ang nakaparat kung human ni mabasa, maglibog na hinoon, dili na makatulog, magsige na lang ug pamalandong, magyawyaw, dili na mokaon, mahadlok na sa hangin ug tubig, ug makadungog na ug gamhanang tingog. Waah..patay kang bata ka.. mabuang gyod ka!

Ambot lang!

Bag-ong pulong

Sa akong dakong pangandoy nga makat-on pag-ayo sa atong pinulongan, natagbuan nako kining mga bag-ong pulong.

Kini nga mga pulong gisugyot o minugna sa mga miyembro sa lunsayng bisaya (yahoo group). Kining maong mga pulong wala pa kaayo gigamit. Gani sa tinood lang karon pa nako ni sila nahinagbo ug wala ko pa kini nagamit pa sa akong mga sinulat. Sulod sa usa ka bulan pa lang nako ug suway pagsulat gamit ang pinulungang bisaya, daghan ko ug nakat-onan nga mga bag-ong pulong ug ilabi na gyod sa pag-gambalay sa mga pulong nga akong nakat-onan usab sa mga bisaya bloggers.

Mga bag-ong pulong:

computer dagitabyan
computer dagitok, dagisip,dagibay
computer dagitabnong utok, utok dagitabnon
computer dagitab-utok
ice batonaw (bato nga matunaw)
internet gambalayan(gam'anan og balayan)
surf lawig
technological balugnason
technologist tigbalugnas
technology balugnas
telephone layo'ngog (layong tingog)
telephone layo'ngog (layong tingog)

Unsa kahay bisaya sa musonod nga pulong?

download
upload
server
software
hardware
browser

...diri lang usa taman, sunod na ang uban.


Ambot lang!

Kumbira

Tulo na lang ka Biyernes, pista na sa amoa (among baryo). Karon pa lang gani mura'g mapanglantaw ko na ang pagpangandam sa dakong kumbira. Ambot ba bisan magsige ug reklamo ang mga tawo nga krisis ug nag-ilaid ang kahimtang, bongga man gyod ang pista labi na sa probinsiya.

Mao nga pagkahuman sa pista daghan magmulo sa ilang lawas, naay wa kahilisi, naay nalab-ana ug kaon ug mitaas ang presyon sa dugo, naay hang-over, ug uban pa. Basta kumbira abunda gyod ang humba, litson ug uban pa.

Gawas sa baboy, dili pod mawala ang karneng kabaw matag pista sa Sta. Cruz. Usahay tulo ka kabaw ang ihawon unya ambitan lang ni sa mga tawo. Tapok-tapok man ang karne, sa akong nahibaw-an, dili mokubos sa usa ka libo ang tapok. Kaluoy sa kabaw ihawon sa? Mura man to akong nadungan nga bawal na ihawon ang kabaw, pero naa man gihapon daghan mag-ihaw. Pero unsaon nga potaheng kabaw man ang kinaham ni mayor. Unya kay siya man ang bisita sa akong uyuan nga kapitan.

Unsaon man gud nga karneng kabaw man ang pangitaon sa mangumbirahay. Daghan baya lami-an sa karne nga kabaw kay dili kuno sumo. Usa pa, talagsa ra nang kabaw. Ang karneng baboy dali ra baya mapalit. Samtang ang kabaw dili mabasta-basta ug ihaw.

Maayo na lang walay mag-ihaw ug kabayo. Unsaon na lang.

Ambot ug ngano pero maulaw man ko mamista o mangumbira. Ok lang nako mulaag sa mga amigo kung pista basta dili lang kaon gyod ang tirada, dili hinoon ko maulaw nga inom ang adtoon (noon yun, hindi na ngayon ---buotan na man ko). Sa akong mahimunduman kausa ra ko nakapamista (dala man pamisita), didto sa Tambulig sa kanhi ko hinigugma. Sayo pa gani, didto na ko hangtod didto naabtan sa kagabhion ug buntag na nga nakauli. Wa ra man ko naulaw.

Ang pista sa amoa mura'g reunion sa mga silingan nga nanglangyaw intawon aron molambo ang kinabuhi. Alegre gyod kaayo.

Bai Nep ug Kungseng kanus-a gani tong pista sa Ozamiz? Oi, Donya Tikya, September man pod ang pista sa Iligan, diba? Mao na bai tinood nga botbot, dalikyat lang ug uli kay mangumbira ta. Kay kung didto ta sa ilang Donya Tikya, dili ko maulaw bisan magbinuntagay ug kilaw ug ku-an, kaon ug ku-an..basta..ayaw lang nang kabaw.. hehe..

Enjoy your weekend.

Ambot lang!

Wednesday, 22 August 2007

Kris Aquino for Vice President?

Si Kris molansar pagka-bise presidente sa Pilipinas?

Dili oi!

Si bai Ramses molansar pagka-kapitan sa Forbes Park, Makati? Ambot lang! hehehe..

Makakugang ning ubang mga balita. Kagabii sa TV Patrol gipanghimakak ni Kris Aquino ang mga taho ug hungihong nga kuno siya mudagan pagka-bise presidente sa nasod sa 2010 election. Hapit na ba ang election?

Kining uban usahay maayo kaayo mohimo ug isyu. Diin ba ni gikan nga mga taho?

Hinoon dili kini angay ikatingala kay si Kris aduna may politikanhong gamot isip anak sa kanhi senador ug kanhi presidente sa Pilipinas.

Matod pa ni Noy Abloy, ang banggiitang political analyst sa tubaan ni Nang Charing, ang politikanhong gamot ni Gloria (ang apilyedong Macapagal) ang usa sa nakapadaug kaniya sa dihang midagan siya isip senador kaniadto. Ug lagi kay maayo man sab ang iyang "record" sa senado, nakagamot pag-ayo si Gloria sa natad sa pulitika. Karon, siya na ang rayna sa palasyo, este, presidente sa nasod. Tiaw mo na!

Mao nga sugyot sa batang buotan, pamalandongi kuno sa makadiyot ug susiha kung aduna ka bay politikanhong gamot. Kinsay nasayod, ikaw ang sunod nga lider sa nasod nga maoy makapahaw-as sa kinabag-an gikan sa nasinating kalisod.

Mag-usab usab baya ning panahon. Sama sab niini ang huna-huna sa tawo. Kinsay nasayod, mausab ang hunahuna ni Kris ug makahukom siya nga modagan gyod sa 2010? Naa bitaw miingon kaniadto nga dili na, unya pagka-akto na mismo, moku-an diay. Weather weather man kuno ang showbiz. Aw, unsa ba, politika man diay ning akong gihisgutan, naabot man ko sa showbiz. Unsaon man gud nga naay mga politiko gustong mag-showbiz, kadtong naa na sa showbiz, gusto magpolitiko. Ambot lang!

Balikan ta si Kris, unsa kaha kung modagan gyod siya, botohan kaha siya sa mga katawhan? Oi, wag ismolin, maraming kris fanatics! Ikampanya kaha siya ni Boy Abunda? Paminawon kaha ang iyang plata-porma de gobyerno? Atangi!

Hello banker.. (dili ni hello gar_ _..?)

Unsa man gyod Kris, DEAL or NO DEAL?

Ambot lang!

Tuesday, 21 August 2007

Scandal

Naa koy scandal bai!

Motingkag dayon ang dunggan sa uban basta malitok na ang pulong nga "scandal". Naa toy, Dumaguete scandal, naay Cebu scandal, unya kagahapon nangangha ko sa nalili-an nako sa blog ni kungseng; mura dili makatuo sa giingong Ozamiz scandal.

Lahi man gud ang maong scandal. Duha ka batan-on nga lalake ug babaye ang nagbuhat ug law-ay nga paagi sa pagpagawas sa kainit nga ilang gibati. Tiaw mo, didto nila kini buhata sa cubicle sa usa ka internet cafe! Pagkangilgnig!

Tungod sa teknolohiya, dali nga masabwag ang mga scandal. Gani daghan man sa akong kaila nga nagtipig ug mga nagkalain-laing scandal sa ilang PC. Pero taman lang intawon ko sa komedya nga gusto ko mutan-aw. Kay sukad wa pa ko kakita ug scandal. (Ok, angkonon nako, nakakita na ko ug x-rated films.) Hilasan man gud ko unya dili ko gusto nga mamansahan ang akong hunahuna sa mga mangil-ad nga motibo. Kay kini bayang magtan-aw ta ug mainit nga eksena, manginit baya gyod ta. (hehehe.. ambot lang kaha ang uban..) Ingon man gud among maestra sa religion, sala daw ang mag-imagine ug kuan labi na ug sagulan ug kuan. Ambot lang!

Nasakitan baya ko sa giingon sa akong amigo (drama.. hehehe) sa dihang gipaambit nako niya ang akong opinyon nga ngil-ad ang maong buhat (scandal). Matod niya, "hilom diha.. mura pod ka'g dili uwagan..".

Sa hilom, gusto nakong isinggit. Oo, bation ko ug uwag sama sa gibating uwag sa among iro. Apan dili ko iro nga pataka lang ug panguwag. Bisan ako usa ka timawa, dili ko bulingbulingan ang akong kadungganan. Sa laktod nga pagkasulti, buotan ko. bwahahahaha... Ikaw, buotan ka ba?

Naa bayay uwag nga wala sa lugar, naay uwag nga naa sa saktong lugar. Gipaningkamutan ko baya sa kanunay nga naa sa lugar ang akong uwag. Ikaw bai Rams? Naa pod sa lugar? bwahahahaha...

Sa matag "sex scandal" mulotaw ang mga pangutana:

Unsay akong tan-aw niini isip responsableng lumolupyo. Sama kanila, lingawon ko ba ang akong kaugalingon sa pagtan-aw sa maong buhat? Biay-biayon ko ba ang nagbuhat sa ingon? Magsige na lang ba ko ug yawyaw bahin kung unsay sala, ug kung unsay immoral?

Para nako, ayaw na pangutana, buhata ang angay mong buhaton!

Ambot lang!

Monday, 20 August 2007

Love Story

Niadtong Sabado, nag-text ang akong pinalanggang anghel (we're just friends). Manuroy daw mi, manan-aw ug sine sa emall. "Unsay salida atong tan-awon?", ang reply nako niya. "Luv story", matod pa niya. Unsa nga love story?

Mao na diay to ang title sa salida - A Love Story. Nakahinumdom ko, mao diay ni ang pelikula nila Aga, Maricel ug Angelica Panganiban. Naghisgot pa gani to ang mga kauban nako nga babaye (sa opisina) kung kinsa daw ang kabit, si Maricel ba o Angelica.

Pastilan ning akong angehel, mao diay tingali nga ganahan siya nag motan-aw kay bida man si Angelica, hmm.. tingali ba kaha kay naa si Aga?

Kining mga babaye hilig gyod kaayo ug mga lab estori. Kilig kaayo labi na og pelikula ni Bea ug John Lloyd, ni Piolo ug uban pang mga artista. Naa man pud hinoon dili ganahan sa mga pelikulang pinoy (bahalag luod basta Hollywood?).

Mao tingali nga ang ubang mga babaye feeling artista? bwahahaha.. Usahay sab ang ilang pagtoo sa relasyon usa ka pelikula. Sayon-sayonon lang ug biya ang ilang uyab. Naay uban murag gidaog-daog na bisan gamy ra ang sayop sa lalaki, pahilak-hilak murag si Vilma. Patilan, naa pay uban (mga kaila gyod ni nako) sundugon pa ang linya sa mga drama ug pelikula.

"Wala man koy sala day.."
"Akala mo lang wala, pero meron.. meron"

"hindi naman ako mahirap mahalin, diba?"

Daghan pa, pero nakalimot man ko.

Ang drama sa kababayen-an, usahay gilok paminawon pero usahay sumo pa sa humba. (sa maigo lang ha..hehe)

Nindot lagi kuno ang esturya sa "Love Story" kay bahin kumo kini sa asawa ug kabit. Ka-swerte ni Aga, giilogan siya sa duha ka maanyag nga babaye. Hinoon maanyag man pod si Aga. Hehehe..

Basta kabit na gani ang tema, daghan gyod maka-relate ana. Ambot nganong mangita pa man gyod ug lain nga naa na man unta. Si kuan kay kabit baya to ni kuan, nasakpan pa man gain nga nagkuan sa balay sa ilang kuan. (alam mo na yan..)

Ambot kung malingaw ba gyod ko sa salida kung nakakuyog gyod ko sa akong anghel. Pero unsaon nga naa man koy importante nga lakaw mao nga wa gyod intawon ko nakakuyog.

Pero basta lab estori, di kaayo ko ganahan ana kay wala koy lab estori. Dili ko ka-relate sa mga kalipay ug kapakyasan sa gugma. (kay dili ko artista sama nila)

Ambot lang!

Friday, 17 August 2007

Maldita

Tam-is kuno ang gugma sa gwapang maldita. Ang maot nga maldita? Ambot lang!

Ambot nganong daghan man ang maldita ning kalibutana. Daghan lang hinoong mga lalake nga buotan ang masakitan.

Kasagaran sa mga maestrang dalaga (labi na ug edaran na) mga maldita. Mangurog intawon ang mga pobreng estudyante. Naa say ubay ubay nga mga manedyer nga babaye, maldita. Abi ko gani sauna nga ang mga madre maldita kay mahalok man ko sa among non-academic head (high school) nga madre.

Ang grabeng makasakit sa pagbati mao ang dalagang maldita. Hinoon naa uban pa-maldita maldita lang para ibigin.

Sayon ra man ilhon ang mga babayeng maldita. Sunda lang ang akong sugyot. Tan-awa ang iyang mga mata, susiha kung unsay color; nag-abot ba ang kilay?; obserbahi ang pagkibot-kibot sa iyang ngabil; tutuki siya pag-ayo unya kidhati; kung sipatan ka gani, confirmed: maldita nang bayhana!

Niay mas maayong paagi. Tapad sa babayeng gidudahan mong maldita. Dotdot gyod niya, unya totoki siya ug pili kaayo. Kung masuko gani unya yawyawan ka, confirmed: maldita nang bayhana!

Kung sagpaon ka gani, proven: maldita nang bayhana!

Sa akong obserbasyon ug basi usab sa akong kasinatian, nakaingon ko nga ang bugtong makapausab sa mga maldita mao ang tinuoray nga gugma ni dodong. Pinaagi sa tam-is nga pahiyom sa buotan nga ulitawo inubanan sa mainitong hapuhap, ug hunghung, patay kang malditaha ka, makahigda ka gyod.

Maldita ka ba? Kung mao, alaot ka. Hehehe...

Ambot lang!

Dalang Colon

Sa kanta sa Missing Felimon, na-mention ang dalang Colon:

..dalan colon gamay lang gud gihapon
ang gazining sunog balay na ron sa buyog
may mga batang naghingos og putos
abi nimo'g pansit apan diay papilit..

Haska nakong lipaya sa una nakong pagtunob sa pinaka-karaang dalan sa nasud. Sama sa gibati kong kalipay sa dihang nakita ko ang Magellan's Cross ug nakasuroy ko sa Mactan Shrine. Tingali para sa uban, ordinaryo lang ang dalang Colon, apan para alang kanako, dako kini nga tipik sa kasaysayan ug kultura natong mga Filipino nga angay hatagan ug igong importansiya.

Kaniadto gilakaw ko ang Colon gikan sa Parian ngadto na sa Metro Gaisano aron akong mabatyag ang tinood nga kinabuhi sa maong dalan.

Naa halos tanan sa Colon, naa ang mga estudyante, mga trabahante, mga walay trabaho, mga negosyante, mga makililimos, mga bata (batang naghingos og putos; abi nimo'g pansit apan diay papilit [rugby?] - Missing Felimon), mga bugaw, mga prosti ug callboy. Naa sila sa Colon, adlaw man o gabii. Naay nagsinggit ug kaluwasan samtang nangolekta sa pisong imong halad.

Sa laktod nga pagkasulti, ang Colon nagsugid sa maanindot ug laksot nga bahin sa Sugbo. Ang Colon mao ang naglarawan sa tinuod nga kinabuhi.

Usahay, manlimbawot akong balahibo sa ubang bahin sa Colon. Tiaw mo naay kalit lang mangidhat, dili man unta kaila. Naa ganiy manguhit, mangawhat na gyod ang uban aron lang ihanyag ang ilang pagkababaye. Pastilan! Unsaon pagbalibad nga dili sila masakitan? Ambot lang...

Sa Colon sab ko nakuotan ug pitaka. Tua ra ba intawon sa akong pitaka ang tinipigang hulagway ni Inday. Hahaay.. Nawala na. Sa dihang gipa-blotter ko sa pulis (for record purposes) ingon ang pulis sa Carbon, "alert gyod permi". Sakto ka sir!

Bisan pa niana, importante gihapon kanako ang dalang Colon ug padayon ko kining sud-ongon ug bisitahan sa makadaghan.

Colon! Colon! ang siyagit sa mga konduktor sa jeep. Matag usa, adunay estorya sa dalang Colon..

Ambot lang!

Thursday, 16 August 2007

Habal-habal ug jerjer

READ ME: PILAY IMONG EDAD? PALIHOG AYAW BASAHA ANG MUSUNOD KUNG IKAW WALA PAY 18 ANYOS!



MySpace Icons

Sure ka nga 18 years old na ka?
...mura man gud ug 80 years old ka tan-awon.. waaaahhh...


sige, scroll down lang...




Ang habal-habal motorsiklong de pasahero. Ang "habal" mao ang termino sa pakighilawas, pero gigamit ang pulong nga "habal" sa mga mananap. Ang pakighilawas sa tawo, naa say term, "iyot", "kayat", "upa". Bastos man paminawon sa? Tungod kay lagi may pagka-conservative ang kadagahanan, gimugna ang pulong nga "jerjer" Dili ba bastos ang jerjer? Daghan ang komportable nga mogamit niini kay sa mga nahisgutan ko sa unahan.

Sa wala pa ang jerjer, "kuan" man ang gamiton isip termino sa pakighilawas (lawom ra ang "pakighilawas"). Gigamit pod ang "kuan" isip termino sa kinatawo. “Gi-kuan ni kuan ang kuan ni kuan.”

Kinsa bay nagpasiugda (posible dili sila ang original) ining jerjer? Si Teban ug Goliat. Ila kining gigamit sa ilang drama, nga ang original diay kuno nga kahulogan (sumala sa ilang gisugilon sa dihang gi-interview), "kaligo". "Jerjer ta Jer." [Mangaligo ta Jer.] Pero naunsa man nga gihatagan man ug laing meaning.

Ang akong mga amigo sa Mindanao kung mo-text, pangumusta ug mangutana unsay akong lingaw, balosan nako; "kaon ko sa bingka sa Mandaue, bai" Sa maong pulong lahi na ang ilang pagsabot. Bisan gani ang talong, naa may laing meaning.

Usa na ka-tuig ang milabay, usa ka broadcaster sa sugbo ang gipasakaan ug kaso tungod sa paggamit sa pulong nga "jerjer". sa iyang pamukaw miingon siya, “Opisyal nga ni jerjer sa umagad, mata na!”

Niadtong milabay nga eleksiyon, naay jingle nga migamit sab ug "jerjer". Sulayi ug kanta ha, (tono: BOOM TARAT-TARAT nga kanta ni Willie Revillame):

BOOM SHABU-SHABU
BOOM SHABU-SHABU
KURAKOT KURAKOT
JER-JER-JER


Dili na lang nako i-explain sa cyberspace ang meaning sa jingle. hehe. Pamilyar ang taga-Mandaue ana.

Sa akong paglibot-suroy sa mga blog, akong pod nga nahimalagan ang term para sa "masturbation", ang "salsal" (thanks to tinood nga botbot[a]). hehe..

Balik ta sa "jerjer". Gikan sa Urban Dictionary[1]:

jerjer is when 2 people (male and female to be specific) make tot-tot. Damn! i saw 2 ppl jerjering at the park last night!

It is a Filipino expression of the word "sex". Damn! that hoochie is of the hook when it comes to jerjer.


Pastilan, daghan na gyod mga bag-ong pulong karon.

Diri na lang ko kutob kay mag-kuan sa ko. hehe. Salamat sa pagbasa.

Ambot lang!

Wa kasabot

Wa ko kasabot sa akong gibati. Mura ko'g gibayaw sa ikapitong langit samtang nagsud-ong sa akong pinalanggang angel.

Katam-is baya sa iyang pahiyom. Daw sama ako sa ulipon nga nagsimba sa iyang katahom, wala na koy panahon nga mamilok pa samtang gisud-ong ko ang iyang lawom nga kandi-is, ang iyang hamis nga kutis, ug ang iyang mga mata nga daw nagsaad ug talagsaong himaya.

Katahom sa akong pinangga.

Picture lang ni akong gitan-aw. Unsaon man nga wala man ko sa iyang kiliran.

Pait ning layo sa hinigugma..

Ambot lang!!

Mga saad

Poor memory or selective memory?

Nalimtan mo na ba ang imong saad?

Adunay matinudanong saad, aduna say binotbot nga saad, ug may saad nga kalimtan na lang sa dakong kasayon.

May usa ka saad nga dil nako makalimtan. Kini mao ang saad sa tinuoray nga pagbati. Kanunay ko nga handumon kini nga saad. Ang maong saad maoy naghatag kanako ug igong kusog aron pakiglimbasugan ang mga pagsulay. Ang saad mo maoy paglaom ko.

Apan hain na man ang mga saad? Hain na man ang mga panumpa nga gisaksihan sa hilom ug makanunayong tubod sa Tuboran? Hain na ang matam-is nga pulong nga gikulit sa lumuton nga bato?

Hinaot unta nga imong madungog ang hunghung sa akong kasing-kasing ug imong mahimduman nga nga ikaw aduany saad nga angay pagatumanon.

Pag-sure diha!! hehehe..

Ambot lang!

Wednesday, 15 August 2007

Loco

Kagabii sa Reporter's Notebook (GMA TV-7), gituki ang kinatibuk-ang kahimtang sa atong mga kaigsuonan nga nalisu-an sa maayong pangisip. Mura gikumot ang akong kasing-kasing samtang nagtan-aw ko sa mga "video footage" diin gilarawan ang kalisod sa ilang kahimtang. Walay igong pasilidad alang kanila ug ang "treatment" kanila maoy labing makapanlimbawt sa balahibo. Tiaw mo uban kanila, gigapos (wala sa mental facility) sa ilang kapamilya, gipriso sama sa hayop. Wala nako gimahay ang ilang kapamilya, ang akong gitan-aw mao ang kakulangon sa igong pasilidad alang sa mga nalisu-an sa maayong pangisip.

Ubay-ubay diay ang mga nalisu-an sa maayong pangisip sa atong nasod. Kasagaran nga hinungdan mao ang kalisod, trahedya, mga sakit nga kasinati-an, kapakyasan sa gugma, ug ang sobrang paggamit sa ginadiling druga, ug daghan pa nga mahimong hinungdan. Si Weng, akong amiga nga psychologist suheto gyod to niini.

Sa high school pa lang ko usa sa among klasmet mga babaye (gwapa) ang nalisu-an sa maayong pangisip. Nabuyagan man daw to sa tabay. Wala na ko kahibalo unsa pay sunod nga nahitabo niya, naulian ba o padayon ba siya nga nalisu-an.

Duna pod miy silingan (Sta. Cruz) ang miuli nga wala na sa saktong pangisip. Gikan siya sa Bukidnon, nanarbaho. Matod pa sa mga paryente, gidaot daw to sa nitibo. Gigaid man to siya sa doldol (usa ka klase sa kahoy). Kalooy sa Dios, naulian baya.

Naa sad usa nga nalisu-an sa maayong pangisip human manganak. Mura gyod siya ug rayna sa iyang gisul-ob kay matod pa niya siya man kuno ang rayna sa among baryo. Luoy baya. Nauli-an ra man sab. Gipatambalan man ug binisaya.

Mao kana ang kahimtang sa mga nalisu-an sa maayong pangisip. Kadaghanan, dili na intawon madala sa mga tambalanan alang kanila.

Usa sa akong amigo ang miapil sa pagpasipala sa usa ka babayeng nalisu-an sa maayong pangisip. Ila daw giligo unya gipahimuslan ang pagkababaye. Pastilan, grabe na man sab, wala sila naluoy? Wala na sa saktong pangisip, gipahungawan pa sa ilang uwag! Ang nagbuhat sa ingon, labaw pa sa nabuang. (nasuko ko.. misorok akong dugo)

Daghan na akong nadungan nga makabuang pod daw ang gugma. Loco de amor daw ang tawag niana. Kasagaran sa ma-loco de amor aktong mga gibudhian, mga gibulagan, mga giilisan, mga wala ka pahungaw sa gibating gugma.

Hala ako gibudhian na ra ba. Dili kaha ko malisu-an sa maayong pangisip? Waaaaahhh....

Ambot lang!!!!

Tuesday, 14 August 2007

Prrrttt

Kagab-i sa jeep nga ginsakyan ko (Banilad-A.S. Fortuna-Mandaue) daw mabugto gid ang ginhawa ko kang kadlaw ah. Kaharam-uton gid bala ang kapalaran sa gwapa nga draga. Pagsakay nya, abaw daw gatumbo-tumbo ruman ang kasingkasing ko, abaw pagka-hamot sa chinita. Nagahutik-hutik pa sila sa iya tapad nga daw ka-officemate niya. Abaw, naghunong ang jeep hay STOP pa, nakibot gid ko sa akon nga nabatian. PRRRTTT.. Abaw, daw bungol nga trumpeta ang utot ni chinita!!! Pagkakusog gid abi! Ginpug-ngan ko lang gid nga indi makakadlaw kang kusog. Pero ako daw ma-otot man kang pugong nga indi makakadlaw. Pagabot ko sa balay, gin-ubos ko gid ang akon kadlaw nga daw mabugto ang ginhawa ko.

Kagabii, samtang nagsakay ko ug jeep pauli, mao lagi to, naka-otot ang chinita nga akong kasakay. Kusog ra ba. Naulaw gyod ang chinita kay minaog man o mao na ba gyod to iyang kanauganan. Naluoy baya ko kay dili baya lalim kung dili maka-otot. Mas dili lalim kung maka-otot sa publiko.

Wala man siguro motuyo ug pangutot sa publiko gawas sa pipila nga ang tuyo magpakatawa. Pero mailhan ra ba gyod ang pinugngan nga otot. Mura mapiit. Hehehe.

Naa baya pod ko kauban nga magtutudlo sauna nga naka-otot samtang hilom nga iyang estudyante nga mi-take sa periodical examination. Naulaw gyod daw siya pero unsaon man nga abi man daw niya ug dili motingog. Wala baya kunoy nangatawa kay nahadlok bayo pod ang mga estudyante nga makasab-an. Pero pagkahuman sa exam, siguradong mibahakhak sila.

Niadtong mitambong pod ko ug seminar sa Zamboanga City, naa poy naka-otot nga maestro nga tambok, sa Basilan to siya nagtudlo. Nangatawa man gud mi sa gihimo sa among grupo nga outline unya sa kalit lang nakadungog mi ug usa ka kusog nga PRRRTTT..misamot ang katawa.

Apan ang dili nako malimtan mao ang akong kasinatian sa Cagayan de Oro. Mikuyog lang ko niadto sa among mga estudyante nga mitambong sa usa ka forum. Kay lagi ako rang usa sa hotel ug kay gibati ug kainit, nangita ko ug kalipay. Tuod man samtang daw giduyan-duyan ko sa natagamtaman nga gloria, kalit lang may nadungog ko nga, Prrrtt.. Mihunong ko. "Unsa to?" Ang pinabundak nga tubag ni Eba, "otot ra to oi, padayon lang gud diha.." Mura gyod ko ug gigitik sa mga angel..Bwahahaha..


Ambot lang!

Monday, 13 August 2007

Walhon

Mabuhi ang tanang walhon sa Pilipinas! Mao kini ang akong siyagit sa akong Instant Messenger. Mi-react intawon ang uban nakong amigo sa Mindanao. Miapil na ba daw ko sa walhong pundok?

Karon ang adlaw sa mga walhon!

Dili ang walhong pundok ang akong gipasabot kundili ang mga tawong mosuwat gamit ang walang kamot. Usa na ko nila.

Ganinang buntag, samtang nagsuroy-suroy ko sa mga paboritong blog, akong nabasa sa suway-suway lang nga karon adlawa diay maoy adlaw sa mga walhon.

Salamat naa pod diay adlaw para namo. Siyempre nalipay ko kay kaniadto sa gamay pa ko, sungogon baya ko sa mga classmate ug walhog tiki daw. Unsaon, ako ra may walhon sa among section niadto. Luoy intawon kaayo ko. Arang-arang sa dihang nag high school na kay daghan na ang walhon. Unya kasagaran sab sa walhon, naa sa honor list. Hmm... hehehe. Nabawi ra sad.

Sa among pamilya ako ra sad ang walhon ug ako ra ang nag-inusara nga hilomon apan sekreto ug labok. Kung akong uyab pasultihon, buotan kuno ko nga pagka-bugoy. Ambot lang, wa ko kasabot sa buot niyang ipasabot. Sa akong pagtoo, buotan man gyod ko. bwahaahah...

Kaniadto, nahibulong gyod ko nganong lahi man ang kamot akong gamiton sa pagsulat. Dili lang sa pagsulat, wala sab ang akong igunit sa kutsara, wala sad sa pagpahid sa luha (dinaug-daug), sa pagsuntok, sa pagkuan; basta, sa mga gimbuhaton gud.

Karon nasabtan na nako nga dili man dautan nga walhon ko. Ang importante nga makamao ko mahigugma sa mga maanyag nga bituon, walhon man sila o dili.

Karon man ang adlaw sa mga walhon, akong isyagit: Mabuhi ang tanang walhon sa Pilipinas, North Korea, China, ug sa tanang kanasuran sa kalibutan!!!


Ambot lang!

Way lingaw

Way lingaw mao nga naglingaw-lingaw ko sa lingaw nga akong gusto isip pahimulos sa duha ka adlaw nga "bakasyon" (weekend ra gud).

Thanks God it was Friday! Tam-is ug mainiton ang akong lingaw ug akong gilingaw niadtong Biyernes sa gabii.

Mura ba'g nahurot ang akong kusog sa miaging gabii, pagmata nako niaanang Sabado sa buntag, nakahukon na lang ko nga sa akong kwato na lang maglingaw-lingaw. Simple lang ang akong lingaw sulod sa kwarto, tan-aw sa episode 1 sa Six Feet Under (balik-balik na ug tan-aw), tan-aw ug TV kadali, minaw kang Bob Marley, sa paboritong OMD, ug siyempre sa laing paborito nga Missing Felimon. Ug samtang naminaw, tan-aw ug magazine (wala man nako basaha).

Unya sa hapit na misalop ang adlaw, nakahuna-huna ko nga mogawas aron mag-tripping ug kaon. Naghuna-huna ko nga mokaon ug [BBQ]tinuhog nga karne (ako na lang kaha ang magtuhog? hehe) sa Larsian 2 sa A.S. Fortuna. Pero mi-text ang nako ang usa sa mga ka-bords sa Mambaling. Unsa daw akong lingaw kay naa daw lingaw didto.

Kabalo na ko unsa nga lingaw. Kay lagi gimingaw na sad ko sa patid sa kabayo (Red Horse). Akong giadto ang giingon nga lingaw sa Mambaling. Gamay ra ang among nahurot kay giaapas man sa asawa ang usa ka bords mao nga nakahukom na lang mi nga i-adjourn ang "session". Maayo ra sad kay igo-igo ra karga para makauli sa Mandaue.

Domingo sa buntag, gipukaw na lang ko sa toktok sa akong suki sa Sun Star. Sayo siya nga mihatod sa mantalaan (7am) sa kasagaraan nga alas nuwebe sa buntag kay matod pa niya lingaw daw ang boksing. Nahinumdom ko nga naa man diay boxing.

Tuod man mitan-aw ko ug nalingaw lang gamay. Pagkahuman gibati ko ug duka. Natulog ko pero wala nagdamgo.

Karon nia na sab ko, siguradong malingaw na sab sa usa ka semana nga pagtuplok-tuplok, basa-basa, ug suwat-suwat.

Friday, 10 August 2007

Hiyaaayyy

Naka-gradwet na intawon ko ug college (20 anyos) sa dihang nabunyagan. Abi ako ray dugay nabunyagan. Samtang nagtagay-tagay mi mikumpisal gyod namo ang ka-officemate nga si Rodel (taga-Siargao). Giangkon niya nga sa iyang pangedaron nga 22 anyos wala pa siya nabunyagi.

Kay lagi atol man to nga ting-sweldo, nagkasinabot mi nga pun-an ang among gi chip-in para mabunyagan lang gyod si Rodel niadtong gabhiuna. Luoy baya pod kung dili mabunyagan among amigo di ba? Mi-volunteer dayon si Joshua nga maoy mulakaw aron mangita ug mobunyag, siya baya kuno ang labing suheto anang butanga.

Siyempre kay bunyag lagi, gipun-an ug duha ka kahon ang among giinom. Mubarag-barag na gud ko kay daghan na baya ang among nahurot unya gipun-an na sab. Excited si Rodel hasta kami nga nagpaabot kang Joshua nga uban ang magbubunyag.

Tuod man, wa magdugay, miabot na ang among gipaabot. Mura'g ginerbiyos si Rodel pagkahimamat sa mobunyag kaniya. Gipaningot siya'g maayo. Luoy baya sab. Ang mobunyag sab, nagtingsi lang.

Upat gyod mi nga witness sa bunyag.

Samtang padayon mi sa pagtagay, miplastar na si Rodel ug ang mobunyag niya aron masugdan ang ritwal sa bunyag. Wa ko pagi natungab ang akong tagay kay nagsige pod ko ug yawyaw bahin sa kasinatian pod nako sa bunyag, naunsa man nga nadungog na lang namo ang pinugngang siyagit ni Rodel, "hiyaaaaaaaayyyy".

Makurat mi. Nahilom ming tanan, nanindog ug milili sa kilid diin gihimo ang pagbunyag.

"Unsa to bai?", gipangutana ni Joshua si Rodel. Wa mitingog ang karahong dako. Mikulob hinoon. Misudlot gyod ang among kalimutaw sa dihang mitindog ang mibunyag ug miingon, "mana oi", dayong tingsi.

Hala, wa lay tres minutos? Naunsa man kadali nahuman. Ang uban maabot man gani ug usa ka oras [citation needed]. Giyawyawan ni Ryan ang iyang kababayan kay banga daw kaayo. Dali ra kaayo na..nahuman gud, basta. Apan si Rodel, wa na mitingog, mihagok hinoon. Gawas nga hubog, gikapoy sa instant bunyag.

Moral lesson: Dili basta basta ang hiyaayyy! bwahahaaha...

Ambot lang!

Thursday, 9 August 2007

Absinot

Absinot ang tawag sa mga estudyante nga magsige og palta (absent) sa klase. Absinot sad ang tawag sa mga kongesista nga sige ug palta sa session.

Sa milabay nga 13th Congress, giangkon sa mga nangulo sa Kamara (House of Representatives) nga suliran nila ang "absenteeism" o pagka-absinot sa ubang mga kongresista. Mao gani nga wala makapasar sa balay balaoranan ang "Cheaper Medicine Bill". Tsk..tsk.

Sa bag-ohay pa lang nga naablihan nga 14th Congress, daghan kaayo mitambong nga mga congressmen. Halos walay absent! Its a miracle! Oi, dili pod baya kay kasagaran basta mao pay pagsugod, excite baa na sila.

Sa interview, gipahayag ni Speaker JDV iyang isugyot nga ngalan sa publiko ang mga kongresista nga absinot. Dugang pa, tagaan daw ug premyo ang naay perfect attendance. Trip to Jamaica? Sports car nga red? Ambot lang!

Kung mao ni, maayo na aron magkabukingan na. Ang amo kahang congressman sa? Dili ba kaha absinot?

Ambot lang!

Wednesday, 8 August 2007

Bag-ong Ozamiz

Dako na ang kausaban sa dakbayan sa Ozamiz. Gikan sa tuig-2000, paspas kaayo ang paglambo niini.

Una gyod nako nga napansin mao ang pantalan. Ang kanhi samok ug hugaw nga pantalan, karon hinlo ug organisado na kaayo. Gani, angay man ipasigarbo ang passenger terminal niini, haruhay ug "safety" kay aduna may x-ray machine (for baggages) ug mga bomb-sniffing dogs.

Ang Cotta karon nindot na kaayo, ug wala na ang mga nanimuyo sa kilid niini nga maoy nakapalasot sa talan-awon sa makasaysayanong Cotta sa Ozamiz.

Human milabay ang 12 ka tuig, gibuksan pagbalik ang Labo airport (Benigno Aquino Jr. Airport) niadtong July 8, 2007. Gumikan niini duna na karoy direkta nga "flight" gikan Ozamiz ngadto sa Manila, vice versa.

Apan ang gikalipay ko ug dako, ug ang gipaabot sa kinabag-an nga katawhan mao ang "Panguil Bay bridge". Gani napirmahan na man ang MOU sa maong proyekto, ug sa dili madugay, malaumon ang katawhan nga kini pagasugdan na.

Ang "Panguil Bay bridge", nga adunay "length" nga sobra sa usa ka kilomerto, magdugtong sa Misamis Occidental ngadto sa Lanao del Norte. Abi ko sauna ug kini imposible apan karon aduna nay konkreto nga plano nga supportado mismo ni GMA.

Laing kalambuan diay mao ang pagkahimugso sa laing unibersidad sa dakbayan, ang La Salle University nga kanhi ICC-La Salle. Sa nagtuon pa ko didto sa akong masteral (2005) ICC-LS pa karon nahimo na gyod nga unibersidad.

Makahinumdom pa ko ni sir Leo Ocampos. Board member pa siya kaniadto. Suod kaayo siya sa mga student leaders, gani, makigtagbo man siya sa mga leader sa MIT, MU, ICC ug Medina College aron mahisgutan ang mga programa nga dapat tan-awon sa gobyerno. Wa ko nahibulong nga sa dihang milingkod siya isip gobernador sa Misamis Occidental, miuswag pag-ayo ang probinsiya.

Ug labaw sa tanan, ang kanhi imahe sa Ozamiz isip adunay abunda nga supply sa guinadili nga druga, karon dili na. Ang bag-ong Ozamiz, malinawon ug nagmauswagon.

Padayon Ozamiz!

Mga gamhanan sila

Nakapangutana ko sa akong kaugalingon kaniadto, mga gamhanan ba sila?

Ang akong gipasabot maom ang pipila ko ka mga boardmate sa Banadero, Ozamiz. Tiaw mo, makahurot na ko ug tulo ka tasang kape aron lang dili makatulog (daghan kaayo writing assignments) samtang sila, wala gani bisan mitim-id lang ug kape, makasustener man ilang ilang mata hangtud sa pagsidlak sa adlaw.

Samtang ako nagtuon (ug nagsulat ug love letters) sa akong kwarto, sila sab naay gikuri-kuri sa ilang kwarto. Tingali nag-drawing, nag-sulbad sa mga physics problem nga gi-assign ni Engr. Abod, o dili ba hinoon nagsag-ulo sa MIT Hymn. Ambot lang kung nag-unsa sila basta ako nasuya kay dili nako kaya nga mabuntagan.

Nakaingon gyod ko nga tingali sakto sila ug lihi o dili ba hinoon epektibo ang ilang habak o orasyon nga latin.

Gamhanan gyod sila.

Sa kaulahian, nasuta ko na gyod ang ilang sekreto sa dihang mikumpisal (dili lagi ko pari) mismo kanako ang usa kanila. Gipakita pa gani kanako ang puti, ug dinugmok nga "bato" nga matod pa, maoy naghatag ug igong gahum kanila. Aw, puting bato diay, tuay daghan sa Kaangayan, gipangtiltil man gani to aron dalhon sa Pagadian. Pero ang maong bato kuno dili sama sa kasarangang bato kay paliton kuno to sa Lawis ug tag-peso ang gamayng putos. Taym pa, naglibog na ko. Ang peso diay, nagpasabot nga usa ka gatos.

Pastilan, unsa ba nga kato diay, mao man diay ang ginadiling druga. Kakuyaw gyod nako. Misamot ko'g kaluspad. Miboto-boto ang akong dughan, unsaon na lang kung naay pulis? Patay! Wa ko nagdahum nga mao na diay kadto ang ilang giingon nga ginadiling druga nga abunda sa dakbayan diin ako nagtungha.

Gamahanan gyod diay ang maong mga dinugmok nga bato. Tiaw mo, gawas nga dili makatulog, dili sila bation ug kapoy, dili pod kuno sila maulaw modiskarte sa chicks. Ako ra ba, maulaw gyod modiskarte, pero naka-uyab na man ko ato ni [secret] nga miuna na gani ug gradwet nako. So, di na ko kinahanglan ug gahom. Usa pa, gamhanan man sad ko, makamao na gud ko mobuhat ug kuan..kanang naay kinabuhi, so "useless" na gyod ang gamhanang bato para nako.

Katong akong pipila ka boardmate, wa na makaabot sa Midterm exam, miuna sila ug gradwet sa boarding house. Gipapahawa.

Wala na ko makadungog nila sukad niadto. Ug wala ko lang damha nga makahinagbo ko ang usa kanlta sa Ayala. Gamhanan gyod kay nakaila pa man nako. Apan karon naulipon na siya sa laing gahum. Ang gahum sa gugma. Kaanyag sa iyang asawa. Sa barko daw nga iyang gisakyan (Nautical iyang kurso) hapit na sab daw niya mahupti ang gahom isip drayber sa barko (aw kapitan diay ..hehe).

Gipangutana ko siya, giunsa niya pag-undang? Ang tubag, nadala daw siya sa orasyon sa gugma!

Ambot lang!

Tuesday, 7 August 2007

Kaminyoon

Kining mga babaye makalibog, lisod kaayo makuha kung unsa gyod ang ilang gusto. Labi na kung uyab pa, pastilan, iya tanan ang sakto, ug magtuman gyod sa ilang gusto. Pero wala baya pod ko naglagot sa mga babaye, ambot kaha ang akong amigo nga tua nagpuyo sa lungsod nga ato lang nganlan nga "lungsod sa Molave".

Kaganina man god gipahungaw sa akong amigo (pinaagi lang intawon sa YM kay tua man siya sa Mindanao) ang iyang kaguol nga may kalabutan sa iyang pinalanggang hinigugma. Gusto na man gud unta niya nga dal-on sa atlar sa kaminyoon ang iyang hinigugma apan nagdumili man ang maanyag niyang uyab kay kuno dili pa andam.

Ambot ba unsa pay angay nga andaman? Mangandam sa nagsingabot nga hulaw? Mangandam sa nagsingabot nga bugnong lugaynon sa Tenyente del Barrio (way labot ang gobernadorcillo) ug Sangguniang Pangjaporms?

Dili baya na maoy angay nga pangandaman sa kaminyoon. Ang angay andaman mao (ang dakong bugno? buno? --dili oi) mao ang responsilidad nga kaluha na sa sagradong sakramento. Dako baya ang responsibilidad isip bana o asawa, inahan ug amahan.

Gitambagan ko na lang ang akong amigo nga dili lang sab magdali ug paaboton na lang nga husto na ang panahon. Paaboton nga mahinog na ang bunga una kini popuon.

Pero naa na man kunoy bunga ang ilang panaghigugmaay.

Dinhi ko nahibulong. Unsa pa amy dilian sa iyang maanyag nga hinigugma? Gusto ba niyang mahimong inahan apan dili asawa? Ug ang akong amigo mahimong amahan apan dili bana?

Dinhi ko naka-ingon nga ang babaye lisod gyod sabton. Naay nabuntisan, mamagus nga minyoan, naay gibuntisan aron minyoan dili hinoon makigminyo.

Bai, ayaw na kaguol. Sayon ra ang solusyon ana. Ako lang i-email kay sekreto man ni nga formula. Pero tested na ni, 100% sure.

Ambot lang!

Monday, 6 August 2007

Gugma ni sir

Ang paborito nakong rota (route) sa jeep dinhi sa Sugbo mao ang 13C (Talamban to South Bus Terminal). Kaniadto nga sa Mambaling pa ko nagpuyo, mabusog gyod ko kanunay samtang pauli ko inigka-hapon sakay sa 13C. Mabusog ko sa mga maanyag nga talan-awon. Taman lang intawon ko sa tan-aw sa mga maanyag nga estudyante sa UV, USC, ug UC, labi na gyod ang mga nursing (students).

Pastilan, makahinumdum na hinoon ko kaniadto sa dihang ako usa pa ka magtutudlo. Mawala intawon ang akong kakapoy sa dihang makig-atubang na ko sa mga maanyag kong mga tinun-an, labi na gyod ang mga nursing students ug computer science students.

Dili ikalimod nga dili gyod malikayan sa batang buotan ang maibog sa mga maanyag nga Eba. Kung magpada sa gibati, mahulog gyod ngadto sa gugma ang simple nga kaibog.

Sa pagsugod ko pa lang sa kanhi kong propesyon, gipasidan-an ko na gyod ang akong kaugalingon nga pugngan ko ang akong pagabation aron matindugan ko ang akong propesyon. Sa sinugdanan pa lang gisaad ko nga akong putlon ug babagan ang gugma ngadto sa akong tinun-an kung ugaling mupitik kini ug gugma.

Sa pipila ka mga higayon, nagmalampuson ko sa pagputol sa migitib pa lamang nga gugma. Nagtuo na ko niadtong higayona nga ako, ang batang buotan, mas gamhanan pa sa gugma.

Apan usa ka adlaw niana, namatngonan ko na lang ang lahi na ang pinitik sa akong kasing-kasing. Ug sa hinay-hinay akong nang nadungog ang makabungol nga honghong sa gugma.

Tingali tungod kadto kay walay adlaw nga dili ko siya makita ug makahinabi, dili lamang sa among klase (Technical Writing) kundili ngadto usab sa akong opisina kay lagi usa man siya ka editor-in-chief sa student publication ug samtang ako usab ang student publication coordinator.

Ato lang siyang itago sa ngalan nga Miss BCC (midauog sa beauty pageant sa tulunghaan). Tungod sa iyang kaanyag ug sa kalantip sa iyang pangutok (beauty and brain), daghan gyod ang gustong makaangkon kaniya. Usa na ko nila. Apan nagpakahilom ako ug gitago ko lang ang akong gibati kay lagi usa ako ka magtutudlo ug "unethical" kaayo kung manguyab ko niya. Gani masakitan man ko kung naa siyay kuyog nga lalake bisan pa ug dili niya kini uyab.

Apan, tungod lagi kay gamhanan ang gugma, usa ka adlaw niana, gipadayag ko na gyod ang akong gibati. Wala ko niya pakyasa kay dugay na pod daw siyang nahiguma kanako. Dili masukod ang dako kung kalipay niadtong higayuna. Mura ko'g gibayaw sa langit sa tumang pagmaya.

Among gitago ang among relasyon sa hataas nga panahon, apan walay aso nga makumkum. Basta naay aso, naay mosuyop. Ug mikatakap sa tibuok campus ang among relasyon. Nahimo mi nga sumsuman sa mga tabi. Sa sinugdanan, wa kini nakaapekto kanamo. Padayon kami sa pagdimdim sa matam-is namong gugma. Apan dako kini ug epekto sa akong propesyon. Sama sa sugilanon, naa gyod ang kontrabida, sa programs, naay bugs (heheeh).

Naglibog ko kung unsa akong buhaton niadtong higayona. Ako bang biyaan ang akong propesyon aron mapadayon ang among relasyon? O, isakripisyo ko ba hinoon ang akong gugma alang sa akong propesyon? Duha lang ang angay kong pilian. Apan naunsa ba hinoon nga naminaw man ko sa mga tabi sa mga himantayon. Ug mituo ko sa mga malaw-ay ug walay igong kapasikaran nga tabi batok kaniya. Ug unya ang matam-is nga panaghigugmaay, hinay-hinay nga naaslom.

Ug lagi kay naaslom man, nangita ko ug tam-is. Ingnon ta lang nga natintal ko sa lain na sab nga maanyag nga babaye, apan dili na siya estudyante. Tungod sa akong gibuhat, nawala ang bulak nga gitiman-an ko sa hataas nga higayon. Wala man tuod kami nagbulag, apan nagpatigbabaw ang among mga garbo. Migradwet siya, ug ako usab naka-desisyon nga biyaan ko na ang pagtudlo ug naminplad sa Sugbo.

Oo, napakyas ko sa gugma ko ngadto kaniya. Apan nagmalipayon man sab ko sa akong gugma karon.

Matag higayon nga makakita ko ug estudyante nga gwapa, puti, ug may tam-is nga pahiyum, ako siyang mahinumduman ug makapangutana na lang ako sa akong kaugalingon, kini ba ang badlis sa akong kapalaran?

Pangutana

Niadtong bata pa ko (karon kay batang buotan na man), daghan kaayo ko'g pangutana nga dili nako malimtan ang tubag.

Nangutana ko sa akong lolo usa ka adlaw niana.

"Lo, unsay kan-on sa Ginoo?"

"Bisan ano lang eh!", tubag sa akong Lolo Ilonggo.

Nasamot gyod ko kalibog, mao nga nagutana ko ug balik. "Bisan yuta?"

Miundang gyod ang akong Lolo sa iyang gibuhat, unya midalikyat ang mga mata sa inosente kong nawong ug miingon nga tabletas ang kan-on sa Ginoo. Unya iyang gidugang nga human makatumar ang Ginoo sa tabletas, dili sa siya gutomon pa hangtod sa hangtod. Ug mipadayon ang akong Lolo sa iyang gibuhat.

Gusto pa unta ko mangutana. Asa man pod mupalit ug tabletas ang Ginoo? Unsaon niya pagtumar? Kan-on sama sa Aspilet, o mogamit pa siya ug tubig? Sa dihang ako kining mahinuduman, magkapahiyum ko.

Karon nga ako dili na bata, kundili usa na ka batang buotan, daghan gihapon ko ug pangutana nga dili nako malimtan ang tubag.

Pangutana ngadto kang (secret).

akong pangutana: dili diay ko nimo lab (love oi)?
tubag: love man
akong pangutana: nganong dili man ka musogot?
tubag: mahadlok man ko
akong pangutana: ayaw lang kahadlok, wa diay kay salig nako?
tubag: daoy.. bantay ha..

Ug niining eksenaha nako taposon kining akong gisugilon. kung naa moy pangutana, pangutana lang, ayaw kaulaw. Kinsa nasayud basin dili pod ninyo malimtan ang tubag.

Sama sa tubag sa labing ba-o ko nga pangutana. Dili malimtan hangtud sa akong pagpanaw ning kalibutana.

Just for this moment

Lunes. Unang adlaw sa lima ka adlaw nga malipayon ug puno sa inspirasyon nga pagtrabaho. Sa mga susamang adlaw nga milabay, dasig kaayo ko nga magsugod sa akong trabaho. Apan karong adlawa, ambot ba, giabot man ko'g kalaay.

Gibati ko ug kamingaw.

Gimingaw lang ba ko sa akong lungsod nga namatngonan ug buot o gimingaw ba ko sa bugtong nilalang nga gihalaran ko sa akong gugma, kinabuhi ug kalag? O basin gilaayan lang ko sa kinabuhi nga halayo sa gustong kong ikauban sa kinabuhi? Kini ang mga pangutana nga gusto kong sutaon kung unsa ang tubag apan modumili ang akong kasing-kasing sa pagtubag.

Just for this moment.

Karon lang kini nga pagbatia, ug molabay ra kini. Karong taod-taod, mawala ra kini.

Friday, 3 August 2007

Dili Malimtan

Sa klase (elementay):
Girls: Goodbye boys.
Boys: Goodbye.
Boys: Goodbye girls.
Girls: Goodbye.
Boys and Girls: Goodbye everybody.
Boys and Girls: Goodbye!
Boys and Girls: See you this afternoon!

Na late nasad:
batang buotan: Good morning classmates
buotan nga classmates: Good morning. How are you?
batang buotan: I'm fine, thank you. May I come in?
buotan nga classmates: Come in and take your seat.
batang buotan: Thank you.
buotan nga classmates: Your welcome.

Program sa dili pa magklase:
This morning we will have a short program. The first part of our program is song by the class to be lead by --(batang buotan).

Sa Ozamiz:
[extro] MIT Masscom department, ABS-CBN, Testigo, --[batang buotan]
MIT Radio and Television Network, Inc. (an ABS-CBN affiliate) ; Testigo (news program of Mass Communication students)

Sa klase gihapon (graduate school):
Professor: St. John Baptist de La Salle
Mga buotan nga students: Pray for us!
Professor: Live Jesus in our hearts.
Forever.

Dili pod ko kalimot ani:
Ang lungsod nga nasayod maoy makahatag kusog sa demokrasya. Apan ang lungsod nga mapasagaron maoy makapukan sa atong kagawasan.
-Atty. Reuben Canoy, Perspective


Thursday, 2 August 2007

Pikpik

Shoulder tapping (pikpik) is a friendly gesture which means, assurance, and encouragement.

Nagsingabot man ang pista niadto sa Mahayag (September) sa dihang mikatap ang makalilisang nga sulti-sulti. Sumala pa sa mga hungihong ug tabi, duna kunoy 10 ka mga mistoryosong tawo ang miabot sa lungsod. Gidudahan nga kining mga tawhana, gikan sa Dipolog (wa ra ba gyod ni napamatud-i). Ang ila kunong tumong ug tuyo sa paglangyaw sa Mahayag aron hiloan ang mga tawo pinaagi sa pikpik ug palatay.

Alegre gyod hinoon kay tiaw mo kung naay mopikpik, kaila man o dili, balusan man gyod ug pikpik. Pikpik diri, pikpik didto, way undang nga pinikpikay! (exaggerated)

Kung pikpikon man gud daw, kinahanglan gyod nga mobalos aron masumpa. Kuyaw baya po kuno kung mahiloan ka sa pipik, mulagom daw ka, unya makuyapan, unya mamatay. Kinsa bay dili malisang niana?

Kay duol na lagi ang pista, naa gyoy perya. Daghan gihapong tawo oi, mura wa mahadlok sa mga pasidaan sa mga katigulangan. Aw, naa baya poy alkontra, lana ug tawas tapol, ug para sigurado, balos gyod ug pipik.

Ang sakit naa baya'y tambal; ang pikpik naa poy alkontra. Uso kaayo ato ang habak, lana, ug kana laging tawas tapol. Naapil baya pod ko'g kalisang ato mao nga mihanyo gyod ko sa akong nanay nga palitan ko ug tawas tapol. Wa man gyod ko paliti. Dili man siya motuo ana.

Karon di na ko mahadlok pikpikon. Kung gusto mo mopikpik nako, ari lang sa Sugbo, pikpika ko, bisan binuntagay pa.

Ambot lang!!!

PS: Nawala ra man tong makalilisang nga sulti-sulti. Wa gyod toy kamatuoran. Kauban ra to sa pari nga way ulo. Haay.. daghan kaayong version ang mga kutso-kutso ning kalibutan sa mga batang buatan! Unsa pa..hehe..

Artista

Daghan gyod ang gusto mag-artista. Sa akong ihap, dili na paigo ang akong mga kulamoy sa kadaghan sa mikumpisal kanako nga gusto silang mag-artista.

Unsay tan-aw nila nako, director o producer? Dili baya sab ingon niaana. Nagpaambit lang gud pod sila sa ilang damgo ug ambisyon.

Naglibog gyod ko. Unsa bay anaa sa pag-artista? Hay, pagkahinay gyod sa akong utok, obyosle (obviously), kasikat, dakong kita, ug uban pa.

Mangangha gyod ko kay bisan bata nga mao pa lang makamao moesturya, moingon na man nga inigkadako nila, gusto dawn'g mag-artista. Na, sa madugay o madali, inigkatawo sa bata dili na mohilak ug, UHA, UHA, UHA... moingon na ug, ARTISTA, ARTISTA...Gibaliw na.

Dili lang ingon nga garboso ra kaayo ko, pero naa baya pod koy kaila nga mga sikat ug banggiitan nga artista. Pipila kanila ginganla'g Asia, Ara Mina, Rosanna, Keanna, Pokwang. Daghan pa oi. Dili lang nato manganlan tanan. Dili baya na sila basta-basta nga artista. Tinuod gyod na nga kaila ko nila, naa pa gani ko hulagway nila. Pero sila, nakaila kaha nako? Ambot lang.

Lain pay ato, daghan baya po'g artista sa among baryo. Na, kay daghan nang artistahon nga tawo didto, daghan napod unya modagan sa pagka-kapitan? Aw, dili lang ta mag-una sa eksena. "Don't advance the movie!", si Han pay pasultihon.

Ako artista baya pod. Dili lang basta artista, sikat ug buotan nga artista. Wala lang koy project offer. Kung si David pay pasultihon, "wala lang si Jerry madiskaber (discover)."

Ambot lang!

Wednesday, 1 August 2007

Gibulagan

Pait kaayo ning bulagan ta sa uyab. Sakit oi, mura kumuton ang dughan sa kasakit.

Tulo ray bation sa mga gibulagan, maguol, masuko, ug malipay. Naa baya poy malipay, depende man na kung kinsa ang nagbulag. Kung gwapa ang mobulag, angay magpuasa, kung dili ra kaayo gwapa, angay magpiyesta!

Among silingan nga si Junard labihang kaguol sa dihang gibulagan siya sa iyang uyab. Tiaw mo, tungod sa iyang tumang kaguol, gilumsan niya ang iyang kaugalingon kisomkisom nga tuba ni David. Lagi kay nakahibalo man sad ang mga batang buotan nga gibulagan siya mao nga naghuboghubog, gikantiyawn hinoon. Wa gyod natugki'g uwaw s Junard. Mihilak siya'g nagyawyaw sa publikong lugar (eskina sa Sta. Cruz).

Gitambagan siya, "ang uyab dili angay hilakan, pakamatyan"!

Pagkataodtaod ato miuli siya, milipot sa luyo sa ilang balay. Naunsa man nga iya mang gitim-id ang tayodan (Thiodan, insecticide). Wa siguroy lami o basin pait ra kaayo, igo ra siya nga mihigop gamay unya gihaplas sa iyang liog ug dughan ang uban. Ambot lang nganong gihaplas man.

Nakit-an baya siya sa iyang gibuhat mao nga gidala sa doctor. Wa ra siya namatay pero mura siya'g mamatay sa kaulaw tungod sa iyang inartistang paghikog. AMBOT LANG!

Ang uban sab kung bulagan, malipay hinoon kay makapanguyab pa kuno sila ug lain. Pero kadaghanan maguol gyod kay dili baya lalim ang manguyab, gawas nga makagasto, maulawan baya pod usahay.

Sa tanang naulawan, mas makauulaw ang natitabo kang (di lang nako nganlan--hehe). Tiaw mo ba nga sa dihang musaka na unta siya sa balay sa iyang gipamisitaan, natapigas man iyang tiil, nahulog intawon siya. Napiang intawon. May gani nadali niya ug pahilot kang Berning. Nahimo gyod tong sumsuman sa baryo mao nga tungod sa iyang kaulaw, milangyaw siya sa Sugbo.

Mao na nga mag-amping ta para dili bulagan. Kung bulagan man gani, ayaw lang kaguol, naay pay laing mubulag nimo.


AMBOT LANG!

Maninintal

Kining mga babaye (aw, dili man tanan) maayo kaayong manintal. Ambot ba ngano nga kining mga lalake dali man sab kaayong matintal. Aw, dili pod diay kuno tanan kay ang akong amigo nga si Danny, dili man kuno dali matintal. AMBOT LANG!

Kagabii maayo unta kaayo nakong pagbaktas-baktas sa dihang nalansang ang akong mga mata sa maninintal nga Eba nga nagtindog sa atbang sa Jollibee.

Mibudlot gyod ang akong mga mata. Sama sa pagbudlot sa akong mata kaniadtong unang higayon nga nagwiwi mi sa baki didto sa laboratory. Curious kaayo ko sa akong nakita. Kinsa bay Adan nga dili matintal sa mansanas nga gipaibog?

Mubo kaayo ang pulang shorts nga gisul-ob sa chicks. Ang blouse mubo sab, nakita gyod ang iyang pusod. Kung nakakita pa lang si bai Danny sa kahamis sa paa sa babaye, makapiyong gyod siya. Mibutobuto gyod ang akong dughan samtang mipilit kaniya ang akong panan-aw. Ambot ba ug ngano, maayo na lang kay nabanggaan ko (kay naa man ko sa tunga sa agianan) kay kung wa pa, hayan malagpot gyod ang akong mata.

Sa susama niining mga higayon, mag-ampo gyod ko nga dili matintal. Niadtong niaging katuigan natintal man god ko sa akong nakita sa usa ka coffee shop sa sugbo, unya naa gyoy nahitabo pagkahuman. Unya na lang na nako isugilon. hehe

Mao nga sukad ato, natagam na gyod ko.

Sa mga dali matintal, niay tips unsaon paglikay sa tentasyon:
  • ginhawa ug lawom
  • ilingiw ang ulo
  • piyunga ang mata
  • lakaw palayo
  • kung dili kaya, duola!

AMBOT LANG!